Siamja Bryla praihnaruje adkryćcio doški pa baćku

Siońnia ranicaj dačce Janki Bryla Halinie patelefanavali z upraŭleńnia kultury Mienharvykankamu i paviedamili, što zaŭtra na domie №78 pa praspekcie Mašerava budzie ŭstanoŭlena memaryjalnaja doška. (U hetym domie klasyk našaj litaratury žyŭ apošnija dvanaccać hadoŭ pierad śmierciu. Ciapier u dvuchpakajovaj kvatery Janki Bryla žyvuć abiedźvie dočki piśmieńnika.)

Na rospyty Haliny Bryl, a jakoj hadzinie adbudziecca adkryćcio doški, chto budzie ŭdzielničać u hetaj cyrymonii, joj paviedamili, što samu došku prymacujuć da ściany da 12 hadzin, a jaje ŭračystaje adkryćcio adbudziecca ŭ 12.30. Adkryvać ža došku buduć «ludzi z Sajuzu piśmieńnikaŭ». U adkaz na pytańnie spn.Haliny, ź jakoha piśmieńnickaha sajuzu buduć tyja ludzi, joj nazvali proźviščy Mikałaja Čarhinca, Uładzimiera Hniłamiodava i Alaksandra Žuka (nia błytać z prazaikam Alesiem Žukom).

Halina Bryl zajaviła pradstaŭnicy ŭpraŭleńnia kultury, što jana na cyrymoniju adkryćcia memaryjalnaj doški nia pryjdzie. Druhaja dačka Janki Bryla — Natalla Siemaškievič — ciapier znachodzicca na leciščy svajho baćki ŭ pasiołku Kryničnaje Karelickaha rajonu i taksama nia maje namieru udzielničać u adkryćci memaryjalnaj doški. Syn piśmieńnika, kandydat fizyka‑matematyčnych navuk Andrej Bryl, zajmajecca ciapier daśledavańniami ŭ Japonii i maje namier pryjechać na radzimu 30 traŭnia.

Litaraturny krytyk Anatol Sidarevič, jaki 41 hod viedaŭ Janku Bryla asabista, tak tłumačyć fakt admovy dačok Janki Bryla ŭdzielničać u adkryćci memaryjalnaj doški:

«Bryl da kanca dzion naležaŭ da Sajuzu biełaruskich piśmieńnikaŭ i nie ŭvachodziŭ u «pravilny» Sajuz piśmieńnikaŭ Biełarusi. Pa‑druhoje, Mikałaj Čarhiniec udziełam u cyrymonii adkryćcia doški jaŭna prymazvajecca da imia našaha klasyka. Treba pamiatać, što mienavita ad Čarhinca ŭ mnohim zaležała, ci buduć pachavanyja žonka Janki Bryla i sam piśmieńnik u Miensku. Ułady nie dazvolili pachavać spadaryniu Ninu Bryl na Kalvaryi, jak taho prasiŭ jaje muž. Nina Michajłaŭna była pachavanaja ŭ Kałodziščach. Tam — pobač ź joju — znajšoŭ viečny spačyn i naš klasyk. Tak ułada, i ŭ tym liku Čarhiniec, abrazili vydatnaha dziejača biełaruskaj kultury, veterana druhoj usiaśvietnaj vajny (a Bryl vajavaŭ z 1 vieraśnia 1939 hodu) i ŭdzielnika partyzanskaha paradu 1944 hodu ŭ Miensku. Abražana była i ŭsia siamja Bryloŭ. Viadoma, dobra, što ŭłada adčyniaje došku, ale ŭznačalić hetuju cyrymoniju jana daručyła nie tamu čałavieku. I hetym, znoŭ‑taki, abražaje pamiać Janki Bryla.

• 0
• 0
• 0
• 0
• 0
• 0
• 0
• 0