Cukierbierh razdaje biaspłatny internet. A ŭ Biełarusi budzie?
Mark Cukierbierh paviedamiŭ pra pieršy paśpiachovy palot samalota Aquila na soniečnych batarejach. Hetyja bieśpiłotniki mohuć razdavać internet u addalenyja i małazasielenyja rajony płaniety. Aquila raspracoŭvaŭsia 2 hady. U minułym hodzie Facebook pačaŭ testavyja paloty partatyŭnych madelaŭ, a 28 červienia hetaha hoda ŭ štacie Aryzona adbyŭsia pieršy palot užo hatovaha poŭnapamiernaha latalnaha aparata.
Samalot moža znachodzicca na vyšyni 18 kiłamietraŭ i razdavać internet na terytoryju z dyjamietram 60 kiłamietraŭ. Soniečnyja paneli na kryłach siłkujuć 225-kiłahramovyja batarei na praciahu dnia, što dazvalaje dronu praciahvać palot i razdavać internet navat nočču i ŭ pachmurnaje nadvorje. Samalot pavinien pryziamlacca tolki kožnyja 90 dzion — dla techničnaha absłuhoŭvańnia.
Aquila maje nievialikuju spažyvanuju mahutnaść u 5000 Vat. Heta ekvivalentna mahutnaści troch zvyčajnych fienaŭ dla vałasoŭ.
Sami ž bieśpiłotniki atrymlivajuć dostup da internetu ź ziamnoj pavierchni pry dapamozie łaziera.
Ci pabačym my hetyja drony ŭ Biełarusi? Nie, nie pabačym. Cukierbierh adznačyŭ, što taki sposab dostupu da internetu dobry dla małazasielenych i addalenych rehijonaŭ płaniety (pustyni, džunhli, nievialikija vyspy). Ekanamična niemetazhodna dla niekalkich socień čałaviek budavać asobnuju viežu mabilnaj suviazi albo pravodzić optavałakonnuju sietku, lepiej zapuścić adzin bieśpiłotnik. A voś u rehijonach z narmalnaj i vysokaj ščylnaściu nasielnictva, da jakich adnosicca Biełaruś, vykarystańnie dronaŭ nieracyjanalnaje — praściej układać hrošy ŭ kłasičnyja naziemnyja kanały suviazi.
Kamientary