U «Harramaŭtadary» raspaviali, čamu ŭ časie «Praśpiekta nacyjanalnaha ściaha» vypraboŭvali «padbor vuhłoŭ skiravańnia strumieniaŭ vady»
Hienieralny dyrektar «Harramaŭtadara» adkazaŭ na zvarot błohiera Antona Matolki ab metazhodnaści ŭborki pr. Niezaležnaści ŭ čas praviadzieńnia akcyi apazicyi 14 maja hetaha hoda.
U hadavinu refierendumu 1995 hoda niekalki dziasiatkaŭ aktyvistaŭ vyjšli na Kastryčnickuju płošču, dzie praviali akcyju «Praśpiekt nacyjanalnaha ściaha». U hety čas kiraŭnictva «Harramaŭtadara» vyrašyła pravieści ŭborku praśpiekta ŭ rajonie, prylehłym da miesca praviadzieńnia akcyi. Supracoŭniki UDAI HUUS abmiežavali ruch transpartu.
Błohier Anton Matolka adpraviŭ zvarot u KDK, u jakim vykazaŭ aściarohu ab «nieefiektyŭnym vykarystańni biudžetnych srodkaŭ».
«Chaciełasia ŭdakładnić metazhodnaść masavaj uborki praśpiekta Niezaležnaści z dapamohaj nie mienš za 8 palivalnych mašyn na ŭčastku ad pierasiačeńnia z vuł. Janki Kupały da pierasiačeńnia z vuł. Lenina. Dla hetaj «uborki» byŭ pierakryty praśpiekt z dapamohaj supracoŭnikaŭ DAI», — napisaŭ Anton.
Taksama jon paprasiŭ nazvać košt uborki, kolki było vydatkavana litraŭ paliva, kolki čałaviek było zadziejničana.
KDK pieranakiravaŭ list u DVA «Harramaŭtadar Minharvykankama». Na jaho adkazaŭ hiendyrektar Dzianis Hlinski.
U adkazie jon paćvierdziŭ praviadzieńnie rabot, ale źviazaŭ ich z aprabacyjaj «upieršyniu ŭstalavanaha na palivamyjnyja mašyny abstalavańnia dla reječnaj vysokanapornaj myjki pakryćciaŭ prajeznaj častki», što, zychodziačy z adkazu, źjaŭlajecca novaj technałohijaj dla našaj krainy.
Kiraŭnik «Harramaŭtadara» udakładniŭ, što ŭ dzień praviadzieńnia akcyi apazicyi «rabiłasia adładka, nałada i rehulavańnie abstalavańnia, vykonvaŭsia padbor i byli vyznačanyja najbolš efiektyŭnyja vuhły skiravańnia strumieniaŭ vady, adlehłaść ad rejki da pakryćcia, nałada pracy pompaŭ, kłapanaŭ i raźmierkavalnikaŭ patokaŭ vady».
Antonu taksama było prapanavana ŭ vypadku niazhody z adkazam abskardzić jaho ŭ sudovym paradku.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary