U paniadziełak, 18 krasavika, u ZŠA ŭručyli Pulitceraŭskuju premiju za vydatnyja zasłuhi ŭ halinie žurnalistyki, litaratury i muzyki.
U naminacyi «Navinovaja fatahrafija» premiju atrymali fotažurnalisty Siarhiej Panamaroŭ, Maŭrysia Lima, Tajler Chiks i Denieł Eter za sumiesny prajekt pra kryzis ź biežancami ŭ Jeŭropie. Repartažy byli zroblenyja dla roznych publikacyj u The New York Times.
«Mieduza» raspaviadaje pra inšyja važnyja pracy, jakija atrymali samuju prestyžnuju žurnalisckuju premiju śvietu ŭ 2016 hodzie.
Słužeńnie hramadstvu
Associated Press — za rasśledavańnie ab rabskaj pracy na rybałavieckich sudach u Tajłandzie
Jak vynikaje z apublikavanaha ŭ sakaviku 2015 hadoŭ rasśledavańnia Associated Press, krevietki i inšyja morapradukty dla amierykanskich kram i restaranaŭ zdabyvalisia ŭ Tajłandzie z vykarystańniem rabskaj pracy. Materyjał pryciahnuŭ uvahu da tajskaj rybałoŭnaj pramysłovaści i staŭ nahodaj dla bujnamaštabnaha aficyjnaha rasśledavańnia, pa vynikach jakoha bolš za dźvie tysiačy raboŭ byli vyzvalenyja, a dziasiatki čałaviek — aryštavanyja. Adzin z hałoŭnych hierojaŭ materyjałaŭ AP pra rabstva — birmaniec Mjint Nain, jamu pryśviacili asobny artykuł. U 1993 hodzie Nainu paabiacali 300 dalaraŭ za niekalki miesiacaŭ pracy ŭ Tajłandzie, ale ŭ vyniku jon pravioŭ 22 hady ŭ rabstvie, pracujučy za kapiejki i nie majučy mahčymaści viarnucca dadomu. Naina vyzvalili z rabstva dziakujučy rasśledavańniu mižnarodnaha ahienctva.
Terminovyja naviny
The Los Angeles Times — za aśviatleńnie zabojstva 14 čałaviek u San-Biernardzina
2 śniežnia 2015 hoda ŭ kalifarnijskim San-Biernardzina Sajed Ryzvan Faruk i jaho žonka Tašfin Malik zastrelili 14 čałaviek na mierapryjemstvie miascovaha departamienta achovy zdaroŭja. Hazieta The Los Angeles Times u pieršyja dni paśla terarystyčnaha aktu stała hałoŭnaj krynicaj navin ab zabojstvach; dziakujučy jaje rabocie chutka stała viadoma, jakaja padaploka hetaha złačynstva i čamu jano było ździejśniena. Za niekalki dzion žurnalisty LA Times padrabiazna prajhrali ŭsie abstaviny teraktu, sabrali infarmacyju ab asobach zabojcaŭ i pieršymi daviedalisia ab ich radykalnych isłamisckich pohladach.
Najlepšaje rasśledavańnie
The Tampa Bay Times i The Sarasota Herald-Tribune — za materyjał pra žyćcio pacyjentaŭ dziaržaŭnych psichijatryčnych stacyjanaraŭ u Fłarydzie
Leanora ŁaPiter Entani i Entani Karmje z The Tamba Bay Times i Majkł Braha z The Sarasota Herald-Tribune na praciahu 18 miesiacaŭ raźbiralisia, jak uładkavanyja psichijatryčnyja stacyjanary ŭ Fłarydzie. Žurnalisty vyśvietlili, što ŭłady štata, sprabujučy zekanomić na ich, paharšajuć umovy ŭtrymańnia pacyjentaŭ. Skaračeńnie vydatkaŭ nie spyniłasia navat paśla taho, jak u balnicach pačaścilisia vypadki samahubstvaŭ. U špitalach nie chapała piersanału, umovy ŭtrymańnia pacyjentaŭ možna było paraŭnać ź siaredniaviečnymi katoŭniami. Rasśledavańnie vyklikała vialiki rezanans u štacie i prymusiła miascovyja ŭłady pravieści aŭdyt vydatkaŭ na psichijatryčnyja stacyjanary.
