U Vialiki Čaćvier mitrapalit Tadevuš Kandrusievič i biskup Juryj Kasabucki abmyli nohi 12 viernikam FOTAFAKT
24 sakavika, u Vialiki čaćvier, u minskim archikatedralnym kaściole Imia Najśviaciejšaj Panny Maryi adbyłasia śviataja Imša Viačery Pana. Imšu ŭznačaliŭ Mitrapalit Minska-Mahiloŭski arcybiskup Tadevuš Kandrusievič.
Na ŭspamin pra ŭčynak Jezusa, jaki pierad Apošniaj Viačeraj abmyŭ nohi svaim vučniam, Mitrapalit Tadevuš Kandrusievič i biskup Juryj Kasabucki ździejśnili abrad abmyćcia noh 12 viernikam.
U hamilii ijerarch źviarnuŭ uvahu, što ŭ centry hetaj celebracyi znachodziacca sakrament Eŭcharystyi i słužeńnie bližnim: «Słovy ŭstanaŭleńnia Eŭcharystyi źjaŭlajucca bjučymsia sercam Kaścioła. U hetym sensie vielmi važnaj źjaŭlajecca teałahičnaja prykazka: «Kaścioł celebruje Eŭcharystyju, a Eŭcharystyja buduje Kaścioł». Heta aznačaje, što tam, dzie celebrujecca Eŭcharystyja, tam Kaścioł žyvie, prajaŭlajecca ŭ svajoj paŭnacie i charaktaryzujecca Božym dynamizmam».
Mitrapalit dadaŭ taksama: «Chrystus kaža nam: «Pamiatajcie ab tym, što Ja vam učyniŭ, i adnačasova pastupajcie hetak ža ŭ pamiać pra Mianie». Imitacyja Chrysta raspačynajecca ŭ momant bieskaryślivaha słužeńnia, čynić toje, čaho inšyja nie chočuć abo nie mohuć».
«Abmyćcio noh apostałam — heta taksama pryhožaja prezientacyja śviatarstva i sakramentu pajadnańnia. My idziom praz žyćcio, niesučy śmiećcie štodzionnaha žyćcia – našy padzieńni, hrachi, słabaści. Jany pieraškadžajuć nam. Ale Jezus ačyščaje nas ad ich. My stanovimsia novymi i možam raspačynać žyćcio nanova, — zaŭvažyŭ ijerarch.
Tamu ŭ śviatle siońniašniaha Jevanhiella my pavinny spytać siabie samich: «Što my ŭčynili patrabujučym i kolki noh abmyli?»»
«Kali my chočam ubačyć, jak vyhladaje Chrystus, to pavinny šukać Jaho abličča nie ŭ knihach, fatahrafijach, kino, teleprahramach, ale ŭ słužeńni bližnim. Mienavita tam my ŭbačym sapraŭdnaje abličča Chrysta», — padkreśliŭ arcypastyr.
Paśla Imšy Najśviaciejšy Sakrament byŭ pieraniesieny ŭ bočnuju navu, dzie ŭtvorana simvaličnaja ciamnica, u jakoj paśla aryštu znachodziŭsia Jezus.
Z ałtara byŭ źniaty abrus, tabernakulum zastaŭsia pustym i pryadčynienym. Ad hetaha momantu Eŭcharystyja nie budzie celebravacca da Paschalnaj vihilii. La simvaličnaj ciamnicy vierniki adarujuć Jezusa Chrysta ŭ Najśviaciejšym Sakramencie.
Siońnia ŭ katolikaŭ — Vialikaja Piatnica.
-
Skandał u połackaj škole: maci śćviardžaje, što jaje syna źbili na treniroŭcy pa dziudo — tak chłopca «vychoŭvaŭ» trenier
-
Žurnalist Ivašyn šosty raz sustrakaje dzień narodzinaŭ u niavoli
-
Łukašenka ŭ Hrodnie zhadaŭ pra Cichanoŭskuju va Ukrainie i raskazaŭ pra ciažkuju dolu biełaruskich daktaroŭ na Zachadzie
Kamientary