Dvoje mužčynaŭ abražali nacyjanalnyja simvały i ŭdzielnikaŭ pikietu pa zbory podpisaŭ pa vyłučeńniu ŭ deputaty pałaty pradstaŭnikoŭ pieršaha namieśnika staršyni Ruchu «Za Svabodu» Jurasia Hubareviča, a potym ździejśnili napad na pikietoŭščykaŭ. Milicyja zatrymała pravakataraŭ.
«Dvoje mužčynaŭ vypivali la kramy na vulicy Kalinoŭskaha, la jakoj stajaŭ i naš pikiet», — raspavioŭ sajtu Pyx.by siabra inicyjatyŭnaj hrupy Aleś Słavinski.
Pa jahonych słovach, u niejki momant jany padyšli da pikietu i pačali abražać pikietoŭščykaŭ i nacyjanalnyja simvały. Adzin ź ich dva razy ŭdaryŭ siabru inicyjatyŭnaj hrupy Alaksandra Rusieviča.
Alaksandr apisaŭ čałavieka, jaki napaŭ na jaho, jak mažnoha čałavieka hadoŭ 25, z tatuiroŭkami.
«Mužčyny mocnaha ciełaskładu, mahčyma, miascovyja žychary, mahčyma pravakatary», — dadaŭ Aleś Słavinski.
Udzielniki pikietu vyklikali milicyju, jakaja zatrymała chulihanaŭ i skłała pratakoł. Na miesca zdareńnia taksama pryjechaŭ pradstaŭnik Śledčaha kamitetu.
Adznačym, pravakacyi na pikietach u padtrymku Jurasia Hubareviča adbyvajucca dva dni zapar. 9 lipienia para napadpitku pačała pravakavać na kanflikt pikietoŭščykaŭ na vuł. Kalinoŭskaha, la HC «Uschod».
«Para balzakaŭskaha ŭzrostu ŭsiełasia niepadalok ad pikietu i pačała raśpivać ałkaholnyja napoi. Žančynu zacikaviła kolki nam zapłacili, kab my pačali stajać pad bieł-čyrvona-biełym ściaham», — raspavioŭ sajtu Pyx.by siabra inicyjatyŭnaj hrupy Mikita Siemianienka.
Potym, pa jahonych słovach, da jaho «padlacieŭ mužčyna i pačaŭ pravakavać na bojku, abražajučy mianie, biełaruskuju movu i našuju krainu».
«Usio adbyvałasia pad kamierami handlovaha centru, tamu lubaja ahresiŭnaja reakcyja z majho boku mahła być vykarystanaja suprać zborščykaŭ podpisaŭ za Hubareviča. Ja sprabavaŭ pierakanać čałavieka vieści siabie kulturna, ale mužčyna tolki i praciahvaŭ kryčać, byccam my chočam u Biełaruś pryvieści NATA i pradacca amierykancam», — dadaŭ Siemianienka.
Pa jahonych słovach, pravakacyju zaŭvažyli chłopcy spartovaha ciełaskładu, jakija źniešnie nahadvali futbolnych fanataŭ. «Adzin z chłapcoŭ spytaŭ u pjanoha mužčyny, čamu jon nas pravakuje, i prapanavaŭ adyjści parazmaŭlać za ŭniversam. Pjany pakryčaŭ jašče krychu, a paśla uciok», — zaklučyŭ siabra Ruchu «Za Svabodu».
Pieršy namieśnik staršyni Ruchu «Za Svabodu» Juraś Hubarevič vyłučajecca ŭ deputaty pa Kalinoŭskaj vybarčaj akruzie Minska.
Kamientary