U Biełarusi płanujecca ŭkaranić sistemu strachavańnia pa biespracoŭi

U pierśpiektyvie ŭ Biełarusi płanujecca ŭkaranić sistemu strachavańnia pa biespracoŭi. Pra heta na pres-kanfierencyi ŭ Minsku 28 červienia paviedamiŭ načalnik upraŭleńnia palityki zaniataści Ministerstva pracy i sacyjalnaj abarony Aleh Takun.

«My nad hetym pracujem, pravodzicca navukova-daśledčaja rabota, i ŭ 2017 hodzie budzie raspracavany i ŭniesieny va ŭrad narmatyŭna-pravavy akt ab nieabchodnaści ŭkaranieńnia sistemy strachavańnia pa biespracoŭi», — skazaŭ čynoŭnik.

Pavodle jaho słoŭ, jašče rana havaryć ab kankretnych miechanizmach, chto budzie vypłačvać uznosy i jak budzie farmiravacca strachavy fond. «Ahulnaja ideja takaja: kali čałaviek pracavaŭ i płaciŭ strachavyja ŭznosy, to pry stracie pracy pa niezaležnych ad jaho pryčynach budzie mieć prava na atrymańnie dapamohi pa biespracoŭi, jakoje pa suśvietnych standartach zabiaśpiečvała b pakryćcio stračanaha zarobku ŭ pamiery da 70%», — paviedamiŭ načalnik upraŭleńnia.

Takun taksama paćvierdziŭ infarmacyju, što dla asobnych katehoryj biespracoŭnych płanujecca pavysić dapamohu da pamieru 100% biudžetu pražytačnaha minimumu. Užo rychtujecca adpaviedny prajekt narmatyŭna-pravavoha akta. «My ŭžo nie adnojčy zajaŭlali, što płany pa pavieličeńni pamieru dapamohi pa biespracoŭi jość. Nami ŭžo padrychtavany i prachodzić apošniaje ŭzhadnieńnie prajekt narmatyŭna-pravavoha akta ab pavyšeńni dapamohi pa biespracoŭi dla biespracoŭnych, jakija stracili pracu ŭ vyniku vyzvaleńnia, skaračeńnia kolkaści štata rabotnikaŭ, likvidacyi pradpryjemstva, da 100% biudžetu pražytačnaha minimumu (na siońnia — 1.699.430 rubloŭ u siarednim na dušu nasielnictva)», — adznačyŭ čynoŭnik.

Pavodle dadzienych Ministerstva pracy i sacyjalnaj abarony, siaredni pamier dapamohi na adnaho biespracoŭnaha ŭ mai 2016 hoda skłaŭ 265,6 tys. rubloŭ, abo 15,4% ad biudžetu pražytačnaha minimumu ŭ siarednim na dušu nasielnictva. Kolkaść biespracoŭnych, zarehistravanych u orhanach pa pracy, zaniatasci i sacyjalnaj abaronie, na kaniec maja 2016 hoda skłała 50,5 tys. čałaviek, što na 12,9% bolš, čym na kaniec maja 2015 hoda, i na 6,1% mienš, čym na kaniec krasavika 2016 hoda.

Uzrovień zarehistravanaha biespracoŭja na kaniec maja 2016 hoda skłaŭ 1,1% ad ekanamična aktyŭnaha nasielnictva (na kaniec maja 2015 hoda — 1%). «Što tyčycca prahnozu pa ŭzroŭni zarehistravanaha biespracoŭja i pieravyšeńnia kolkaści zvolnienych rabotnikaŭ nad pryniatymi (jak paviedamlałasia, za studzień—maj — na 70 tys.). Takaja tendencyja (pieravyšeńnia) zachoŭvajecca apošnija niekalki hadoŭ, ale skaračajecca i kolkaść pracoŭnych resursaŭ. Značnaha rostu ŭzroŭniu zarehistravanaha biespracoŭja my nie čakajem. Pavodle prahnozu — nie bolš za 2%», — skazaŭ śpiecyjalist. Pry hetym jon paviedamiŭ, što nazirajecca źnižeńnie kolkaści zvarotaŭ u słužbu zaniataści i pavieličeńnie popytu na rabotnikaŭ.

• 0
• 0
• 0
• 0
• 0
• 0
• 0
• 0