Ramantyčnaja historyja kachańnia i kazus z pašpartam: piać faktaŭ pra kiraŭnika Śledčaha kamiteta Ivana Naskieviča
Siońnia Alaksandr Łukašenka pryznačyŭ Ivana Naskieviča kiraŭnikom Śledčaha kamiteta. Da hetaha Naskievič zajmaŭ pasadu prakurora Bresckaj vobłaści. «NN» sabrała cikavyja fakty pra siłavika.
Rodam z hłybokaha Paleśsia
Ivan Naskievič naradziŭsia ŭ 1970 hodzie ŭ vioscy Cierabličy Stolinskaha rajona. Heta samy kraj Paleśsia, dalej na poŭdzień tolki Almanskija bałoty, a najbližejšyja nasielenyja punkty — užo na ŭkrainskaj terytoryi. Zusim pobač ad Cierabličaŭ znachodzicca słavutaja vioska Alšany, tak zvanaja ahurkovaja stalica Biełarusi.
Što tyčycca samich Cierabličaŭ, to tam ledźvie nie pałova vioski nosić proźvišča Naskievič. Sam Ivan raskazvaŭ, što ŭ dziacinstvie dapamahaŭ u biblijatecy Ivanu Suprunčyku. Siońnia heta viadomy ŭ krainie krajaznaŭca, narodny majstar. Pry biblijatecy ŭ Cierabličach dziejničaje muziej, dzie sabranyja jak vyraby samoha Suprunčyka, hetak i pradmiety viaskovaha pobytu.
Roŭna hod nazad u Cierabličach byŭ adkryty pravasłaŭny chram Uvaskrasieńnia Chrystova, vialiki ŭkład u jaho budaŭnictva ŭnios Ivan Naskievič.
Nie pastupiŭ u BDU, słužyŭ u HDR
Škołu Ivan Naskievič skončyŭ z załatym miedalom. Ale pastupić na jurydyčny fakultet BDU jamu hetak i nie ŭdałosia. Jak piša hazieta «Viečiernij Briest», pieršy ekzamien Naskievič zdaŭ na čaćviorku pa piacibalnaj sistemie, a pry konkursie 10 čałaviek na miesca prosta nie staŭ čakać nastupnych, a źjechaŭ u viosku. Ceły hod Naskievič adpracavaŭ u kałhasie, adnačasova rychtavaŭsia da ekzamienaŭ.
Ale zdavać ich paŭtorna nie ŭdałosia. Pryjšoŭ čas iści ŭ vojska. Ivan Naskievič apynuŭsia ŭ HDR.
Atrymaŭ hramadzianstva Biełarusi tolki ŭ 1995
Paśla słužby ŭ vojsku Ivan Naskievič nakiravaŭsia na vučobu ŭ Charkaŭ, va Ukrainskuju dziaržaŭnuju jurydyčnuju akademiju. Vučobu jon skončyŭ u 1995-m hodzie, paśla čaho pryniaŭ rašeńnie viarnucca na radzimu.
I tut adbyŭsia cikavy jurydyčny kazus. Pry ŭładkavańni na pracu ŭ Pinskuju prakuraturu vyśvietliłasia, što ŭ Naskieviča… niama biełaruskaha hramadzianstva. U jaho zastavaŭsia ŭsio jašče stary saviecki pašpart. Prablemu ŭdałosia vyrašyć praz paŭhoda, paśla hetaha małady śpiecyjalist raspačaŭ rabotu.
Jon uzhadvaŭ svaju pieršuju spravu, jakoj jamu paručyli zajmacca ŭ jakaści śledčaha. Heta była sproba kradziažu blašanki farby ź pinskaha chimzavoda. «Dali štraf», — kazaŭ prakurorski rabotnik.
U 2007 hodzie jon staŭ prakuroram Pinskaha rajona, a ŭ 2012 — Bresckaj vobłaści.
Prychilnik śmiarotnaha pakarańnia
Ivan Naskievič u svoj čas vysoka acaniŭ stvareńnie Śledčaha kamiteta, choć sam i zastaŭsia pracavać u orhanach prakuratury.
Jon ličyć, što patrebnaje ŭzmacnieńnie pakarańnia dla kiroŭcaŭ, što siadajuć za styrno ŭ pjanym vyhladzie, što tyčycca karupcyjnych złačynstvaŭ, to, na dumku prakurora, karać treba bolš rublom, a nie turemnymi terminami.
Vystupiŭ Ivan Naskievič i za zachavańnie śmiarotnaha pakarańnia na ciapierašnim etapie.
«Mahčyma, praź niejki čas my pryjdziem da taho, što śmiarotnaje pakarańnie tre' budzie admianić. Ale pakul jano apraŭdanaje, u vyklučnych vypadkach. Choć treba razumieć, što takija prysudy pavinny być vielmi ŭzvažanymi».
Darečy, cikavy vypadak adbyŭsia pamiž prakuraturaj i śledčym kamitetam Bresckaj vobłaści ŭ pačatku minułaha hoda. Śledčy kamitet admoviŭsia zavieści kryminalnuju spravu za piedafiliju suprać hałoŭnaha redaktara haziety «Viečiernij Briest». SK nie znajšoŭ składu złačynstva ŭ dziejańniach redaktara. Adnak prakuratura admianiała hetaje rašeńnie, tłumačačy, što nie była praviedzienaja poŭnaja pravierka. Adnak da suda spravu tak i nie daviali.
Historyja kachańnia z prysmakam zabojstva
Svaju abrańnicu Ivan Naskievič sustreŭ u Pinsku. Dziaŭčyna pa imieni Iryna pracavała pravizaram u aptecy. Adnojčy niedaloka ad miesca jaje pracy adbyłosia zabojstva, a ŭ jakaści paniatych śledčyja prakuratury zaprasili supracoŭnic apteki. Praź niejki čas Naskievič vyklikaŭ Irynu ŭ prakuraturu pozvaju, a paśla zaprasiŭ na spatkańnie. Šlub para zaklučyła ŭ 1997 hodzie.
Ciapier u Ivana Naskieviča z žonkaj troje dziaciej: dvoje chłopčykaŭ i dziaŭčynka.
Bieraściejcy kažuć, što časta bačać Naskieviča na hulniach miascovaha handbolnha kłuba BHK imia Miaškova.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im6
Kamientary