Bolšaść palitviaźniaŭ, vyzvalenych siońnia, vysłali va Ukrainu
Ukrainski Kaardynacyjny štab pa pytańniach abychodžańnia z vajennapałonnymi paviedamiŭ, što akramia 5 ŭkrainskich hramadzian, vyzvalenych Łukašenkam u parazumieńni z ZŠA 13 śniežnia, va Ukrainu prybyli taksama 104 hramadzianiny Biełarusi.
«Bolšaść ź ich — hramadzianie Biełarusi, asudžanyja pa palityčna matyvavanych spravach paśla prezidenckich vybaraŭ 2020 hoda i pratestaŭ, jakija išli za imi. Heta palityki, aktyvisty, udzielniki pratestaŭ, siabry pieradvybarnych štaboŭ apazicyjnych kandydataŭ, błohiery, žurnalisty i zvyčajnyja hramadzianie, abvinavačanych u «arhanizacyi masavych biesparadkaŭ», «zaklikach da dziejańniaŭ suprać nacyjanalnaj biaśpieki» i pavodle inšych anałahičnych artykułaŭ», — paviedamlaje Kaardynacyjny štab.
Siarod vyzvalenych pieraličvajucca Maryja Kaleśnikava, Viktar Babaryka, Maksim Znak, Maryna Zołatava, pra vyzvaleńnie jakich paviedamlałasia raniej.
Akramia taho, stała viadoma, što na svabodu vyjšaŭ palityk, adzin ź lidaraŭ Biełaruskaj chryścijanskaj demakratyi Pavieł Sieviaryniec.
Taksama zhadvajucca proźviščy
- Maryny Sankievič, asudžanaj za kamientary ŭ sacyjalnych sietkach da 7 hadoŭ pazbaŭleńnia voli;
- 70‑hadovaj hamialčanki Safii Bačurynskaj, asudžanaj da 2 hadoŭ kałonii za «abrazu Łukašenki»;
- žychara Homiela Uładzisłava Jacenki, pasadžanaha na 5 hadoŭ za pieravod 21 jeŭra dla pałka Kastusia Kalinoŭskaha;
- psichołaha Siarhieja Ivancova, zatrymanaha ŭ krasaviku 2023 hoda za toje, što nibyta pisaŭ kamientary ŭ bot kanała «Biełaruś hałaŭnoha mozhu» i asudžanaha da 4 hadoŭ pazbaŭleńnia voli;
- piensijanierki Natalli Malec, asudžanaj na 3 hady za toje, što była ŭ fejsbuku ŭ supołcy «Listy salidarnaści Biełaruś 2020».
Taksama ŭ telehram-kanale «Choču žiť» źjaviłasia fota palitźniavolenaj 68‑hadovaj piensijanierki Aleny Hnauk.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ125
Kamientary