Mižnarodnaja studenckaja kanfierencyja «Jeŭropa-2016. De-kanstrukcyja kryzisu» projdzie 6—8 maja ŭ Vilni

Jeŭrapiejski humanitarny ŭniviersitet (Vilnia, Litva) zaprašaje studentaŭ bakałaŭrskich i mahistarskich prahram da ŭdziełu ŭ mižnarodnaj studenckaj kanfierencyi «Jeŭropa-2016. De-kanstrukcyja kryzisu: u pošukach novych form viedaŭ, identyfikacyi, salidarnaści», jakaja adbudziecca 6-8 maja ŭ Vilni.

Terarystyčnyja ataki ŭ Paryžy, uciekačy, rasijska-ŭkrainski kanflikt, hłabalnaja recesija stali prykmietami našaha času i zrabili nienadziejnymi, a to i niemahčymymi tyja sposaby suisnavańnia ŭ adzinaj jeŭrapiejskaj prastory, jakija skłalisia za apošniuju čverć stahodździa. Jak reahavać na hetyja šmatlikija vykliki? Ci tolki praz umacavańnie miežaŭ, abvastreńnie supiarečnaściaŭ, viartańnie prapahandy, nadzvyčajnaha stanovišča i strachu? Jak moža dapamahčy analiz histaryčnaha i kulturnaha vopytu artykulacyi sacyjalnych, palityčnych, ekanamičnych, psichałahičnych, ekzistencyjalnych, epistemałahičnych uskładnieńniaŭ i praktyk ich pieraadoleńnia? Jak my siońnia možam vykarystoŭvać resurs humanitarnych navuk, sacyjalnych prajektaŭ, kulturnickich i adukacyjnych inicyjatyvaŭ, kab pa-novamu akreślić situacyju, jakaja skłałasia? Jak pieraasensavańnie klučavych dla sacyjahumanitarystyki kanceptaŭ – identyčnaści, relihii, etničnaści, hienderu, udziełu – dapamoža nam znajści dziejsnyja adkazy na balučyja pytańni sučasnaści?

Adnoj sa zvykłych nazvaŭ dla ŭskładnieńniaŭ, biedstvaŭ, sacyjalnych, hieapalityčnych i asabistych dramaŭ jość kryzis – nieistotna, ci Karybski, ci siaredniaha ŭzrostu. Kryzis, apisany Karłam Marksam jak revalucyjnaja situacyja, Erykam Eryksanam jak padletkavaje švo identyfikacyi abo Džefry Alaksanderam jak traŭmatyčny abvał značeńniaŭ. Ekśpierty, palityki, intelektuały lohka – mabyć, zanadta lohka – staviać čałavieku i hramadstvu hety dyjahnaz. Prapanoŭvajučy kryzis u jakaści tematyčnaha padmurku dla štohadovaj studenckaj kanfierencyi Jeŭrapiejskaha humanitarnaha ŭniviersiteta, my zaprašajem zadumacca pra toje, što hety kancept daje dla razumieńnia i farmatavańnia nie tolki vostraaktualnych abstavinaŭ, ale i sacyjalnych, ekanamičnych, psichałahičnych trajektoryj uvohule? Jak arhanizavana vieda pra samyja raznastajnyja kryzisy? I jak identyfikujucca kryzisy samoj viedy? Jak źmianiajecca žyćcio čałavieka i śvietu, kali situacyja ich isnavańnia nazyvajecca kryzisam? Chto i čamu maje prava dyjahnastavać kryzis? Jak asobnyja indyvidy, supolnaści, instytucyi pražyvajuć svaje kryzisy i adolvajuć ich?

U MIEŽACH KANFIERENCYI PŁANUJECCA PRAVIEŚCI NASTUPNYJA SIEKCYI:

