U Viarchoŭnym sudzie praciahvajecca słuchańnie kryminalnaj spravy ŭ dačynieńni da člena Savieta Respubliki Hanny Šarejki. Joj i jašče šaści padsudnym vystaŭlena abvinavačańnie ŭ złoŭžyvańni ŭładaj abo słužbovymi paŭnamoctvami, učynienym arhanizavanaj hrupaj (art. 18, č. 3 art. 424 KK). Šarejka nie pryznała svaju vinu.
Pavodle viersii śledstva, Hanna Šarejka, budučy hiendyrektaram Viciebskaj brojlernaj ptuškafabryki, ustupiła ŭ karupcyjnuju zmovu sa svaim sužycielem Valdemarasam Norkusam, jaki źjaŭlaŭsia dyrektaram litoŭskaj firmy «Dajmas».
Pavodle słoŭ prakurora, Norkus mieŭ suviazi z Ryžskim kambikormavym zavodam. Praz kampaniju «Ruskom-R», jakaja źjaŭlałasia daččynym pradpryjemstvam «Dajmasa», i byli arhanizavany pastaŭki zamiežnych karmoŭ i karmavych dabavak.
Pieramohu na konkursie dla «patrebnaj firmy» arhanizavali padnačalenyja Šarejki, jakija chacieli takim čynam «zachavać svaje pasady, vysłužycca pierad dyrektaram, atrymać prefierencyi i paźbiehnuć adkaznaści za niedachopy ŭ pracy», adznačana ŭ abvinavačańni. Usie jany ciapier taksama na łavie padsudnych.
Pavodle słoŭ prakurora, firma Norkusa dla zajaŭki na konkursie vystaŭlała zaviedama zanižanuju canu. Adnak paźniej košt pavialičvaŭsia z-za transpartnych raschodaŭ i apłaty mytnych zboraŭ. U vyniku kančatkovaja cana zamiežnaha kambikormu była značna vyšejšaj, čym ajčynnaha. Dziaržabvinavačańnie aceńvaje škodu, naniesienuju pradpryjemstvu, u 4 młrd. rubloŭ.
Svaju vinu nie pryznali taksama byłyja namieśniki Šarejki Nadzieja Siemčankava, Jaŭhien Kanavalčanka i Mikałaj Kamaroŭ i partniory Valdemaras Norkus i Michaił Razžyvin. Vinu pryznaŭ tolki adzin abvinavačvany — viadučy śpiecyjalist viciebskaj fabryki Uładzimir Lijarancevič.
Kamientary