Valancin Stefanovič: Viedaju vypadki, kali admianiali sudovuju pastanovu, bo SMS nie dajšło
Aštrafavanyja dniami za niesankcyjanavanyja pikiety apazycyjanery Mikałaj Statkievič, Uładzimier Niaklajeŭ i Anatol Labiedźka byli vyklikanyja ŭ sud niazvykłym dla Biełarusi čynam — praz SMS-paviedamleńnie.
«Toje, što pačali praz SMS vyklikać u sud, a nie praz zvyčajnyja pozvy, heta i vyznačyć niejak składana. Bačna, što ŭžo nichto ni z čym nia ličycca. Pastavili na kanvejer, kab zaadno papaŭniać biudžet hrašyma», — prakamentavaŭ takuju formu vyklikańnia ŭ sud Uładzimier Niaklajeŭ.
Ci zakonna dziejničaŭ sudovy sakratar Centralnaha sudu, kali vyklikaŭ apazycyjaneraŭ na razhlad spravy SMS-paviedamleńniem?
Viarchoŭny sud zrabiŭ na hety kont zajavu, što zakon u dadzienym vypadku nia byŭ parušany:
«U Biełarusi vykarystańnie inšych srodkaŭ suviazi dla nakiravańnia sudovych pozvaŭ, u pryvatnaści takoha vidu sučasnaj kamunikacyi, jak SMS-paviedamleńnie, pra čas i miesca sudovaha pasiedžańnia jurydyčna zacikaŭlenych u vyniku spravy asobaŭ rehlamentavana pracesualnymi normami i dziejnymi ŭ sudach ahulnaj jurysdykcyi instrukcyjami pa spravavodztvie», — adznačajecca ŭ paviedamleńni presavaj słužby Viarchoŭnaha sudu.
Viarchoŭny sud spasłaŭsia na pastanovu plenumu Viarchoŭnaha sudu ad 21 śniežnia 2012 hodu «Ab praktycy razhladu spraŭ u paradku zavočnaj vytvorčaści», u jakoj skazana, što «ŭ nieabchodnych vypadkach infarmavańnie dazvalajecca z vykarystańniem elektrasuviazi», ale pry ŭmovie «fiksacyi faktu adpraŭleńnia i dastaŭki takoha paviedamleńnia adrasatu».
Pavodle presavaj słužby Viarchoŭnaha sudu, infarmavańnie praz SMS asobaŭ, jakija pryciahnutyja da administracyjnaj adkaznaści, praduhledžanaje artykułam 10.9 Pracesualna-vykanaŭčaha kodeksu Respubliki Biełaruś ab administracyjnych pravaparušeńniach.
Taksama ŭ Viarchoŭnym sudzie spasłalisia na pukt 106 častki 7 «Instrukcyi pa spravavytvorčaści», jakaja zaćvierdžana dla sudoŭ ahulnaj jurysdykcyi zahadam staršyni Viarchoŭnaha sudu Valancinam Sukałam u kastryčniku 2014 hodu. «Asoby mohuć być vyklikanyja ŭ sudovaje pasiedžańnie telefanahramaj, telehramaj, praz elektronnyja i SMS-paviedamleńni pry fiksacyi faktu adpraŭki i dastaŭki takoha paviedamleńnia adrasatu», — paviedamlaje pres-słužba Viarchoŭnaha sudu sa spasyłkaj na instrukcyju.
Ale što rabić u vypadku, kali SMS-paviedamleńnie z peŭnych pryčyn da adrasata nie dajšło, ale praces adbyŭsia zavočna i z vynikam jaho čałaviek nia zhodny? Ci moža heta paŭpłyvać na jurydyčnyja vyniki pierahladu spravy?
Namieśnik staršyni pravaabarončaha centru «Viasna» Valancin Stefanovič hetak prakamentavaŭ Svabodzie praktyku vykliku na sud praz SMS:
«Z punktu hledžańnia zakonu infarmavańnie praz SMS mahčyma, takaja praktyka isnuje i stanovicca ŭsio šyrejšaj. Pravy tych, kaho hetak vyklikajuć u sud, kali heta naležnym čynam zafiksavana, nie parušajucca. Miž tym byvajuć roznyja sytuacyi, kali SMS-paviedamleńnie da čałavieka nie dajšło z techničnaj pryčyny. Kali spravu čałavieka razhledzieli zavočna, a jon nie atrymlivaŭ SMS-paviedamleńnia pra čas i miesca pracesu, varta źviarnucca ŭ sud i pasprabavać heta dakazać. U tym liku možna ŭziać razdrukoŭku ŭ słužbach mabilnaj suviazi i pradstavić jaje sudu, kab sud u svaju čarhu dakazaŭ, što jon infarmavaŭ čałavieka pra čas i miesca praviadzieńnia pasiedžańnia naležnym čynam. Kali ŭdasca dakazać, što SMS čałaviek nie atrymlivaŭ, heta padstava dla admieny sudovaha rašeńnia, u pryvatnaści administracyjnaj pastanovy».
Pavodle Valancina Stefanoviča, u našaj pravaabarončaj praktycy ŭžo zdaralisia vypadki, kali ŭ sudach udavałasia dakazać, što SMS-paviedamleńni nie dachodzili i praz heta admianiać vyniki zavočnych pracesaŭ. «Takich vypadkaŭ užo viedaju šmat», — skazaŭ pravaabaronca.
Čamu Mikałaja Statkieviča, Uładzimiera Niaklajeva i Anatola Labiedźku vyklikali ŭ sud nie zvyčajnaj pozvaj pa pošcie, a praz SMS? Ci nie śpiašalisia pakarać?
«Pytańnie da sudździaŭ. Adnosna palitykaŭ takoje ŭpieršyniu, ale adnosna zvyčajnych ludziej — heta ŭžo raspaŭsiudžanaja praktyka. Tut varta kazać i pra inšaje: ludziej pryciahnuli da adkaznaści za toje, što ŭ čas vybaraŭ jany publična vykazvali svaje mierkavańni adnosna važnych dla hramadzianaŭ rečaŭ. Atrymlivajecca, što dziaržava ich u hetym pravie abmiežavała dy jašče i pakarała», — skazaŭ Valencin Stefanovič.
Kamientary