Ministerstva zamiežnych spraŭ Litvy ŭručyła ambasadaru Biełarusi Alaksandru Karalu notu ŭ suviazi z budaŭnictvam Biełaruskaj AES, paviedamiŭ žurnalistam u Vilni 5 maja kiraŭnik litoŭskaha MZS Linas Linkiavičus.
Nota tyčycca «mahčymaha incydentu na raźmieščanaj u 50 km ad Vilni Astravieckaj atamnaj elektrastancyi», paviedamlaje infarmacyjny partał delfi.lt.
Padstavaj dla vykliku ambasadara ŭ MZS stała infarmacyja, jakuju raźmiaściŭ na svaim sajcie 4 maja telekanał Biełsat. Sa spasyłkaj na ŭłasnyja krynicy Biełsat paviedamiŭ, što ŭ siaredzinie krasavika abrynulisia stojki budynka jadziernaha absłuhoŭvańnia elektrastancyi, jaki budujecca ŭ Astraŭcy. U publikacyi fihuravali fatahrafii abvalenych kanstrukcyj. U administracyi Biełaruskaj AES hetuju infarmacyju abvierhli.
«My adrazu ž, jak tolki atrymali hetuju infarmacyju ź niefarmalnych krynic, stali prymać miery, a siońnia ŭ ministerstva byŭ vyklikany ambasadar Biełarusi, jakomu była ŭručanaja nota z patrabavańniem tłumačeńniaŭ hetaha incydentu abo avaryi, ab inšych mahčymych zdareńniach, jakija zdarylisia da hetaha, pakolki pra heta pišuć biełaruskija ŚMI», — zajaviŭ Linkiavičus.
Pavodle jaho słoŭ, nijakich tłumačeńniaŭ ź biełaruskaha boku pakul nie było. «Ambasadar paabiacaŭ pieradać usiu infarmacyju stalicy, pakul nijakich tłumačeńniaŭ nie było», — skazaŭ kiraŭnik MZS Litvy.
Varta adznačyć, što 3 maja MZS Litvy vystupiŭ z zajavaj, u jakoj zaklikaŭ Biełaruś «jak maha chutčej vykanać patrabavańni MAHATE pa jadziernaj biaśpiecy».
Nahadajem, aficyjnaja Vilnia nieadnarazova zajaŭlała, što Litva nie maje namieru kuplać elektraenierhiju ź Biełaruskaj AES. Z punktu hledžańnia litoŭskaha boku, budaŭnictva stancyi parušaje patrabavańni Kanviencyi ab acency ŭździejańnia na navakolnaje asiarodździe ŭ transhraničnym kantekście, jakaja praduhledžvaje acenku ŭździejańnia abjektaŭ na navakolnaje asiarodździe nie tolki ŭnutry krainy, ale i ŭ sumiežnych krainach.
Ciapier čytajuć
U sacsietkach Chlastova apublikavałasia videa, zapisanaje na vypadak jaho zatrymańnia. Sam śpiavak na Akreścina15
Kamientary