Ministr kultury nie ličyć, što dziaržava ścipła pavinšavała Aleksijevič
Ministr kultury Barys Śviatłoŭ nie ličyć, što dziaržava ścipła pavinšavała Śviatłanu Aleksijevič z atrymańniem Nobieleŭskaj premii. Pra heta jon zajaviŭ žurnalistam 10 śniežnia ŭ Pałacie pradstaŭnikoŭ.
«Ministerstva kultury pavinšavała telehramaj, tak by mović, ad usioj dušy. Kali vy miarkujecie, što ścipła pavinšavała, to što my pavinny byli zrabić?» — skazaŭ ministr.
Na pytańnie, ci nie ličyć jon, što nieabchodna było niejkim čynam uračysta adznačyć zapłanavanaje na siońnia ŭručeńnie premii, Śviatłoŭ adkazaŭ: «My hanarymsia, biezumoŭna, tym, što ŭ nas jość łaŭreat Nobieleŭskaj premii. Ale jakim čynam heta śviatkavać? Ja padumaju, jak u miežach Ministerstva kultury možna adśviatkavać, kali čałaviek užo atrymaje premiju».
Pry hetym ministr udakładniŭ, što dla hetaha patrebna inicyjatyva z boku samoj Śviatłany Aleksijevič. «Kali ŭ jaje nie budzie žadańnia, mnie niezrazumieła, jak śviatkavać», — skazaŭ Śviatłoŭ, dadaŭšy, što ŭ Aleksijevič pra heta nie pytaŭsia.
Na pytańnie, ci nie ličyć jon, što piśmieńnica paśla atrymańnia Nobieleŭskaj premii zasłuhoŭvaje zvańnia «Zasłužany dziejač kultury», Śviatłoŭ adkazaŭ, što nie vyklučaje mahčymaści jaho prysvajeńnia, «kali budzie inicyjatyva z boku adpaviednych arhanizacyj i budzie ŭniesiena takaja prapanova».
«Ja z tvorčaściu Aleksijevič znajomy jašče z pačatku 1990-ch hadoŭ, kali pačynaŭ pracavać u Ministerstvie kultury, i tady ŭsio rabiłasia — i filmy pavodle jaje scenaryjaŭ zdymalisia, i knihi vydavalisia. Jakija jašče mohuć być pytańni pra toje, što hety čałaviek u nas niejkim čynam pakryŭdžany», — zajaviŭ ministr.
Śviatłoŭ nie staŭ aceńvać Nobieleŭskuju lekcyju Aleksijevič, zajaviŭšy, što bolš cikavicca jaje tvorčaściu, «čym tym, što robicca vakoł tvorčaści i hetaj uznaharody». «Lekcyi — heta lekcyi, tam bolš navat palityki, čym tvorčaści», — miarkuje ministr.
Śviatłoŭ paviedamiŭ, što budzie siońnia hladzieć cyrymoniju ŭručeńnia Aleksijevič Nobieleŭskaj premii, ale «jašče śpiecyjalna hetaha nie płanavaŭ».
Kamientary