Rasijskija čynoŭniki viarnulisia da idei źnižeńnia paroha biaspošlinnaha ŭvozu tavaraŭ z zamiežnych internet-mahazinaŭ. Ciapier heta 1000 jeŭra ŭ miesiac, a moža stać 22 jeŭra za pasyłku, pišuć «Viedomosti».
Fiederalnaja mytnaja słužba (FMS) nakiravała ŭ Minfin prapanovy źnizić normy biaspošlinnaha ŭvozu tavaraŭ, zakazanych u zamiežnych internet-mahazinach, paviedamiŭ kiraŭnik słužby Andrej Bieljaninaŭ. Isnujučyja normy ŭvozu jon nazvaŭ «zvyšlibieralnymi», jakija «treba panižać». U jakaści prykładu była pryviedziena Biełaruś, što ŭstanaviła padobny da jeŭrapiejskaha paroh biaspošlinnaha ŭvozu — 22 jeŭra za pasyłku.
U Rasii ciapier nie abkładajucca pošlinami pasyłki sumarnym koštam da 1000 jeŭra i vahoj da 21 kh za adzin kalandarny miesiac. Pry pieravyšeńni limitu pošlina składaje 30 pracentaŭ, ale nie mienš jak 4 jeŭra za 1 kh (spahaniajecca z sumy, što pierasiahaje paroh).
U 2015 hodzie Jeŭrazijskaja ekanamičnaja kamisija (JEEK) razhladała niekalki prapanoŭ pa źnižeńni biaspošlinnaha paroha koštu (naprykład, da 150 jeŭra) i vahi (da 10 kh) pasyłak. Jašče adzin varyjant: z pasyłak koštam 22-150 jeŭra spahaniać abaviazkovy zbor 10-15 jeŭra, uvieści fiksavany płaciež u zaležnaści ad koštu pakupki. Tady suprać zboraŭ vystupiŭ Kazachstan, dzie, jak i ŭ Rasii, dziejničaje paroh 1000 jeŭra.
U kanca 2015 hoda namieśnik kiraŭnika FMS Taćciana Halandziejeva zajaviła, što kali pierahavory z Kazachstanam zojduć u tupik, to Rasija zmoža vyrašyć prablemu i sama. Jana vykazała ideju abkłaści internet-zakazy z-za miažy zboram u pamiery 10-15 jeŭra pry košcie pasyłki 22-150 jeŭra.
Prezident Asacyjacyi kampanij internet-handlu Alaksiej Fiodaraŭ (adzin ź inicyjataraŭ dyskusii ab pošlinach) adznačyŭ, što prapanovy FMS nie źmianilisia. «Normy biaspošlinnaha ŭvozu daŭno nieabchodna źnižać, zamiežnyja internet-mahaziny pavinny stać rasijskimi padatkovymi ahientami», — skazaŭ jon.
Kamientary