U Mahilovie zatrymany hramadski aktyvist Vaładar Curpanaŭ

Učora ŭ 12.40 Vaładara Curpanava zatrymali ŭ budynku mahiloŭskaj prakuratury, pratrymali va ŭmovach abmiežavańnia voli bolš za 4 hadziny, skłali pratakoł ab administracyjnym pravaparušeńni, pavodle jakoha jon nie padparadkoŭvaŭsia patrabavańniam milicyi. Dzie jon paśla hetaha, dakładna nie viadoma.

Pavialičyć

Učora pozna ŭviečary jahonaj žoncy Irynie pazvaniŭ supracoŭnik milicyi i paviedamiŭ, što Curpanaŭ nibyta ŭ izalatary časovaha ŭtrymańnia. Tak zrazumieła Iryna. A siońnia pravaabaroncy paviedamili, što Vaładar Curpanaŭ noč pravioŭ u Leninskim adździele milicyi. Paśla 11 hadziny pravaabaroncy telefanavali ŭ adździeł milicyi — tam skazali, što Curpanava vyvieźli ŭ izalatar časovaha ŭtrymańnia. Paśla 11-j telefanavała žonka ŭ izalatar časovaha ŭtrymańnia i Leninski adździeł milicyi — tam skazali, što takoha čałavieka ŭ ich niama.

Pavodle žonki aktyvista — Iryny, jamu inkryminujecca niepadparadkavańnie patrabavańniam milicyi. Siońniašniuju noč jon praviadzie ŭ izalatary časovaha ŭtrymańnia. 31 traŭnia jaho buduć sudzić.

Zatrymali Curpanava a 13 hadzinie ŭ budynku prakuratury, kudy jon pryjšoŭ, kab padać skarhu z pratestam na raspačaty suprać jaho raniej administracyjny praces. Pavodle aktyvista, na ŭvachodzie ŭ jaho pačali patrabavać dakumenty i vyśviatlać, čamu jon idzie da pamočnika prakurora.

Curpanaŭ paličyŭ i pieršaje, i druhoje niezakonnym, zapatrabavaŭ knihu skarhaŭ i prapanovaŭ. Achoŭnik, u svaju čarhu, źvinavaciŭ aktyvista ŭ niepadparadkavańni jahonym patrabavańniam.

Bolš jak praz čatyry hadziny paśla zatrymańnia na Vaładara Curpanava skłali pratakoł.

Raniej adnosna aktyvista ŭžo raspačali administracyjny praces, jamu inkryminujuć iłžyvy vyklik milicyi. Vaładar vyklikaŭ milicyju, kali jamu admovilisia ŭ toj ža prakuratury dać knihu skarhaŭ i prapanovaŭ. Hetak śćviardžaje pravaabaronca. U materyjałach hetaj spravy paznačana, što vyklik milicyi byŭ biespadstaŭny.

Vaładar Curpanaŭ bolš jak paŭtara hoda nia maje pracy. Admovy ŭziać jaho na pracu asprečvaje ŭ sudzie.

Kantaktujučy z roznymi ŭstanovami, jon vymušany byŭ adznačać svaje patrabavańni ŭ knizie skarhaŭ i prapanovaŭ. Kali ž knihu nie davali, jon vyklikaŭ milicyju.

Kamentujučy pačatak administracyjnaha pracesu suprać jaho za «iłžyvy vyklik», Vaładar Curpanaŭ dapuskaŭ, što jaho mohuć zatrymać.

«Nie vyklučaju, što mianie vyrašyli krychu neŭtralizavać, jašče j za patrabavańnie pryciahnuć da adkaznaści kiraŭnika spraŭ harvykankamu za pieravyšeńnie paŭnamoctvaŭ pry vyniasieńni rašeńnia ab zabaronie zładzić pikietavańnie ŽREU, jakoje niezakonna admoviła mnie ŭ pracy», — kazaŭ Vaładar Curpanaŭ.

Pavodle aktyvista, na jaho mahli «pakryŭdzicca słužbovyja asoby, na jakich jon pisaŭ skarhi i ad jakich nastojliva patrabavaŭ knihu skarhaŭ i prapanovaŭ».

U Mahilovie Vaładar Curpanaŭ viadomy jak rupliviec i abaronca biełaruskaj movy. Akramia taho, jon damahajecca, kab supracoŭniki kamunalnych słužbaŭ horadu vykonvali svaje abaviazki jak maje być. Svaje patrabavańni jon rehularna paznačaje ŭ knihach skarhaŭ i prapanovaŭ žyllova-ekspluatacyjnych učastkaŭ.

• 0
• 0
• 0
• 0
• 0
• 0
• 0
• 0