NATA płanuje ŭchvalić pavieličeńnie kolkaści svaich vojskaŭ na ŭschodnim fłanhu, paviedamlaje The Wall Street Journal sa spasyłkaj na pradstaŭnikoŭ aljansu i ZŠA.
Pavodle dadzienych vydańnia, mienavita takoje rašeńnie, chutčej za ŭsio, budzie pryniata ministrami abarony krain NATA ŭ chodzie ich sustrečy na nastupnym tydni. Pry hetym dakładnaja kolkaść vojskaŭ i toje, kolki mienavita vajskoŭcaŭ pradastavić kožnaja kraina, budzie vyznačana paźniej u hetym hodzie.
Hety krok zakranie Litvu, Łatviju i Estoniju, a taksama Polšču, udakładniaje WSJ. Ahienctva Reuters, u svaju čarhu, paviedamlaje, što aljans nie maje namieru raźmiaščać u Polščy svaje stałyja vajennyja bazy, niahledziačy na jaje prośby.
Pavodle dadzienych ahienctva, zapłanavanaje naroščvańnie sił NATA ŭ Jeŭropie, imavierna, budzie najbujniejšym z časoŭ chałodnaj vajny. Namier umacavać svoj ŭschodni fłanh u aljansie tłumačać zaniepakojenaściu dziejańniami Rasii — u pryvatnaści, anieksijaj Kryma.
Rasija pry hetym nieadnarazova zajaŭlała, što luboje razhortvańnie vojskaŭ takoha maštabu źjaŭlajecca surjoznaj pahrozaj dla jaje biaśpieki.
Raniej na hetym tydni kiraŭnik Pientahona Eštan Karter zajaviŭ ab płanach ZŠA pavialičyć vajennyja inviestycyi ŭ Jeŭropu ŭ čatyry razy — z 800 miljonaŭ dalaraŭ da 3,4 miljarda.
Jak adznačaje WSJ, z dapamohaj hetych hrošaj budzie prafinansavanaja dadatkovaja ratacyja vojskaŭ, a taksama svoječasovaje raźmiaščeńnie ciažkaj techniki, jakoje dazvolić ZŠA chutka pierakinuć u Jeŭropu svoj atrad «u časy kryzisu».
Ciapier čytajuć
Andrej Švied, architektar represij, pryznačany staršynioj Viarchoŭnaha suda14
Kamientary