Viadomamu kinarežysioru, scenarystu i hramadska-palityčnamu dziejaču było 78 hadoŭ. Jon ličycca adnym z najbolš viadomych biełaruskich aŭtaraŭ dakumientalnaha kino. Byŭ členam Mižnarodnaj i Jeŭrazijskaj akademij telebačańnia i radyjo, a jaho filmy nieadnarazova atrymlivali ŭznaharody na mižnarodnych kinafiestyvalach.
Juryj Chaščavacki naradziŭsia 18 kastryčnika 1947 hoda ŭ Adesie.
Paśla zakančeńnia Adeskaha technałahičnaha instytuta pa raźmierkavańni pryjechaŭ u Minsk. Spačatku supracoŭničaŭ ź Biełaruskim telebačańniem jak pazaštatny aŭtar, paśla staŭ režysioram. U 1981 hodzie skončyŭ Leninhradski dziaržaŭny instytut teatra, muzyki i kiniematahrafii.
Za svaju tvorčuju karjeru źniaŭ bolš za tryccać dakumientalnych i mastacka-publicystyčnych filmaŭ. Siarod ich — «Heta cichaje žyćcio ŭ Hłybokim», «Tut byŭ Kryłoŭ», «Sustrečny pazoŭ», «Usio dobra», «Ruskaje ščaście», «Aazis», «Čas Čžoŭ Enłaja», «Bohi siarpa i mołata», «Dažyć da kachańnia», «Kaŭkazskija niavolniki» i «U pošukach idyšu».
Najbolšuju viadomaść Chaščavackamu prynios dakumientalny film «Zvyčajny prezident», stvorany ŭ 1996 hodzie. Stužka pryśviečanaja pieršym hadam kiravańnia Alaksandra Łukašenki i była źniataja ŭ žanry palityčnaha pamfletu. Film atrymaŭ šerah mižnarodnych uznaharod, u tym liku Premiju miru Bierlinskaha kinafiestyvalu, Hran-pry arhanizacyi Human Rights Watch u Ńju-Jorku i pryz «Załataja brama» na kinafiestyvali ŭ San-Francyska. Scenaryŭ da filma napisaŭ Leanid Mindlin, pradziusaram staŭ Piotr Marcaŭ. U zdymkach udzielničaŭ były ministr unutranych spraŭ Biełarusi Juryj Zacharanka, jaki ŭ 1999 hodzie byŭ vykradzieny i źnik bieź viestak.
Šyroki rezanans atrymaŭ taksama film «Płošča», jaki raskazvaje ab prezidenckich vybarach 2006 hoda ŭ Biełarusi i pratestach na Kastryčnickaj płoščy ŭ Minsku.
U hramadskim žyćci Juryj Chaščavacki byŭ adnym z zasnavalnikaŭ Minskaha abjadnańnia jaŭrejskaj kultury ŭ 1988 hodzie, uvachodziŭ u praŭleńnie hetaj arhanizacyi, ale paźniej pakinuŭ jaho z-za roznahałośsiaŭ. U kancy 1990‑ch hadoŭ byŭ členam Rady dyrektaraŭ Suśvietnaj asacyjacyi biełaruskich jaŭrejaŭ.
U palityčnaj dziejnaści Chaščavacki źjaŭlaŭsia členam Abjadnanaj hramadzianskaj partyi i adkryta vystupaŭ jak apanient ułady Łukašenki.
Ciapier čytajuć
U turmie pamior były supracoŭnik KDB Mikałaj Varapaj, asudžany za špijanaž na karyść Ukrainy2
Kamientary
Źbiraŭsia zakončyć dakumientalny film "Hety šalony, šalony, šalony ruski śviet" ale nažal, nie paśpieŭ pry žyćci.
Viečnaja pamiać. Spačuvańni rodnym i svajakam.
Jon pryvioz niejki film, padaryŭ nam usim dysk i jechaŭ dalej u Izrail.
Ja spytaŭ paśla filmy: "Čamu vaš film na ruskaj movie?" Spadar Juryj Chaščavacki adkazać nie zmoh. Čamuści nie byŭ hatovy da takoha prostaha pytańnia.
Jon na try hady starejšy za mianie. Ziamla pucham.