ZŠA: Vieta Rasii pahražaje lehitymnaści Rady biaśpieki AAN
ZŠA papiaredžvajuć, što častaje vykarystańnie Rasijaj prava vieta ŭ Radzie biaśpieki AAN stavić pad pahrozu lehitymnaść mižnarodnaha orhana.
Pra heta piša The Guardian.
Vydańnie adznačaje, što ZŠA i inšyja krainy-adnadumcy mohuć stracić davier da Rady biaśpieki AAN i pačać dziejničać samastojna.
Papiaredžańnie pryjšło pierad 70-hodździem AAN i ŭ toj čas, kali Rada biaśpieki sutykajecca z kryzisam u Siryi. Radzie nie ŭdałosia ŭzhadnić dziejańni, kab pasprabavać spynić krovapralićcio, navat paśla hibieli bolš za 220 tysiač siryjcaŭ.
Rasija vykarystoŭvała svajo prava vieta čatyry razy dla błakavańnia rezalucyj pa Siryi, jakija Maskva razhladaje jak pahrozu svajmu sajuźniku Bašaru al-Asadu.
Maskva taksama pieraškadžała mižnarodnym dziejańniam u dačynieńni da vajny va Ukrainie, dzie jana źjaŭlajecca bokam kanfliktu, akupavaŭšy Krym i pravodziačy tajemnuju vajennuju kampaniju ŭ padtrymku ŭschodnich sieparatystaŭ.
«A kali tak budzie praciahvacca i nie tolki ŭ vypadku Siryi i Ukrainy, tady źjaŭlajecca ryzyka dla statusu Rady biaśpieki, aŭtarytetu i jaho funkcyi mižnarodnaha arbitra ŭ pytańniach biaśpieki, da jakoha treba źviartacca», — skazała pastajanny pradstaŭnik ZŠA ŭ AAN Samanta Paŭer.
Francyja prapanuje ŭvieści miechanizm błakavańnia vieta pastajannych členaŭ Rady biaśpieki AAN, kali havorka idzie pra hienacyd abo masavyja źvierstvy. Ideju padtrymali mnohija pastajannyja siabry Rady biaśpieki AAN, ale Rasija kateharyčna suprać.
67 krain užo padtrymali inicyjatyvu ŭtrymańnia ad prava vieta ŭ Radzie biaśpieki AAN u vypadkach, kali kanflikty nabyvajuć asablivuju žorstkaść.
Ciapier čytajuć
Spalnyja miescy ŭ «Minsk-Śviecie» mohuć vyklikać kłaŭstrafobiju. Jak ekanomiać prastoru ŭ sučasnych kvaterach-studyjach16
Kamientary