Z paniadziełka znoŭ, jak i letaś, na ŭsio leta ŭ rajcentry adklučyli haračuju vadu. Padavacca ŭ kvatery jana budzie pa hrafiku tolki dva dni — u subotu i niadzielu.
Ź Miadzieła paskardzilisia, što z paniadziełka znoŭ, jak i letaś, na ŭsio leta ŭ rajcentry adklučyli haračuju vadu. Padavacca ŭ kvatery jana budzie pa hrafiku tolki dva dni — u subotu i niadzielu. «Havorać, u metach ekanomii hazu. Dyk navošta tady ŭ svoj čas kacielniu na jaho z mazutu pieravodzili? A ŭ nas ža kurortny pasiołak! I što, usio leta biez haračaj vady? Kažuć, voziera pobač, ale ž tudy nie nabiehajeśsia pamycca…».
Pa kamentaryi my źviarnulisia da namieśnika staršyni rajvykankamu pa žyllova‑kamunalnaj haspadarcy i budaŭnictvie Valeryja Siarhieja i načalnika adździełu žyllova‑kamunalnaj haspadarki Ivana Siamionava. Vyśvietliłasia, što ad nasielnictva ŭ rajvykankam užo pastupiła šmat skarhaŭ na ŭviadzieńnie takoha hrafiku padačy haračaj vady. Tamu pytańnie budzie razhladacca na sesii 27 traŭnia, u pryvatnaści, rychtujucca prapanovy pavialičyć kolkaść dzion, kali ŭ kvaterach miascovych žycharoŭ budzie źjaŭlacca «ciopleńkaja». Adnak z 2 červienia na dva tydni padača vady budzie ŭvohule spyniena ŭ suviazi sa štohadovymi prafilaktyčnymi rabotami. Tamu navat kali i budzie pryniata stanoŭčaje rašeńnie pavialičyć kolkaść dzion padačy haračaj vady, mieścičy zmohuć heta adčuć nie raniej za siaredzinu pieršaha letniaha miesiaca.
Darečy, letaś za košt adklučeńnia haračaj vady było zekanomlena 160 miljonaŭ rubloŭ. Sioleta, z ulikam padaražańnia «błakitnaha» paliva, prahnoz ekanomii składaje 200 miljonaŭ rubloŭ. Praŭda, «čyścinia» hetaj ekanomii ŭ zajaŭnikaŭ vyklikaje sumnieńnie. Kab mieć haračuju vadu dla bytavych patreb, bolšaść z nas, jak viadoma, pačynaje ŭ takoj sytuacyi karystacca hazam dla jaje padahrevu na plicie.
— Nasielnictva apłačvaje tolki 33,4 pracenta ad koštu kamunalnych pasłuh, a za vykarystany takim čynam haz raźličvajecca pa poŭnym taryfie, — nia zhodny Valeryj Siarhiej.
Pavodle słoŭ Ivana Siamionava, tym nia mienš hazavikam dadziena zadańnie padličyć, nakolki pavialičvajecca spažyvańnie hazu nasielnictvam padčas adklučeńnia haračaj vady. Jak zaznačyŭ dalej Ivan Ivanavič, pierajści znoŭ na miascovyja vidy paliva nierealna: treba budavać asobnaje pamiaškańnie, ustanaŭlivać asobny kacioł, narychtoŭvać heta samaje paliva.
— My razumiejem niezadavolenaść nasielnictva, jakoje za dva hady ŭžo pryzvyčaiłasia zaŭsiody mieć haračuju vadu, — skazaŭ Valeryj Ramanavič naprykancy razmovy. — Dy i dla abstalavańnia lepš, kali jano pracuje bieśpierapynna. Tamu, paŭtarusia, usie hetyja pytańni buduć abmierkavany ŭ bližejšy čas i pryniata kankretnaje rašeńnie.
Kamientary