Sakratar CK KPB zaklikaŭ prymirycca z Boham i carkvoju
Kamunist Mikałaj Vałovič zaklikaje adnapartyjcaŭ «pakajacca za hrachi partyi i prymirycca i z Boham, i z carkvoju».
Mikałaj Vałovič, były sakratar CK KPB i siabra revizijnaj kamisii praŭładnaj Kamunistyčnaj partyi Biełarusi, pryniaŭ u kaściole sakramant biežmavańnia (mirapamazańnia) ad mitrapalita Tadevuša Kandrusieviča.
Vałovič — šmathadovy siabra praŭładnaj KPB, jakuju ŭznačalvaje namieśnik staršyni Mienharvykankamu Ihar Karpienka.
U 2012 hodzie Mikałaj Vałovič razam z kamunistam Mikałajem Juščankam źviartaŭsia ŭ sud z pazovam da aktyvistaŭ Maładoha frontu z-za jajek, kinutych aktyvistami ŭ pomnik Leninu na płoščy Niezaležnaści padčas kamunistyčnaha śviata 7 kastryčnika. Niekatory čas Mikałaj Vałovič byŭ pamočnikam Ihara Karpienki, sakratarom Centralnaha kamitetu partyi, ciapier jon siabra revizijnaj kamisii CK KPB. U Maskvie jon uskładaŭ kvietki da pomnika Stalinu i sustrakaŭsia ź lideram rasiejskich kamunistaŭ Hienadziem Ziuhanavym.
Sakramant biežmavańnia (mirapamazańnia) — heta adna ź siami tajamnicaŭ Carkvy, jakuju prymajuć daśviedčanyja, praktykujučyja vierniki.
Prymajučy sakramant, biežmavany abiraje sabie apiekuna spamiž śviatych. Mikałaj Vałovič abraŭ svaim niabiesnym apiekunom vučnia Chrysta, pieršaha biskupa Rymu — śviatoha Piatra.
Mikałaj Vałovič skazaŭ Svabodzie, što nia bačyć supiarečnaściaŭ pamiž kamunistyčnaj idealohijaj i chryścijanskaj vieraj:
«Kali vy pračytajecie prahramu našaj partyi, to pabačycie, što ciapier jana nie spračajecca z carkvoju, my pavažna stavimsia da ŭsich relihijnych kanfesijaŭ. Asabliva da tych, jakija jość u Biełarusi — katalickaj i pravasłaŭnaj cerkvaŭ. I vajaŭničaha ateizmu našaja partyja nie prapavieduje.
Kamunistyčnaja partyja ŭ svoj čas rabiła pamyłki, i kiraŭnictva carkvy taksama rabiła pamyłki. Jan Pavał II pakajaŭsia za hrachi carkvy. Moža, pryjšoŭ čas i kiraŭnictvu partyi pakajacca za hrachi partyi i prymirycca i z Boham, i z carkvoju».
Kamientary