• Kryzis i transfarmacyi: jak krainy CUJE i byłoha SSSR reahujuć na novyja vykliki?
• Kryzis u histaryčnaj pierśpiektyvie: dehradacyja i/ci raźvićcio hramadstva.
• Prablemy stanaŭleńnia mižnarodnaha i jeŭrapiejskaha pravaparadku.
• Publičnaja palityka i dziaržaŭnaje kiravańnie: hłabalnyja teoryi i łakalnyja praktyki.
• Transfarmacyja nacyjanalnych pravavych sistem u kantekście intehracyjnych pracesaŭ i kanstytucyjanalizacyi.
• Relihija, hramadzianstva i pravy čałavieka ŭ sučasnaj Jeŭropie.
• Kryzis (u) miedyja: palityka, technałohija i krytyčnaja teoryja dvajnoj reprezientacyi.
• Viartańnie prapahandy: archieałohija biezabaronnaj śviadomaści.
• Ukrainski kryzis i miedyja.
• Hiendarnyja daśledavańni ŭ kryzisnyja časy: ad novych formaŭ niaroŭnaści da pošuku salidarnaści.
• Adnosiny miž pakaleńniami ŭ aktualnym sacyjalnym kantekście: formy niaroŭnaści i pierśpiektyvy dyjałohu.
• Spadčyna i supolnaść. Spadčyna jak instrumient pieraŭtvareńniaŭ.
• Papularyzacyja ŭrbanizmu i novyja prafiesijnyja identyčnaści.
• Dekanstrukcyja vobraza: biazvobraznaje i pačvarnaje ŭ sučasnym mastactvie.
• Dyzajn pamiž minułym i budučyniaj: stratehii ŭzajemadziejańnia dyzajnieraŭ z hramadstvam u kantekście aktualnych vyklikaŭ sučasnaści.
• Žurnalistyka ŭ epochu novych miedyja: kryzis ci novaja jakaść vytvorčaści infarmacyi?
• Kamiera jak instrumient palityčnaha vykazvańnia: sacyjalna-krytyčny patencyjał sučasnaha kiniematohrafa.
• Turyzm va ŭmovach kryzisu: vykliki, ryzyki, mahčymaści.
• Dyzajn. Ironija i salidarnaść.
• Pamiž historyjaj i spadčynaj: u pošukach miescaŭ pamiaci sučasnaj Jeŭropy.
• Režymy i praktyki dačynieńniaŭ ź Inšym va ŭschodniejeŭrapiejskich kulturach: pamiž haścinnaściu i kanfrantacyjaj.
• Praktyki identyfikacyi ŭ situacyjach kryzisu: pamiž nadziejaj i stomlenaściu.
• Kryzis i naratyŭ: raspaviadać, kanstrujavać, pražyvać.

Taksama padčas kanfierencyi płanujecca pravieści šerah lekcyj, kruhłych stałoŭ, prezientacyj knih i studenckich navukovych prajektaŭ. Akramia asnoŭnaj prahramy kanfierencyi, udzielniki atrymajuć mahčymaść paznajomicca z pracaj mahistarskich i bakałaŭrskich prahram EHU.

Dla ŭdziełu ŭ kanfierencyi nieabchodna da 15 sakavika 2016 h. zapoŭnić i padać anłajn-zajaŭku z tezisami dakłada (abjom 3000-6000 znakaŭ). Zajaŭki prymajucca ad studentaŭ bakałaŭrskich i mahistarskich prahram (albo ekvivalentnych im). Udzieł u kanfierencyi – na padstavie konkursu (budzie zrobleny adbor zajavak). Vyniki konkursnaha adboru buduć paviedamlenyja nie paźniej za 28 sakavika 2016 h.

Udzieł u kanfierencyi biaspłatny (biez rehistracyjnaha ŭniosku). Kanfierencyja VOČNAJA: patrabujecca abaviazkovaja asabistaja prysutnaść udzielnika ŭ Vilni i vystupleńnie z dakładam.

Pracoŭnyja movy kanfierencyi: anhlijskaja, biełaruskaja, ruskaja.

Vizavaja padtrymka

Studenty, jakim nieabchodnaja vizavaja padtrymka, pavinnyja ŭ zajaŭcy paznačyć pašpartnyja źviestki dla atrymańnia vizaŭ. Viza vydajecca biaspłatna. Vydatki na prajezd da Vilni i nazad udzielniki apłačvajuć samastojna.

Žytło

Na pieryjad praviadzieńnia kanfierencyi (6–8 maja) ŭdzielnikam pradastaŭlajecca žytło (biaspłatna).

Miesca praviadzieńnia kanfierencyi: navučalny korpus Jeŭrapiejskaha humanitarnaha ŭniviersiteta (vuł. Vałakupiu, 5, Vilnia, Litva).

Zbornik navukovych pracaŭ

Pa vynikach kanfierencyi płanujecca vydańnie zbornika navukovych pracaŭ, kudy ŭvojduć artykuły ŭdzielnikaŭ pa profilnaj tematycy kanfierencyi, rekamiendavanyja da publikacyi na padstavie vystupu na kanfierencyi.

Kantakty

Kantaktny adras: [email protected] Za abnaŭleńniami sačycie na staroncy kanfierencyi, a taksama na staronkach u sacyjalnych sietkach: VK, Facebook.

• 0
• 0
• 0
• 0
• 0
• 0
• 0
• 0