Padatak z pracentaŭ pa depazitach: kolki płaciać našy susiedzi

Z 1 krasavika nastupnaha hoda pačnie pracavać norma dekreta №7, jakaja praduhledžvaje vypłatu padatku z dachodu, atrymanaha pa depazicie. Kali hrošy pralažali na rublovym depazicie mienš za hod ci na valutnym — mienš za dva, to pryjdziecca vypłacić 13% z dachodu, jaki paśpieŭ zarabić układčyk. Finance.tut.by pahladzieŭ, ci jość takaja praktyka ŭ susiednich krainach.

Pavialičyć

Płacić padatak biełarusam nie pryjdziecca, tolki kali hrošy lažać pad staŭku, jakaja nie pieravyšaje staŭku pa depazitach da zapatrabavańnia (ciapier kala 0,5% hadavych). Ale naohuł staŭki padatku i ŭmovy, pry jakich jaho treba vypłačvać, va ŭsich krainach roznyja.

Tak u Rasii padatak pryjdziecca płacić tolki ŭ tym vypadku, kali pracentnaja staŭka pa ŭkładzie pieravyšaje pamier staŭki refinansavańnia Centrabanka Rasii na 10. Klučavaja staŭka Centrabanka ciapier roŭnaja 11%. Heta značyć, pad padatkaabkładańnie traplajuć ŭkłady sa staŭkaj vyšej za 21% hadavych. Praŭda, z 1 studzienia 2016 hoda norma ŭskładnicca: pad padatkaabkładańnie patrapiać tyja ŭkłady, pa jakich pracenty pieravyšajuć staŭku refinansavańnia na 5 pracentnych punktaŭ.

Padatak utrymlivajuć nie sa ŭsiaho prybytku, a tolki z toj roźnicy, jakaja pieravyšaje normu. Padatak ŭtrymlivaje sam bank. Važna i toje, što pry raźliku zavyšanaha dachodu ŭličvajecca naminalnaja, a nie efiektyŭnaja staŭka, što aktualna dla depazitaŭ z kapitalizacyjaj adsotkaŭ. Dla rezidentaŭ staŭka składaje 35%, a dla nierezidentaŭ — 30%.

U Litvie taki padatak płaciać užo z 1 studzienia 2014 hoda. Tam pracentny dachod abkładajecca padatkam pa ahulnaj staŭcy indyvidualnaha padachodnaha padatku — 15%. Pad dziejańnie hetaj normy traplajuć pracenty pa depazitach u bankach i inšych kredytnych arhanizacyjach, stvoranych u Litvie ci ŭ inšaj krainie Jeŭrasajuza.

Va Ukrainie padatkaabkładańnie prybytku z depazitaŭ isnuje ŭžo niekalki hadoŭ. Ale ŭ minułym hodzie byli źmienienyja praviły i układčykam trochi palehčyli žyćcio: banki stali vystupać u jakaści padatkovych ahientaŭ i sami vypłačvajuć padatak. Zaraz supracoŭniki banka padčas kožnaha naličeńnia prybytku pa depazicie, buduć utrymlivać ź jaje 15% padatku. Adzin raz u miesiac bank pieraličvaje ŭ biudžet ahulnuju sumu ŭtrymanych padatkaŭ, vyličanych z ahulnaj sumy dachodaŭ układčykaŭ pa depazitach u spravazdačnym miesiacy.

Padatak na pracentny dachod pa depazitach u susiednich krainach

U Łatvii padatak z dachodu pa depazitach samy nizki siarod našych susiedziaŭ — 10%. Zakon vyznačaje, što padatak utrymlivajecca ŭ dzień atrymańnia prybytku, heta značyć, u momant vypłaty pracentaŭ. Padatak banki ŭtrymlivajuć aŭtamatyčna.

Dachod pa depazitach u Polščy pryraŭnoŭvajecca da ahulnych dachodaŭ hramadzianina i sumujecca ź imi. Tamu tam płaciać za bankaŭskija pracenty pa prahresiŭnaj staŭcy padachodnaha padatku. Ale ŭ siarednim staŭka składaje 19%.

Naohuł, u mnohich krainach płaciać padatak z dachodu pa depazitach (naprykład, u Hiermanii, Anhlii, Ispanii). Ale jość i vyklučeńni. Skažam, u Estonii dachod ad terminovych i nakaplalnych układaŭ nie abkładajecca padachodnym padatkam.

Byvajuć i niestandartnyja varyjanty padobnaha padatkaabkładańnia. Voś u Izraili staŭku pa roznych depazitach vyznačaje padatkovy orhan ci ledź nie ŭ indyvidualnym paradku. Heta mohuć być i 15%, i 25%.

• 0
• 0
• 0
• 0
• 0
• 0
• 0
• 0