Tłumačalnaja žurnalistyka
ProPublica i The Marshall Project — za materyjał ab utojvańni zhvałtavańniaŭ u palicyi
Žurnalisty Ci Kryścijan Miler z ProPublica i Kien Armstronh z The Marshall Project u śniežni 2015 hoda apublikavali rasśledavańnie zhvałtavańnia 18-hadovaj dziaŭčyny niepadalok ad Sietła. Palicyja spačatku joj nie pavieryła i schiliła da taho, kab abviaścić historyju vydumanaj. Złačynca ŭ hety čas zastavaŭsia na voli i praciahvaŭ ździajśniać zhvałtavańni, pakul jaho nie złavili ŭ Kałarada. Materyjał składajecca z dvuch častak: vytrymak z rasśledavańnia palicyi štata Vašynhton (ź jaho vynikaje, što palicejskija navat nie sprabavali znajści złačyncu) i materyjałaŭ rasśledavańnia ŭ Kałarada (praviedzienaha pa ŭsich praviłach). Žurnalisty taksama źviarnuli ŭvahu na bazu dadzienych FBR, u jakoj utrymlivajucca źviestki pra vypadki seksualnaha hvałtu: jana mahła b dapamahać łavić złačyncaŭ, ale joj nichto nie karystajecca.
Nacyjanalny repartaž
The Washington Post — za sieryju materyjałaŭ pra palicejski hvałt u ZŠA
The Washington Post pisała pra palicejski hvałt praktyčna ŭvieś hod — ad navinavych natatak da šmatstaronkavych materyjałaŭ. Hazieta vyrašyła sabrać zvodnuju statystyku vypadkaŭ, kali palicejski na słužbie adkryvaŭ ahoń i zabivaŭ čałavieka. Da kanca śniežnia 2015 hoda takich vypadkaŭ nabrałasia 965. Statystyka žurnalistaŭ akazałasia našmat bolš dakładnaj čym dadzienyja FBR, i śpiecsłužbam navat pryjšłosia paabiacać bolš akuratna stavicca da zboru źviestak. Faktyčna, The Washington Post uziała na siabie dziaržaŭnuju funkcyju kantrolu palicejskaha hvałtu. Z materyjałaŭ staličnaj amierykanskaj haziety, zrešty, nie vynikaje, što palicejskija zaŭsiody ŭžyvajuć zbroju nieabhruntavana — u absalutnaj bolšaści ad ruk supracoŭnikaŭ pravaachoŭnych orhanaŭ hinuli ŭzbrojenyja biełyja mužčyny, jakija ŭjaŭlali pahrozu. Tym nie mienš u biazzbrojnych čarnaskurych palicyjanty ŭ ZŠA stralali ŭ siem razoŭ čaściej, čym u biazzbrojnych biełych.
Mižnarodny repartaž
The New York Times — za materyjał ab zabojstvie za «spaleny Karan» u Afhanistanie
Žurnalistka Alisa Rubin atrymała «Pulitcera» za repartaž z Kabuła ab zabojstvie 27-hadovaj Farchundy Malikzady — jaje zabili da śmierci za toje, što žančyna nibyta spaliła Karan. Napad byŭ źniaty na videa i vykładzieny ŭ internet. Jak vyśvietliłasia, dziaŭčyna, zrazumieła, nie spalvała relihijnuju litaraturu, a tolki abvinavaciła handlaroŭ kala adnoj ź miačeciaŭ ŭ prodažy biessensoŭnych amuletaŭ, jakija nie majuć nijakich adnosin da isłamu. U tym, što jana źniščyła Karan, jaje abvinavaciŭ adzin z handlaroŭ, jaki nie ŭmieŭ čytać. Sprava ab zabojstvie Farchundy vyklikała vialiki rezanans u Afhanistanie i navat dajšła da sudu, što redka zdarajecca ŭ takich vypadkach.
Dakumientalny narys
The New Yorker — za artykuł pra zonu subdukcyi Kaskad i pahrozu razburalnaha ziemlatrusu
Časopisy stali ŭdzielničać u konkursie «Pulitcera» tolki ŭ 2015 hodzie, ale ŭdzieł staŭ dla ich niaŭdałym: ni ŭ adnoj katehoryi časopisnyja publikacyi nie pieramahli. Pieršaja ŭznaharoda časopisam pryjšła tolki ŭ 2016-m: jaje atrymała Ketryn Šulc za artykuł «The Really Big One» u The New Yorker. U materyjale raspaviadajecca pra zonu subdukcyi Kaskad na paŭnočna-zachodnim uźbiarežžy ZŠA — heta małavyvučany razłom, jaki moža spravakavać razburalny ziemlatrus i cunami 30-mietrovaj vyšyni. U vyniku mahčymaha stychijnaha biedstva mohuć zahinuć dziasiatki tysiač čałaviek.
Kamientary