Uładzisłaŭ Hančaroŭ: piać faktaŭ pra alimpijskaha čempijona i jaho čaroŭnuju dziaŭčynu
Druhim biełaruskim miedalistam u Rya-2016 staŭ batutyst Uładzisłaŭ Hančaroŭ. «Naša Niva» sabrała cikavyja fakty pra alimpijskaha čempijona.
Małady čempijon
Biełaruskamu spartsmienu 20 hadoŭ, jon naradziŭsia ŭ Viciebsku. Cikava, što pieršaj pryziorcy Rya-2016, ciažkaatletcy Darji Navumavaj, jaho adnahodka.
Na čempijanacie śvietu 2014 hoda Uładzisłaŭ byŭ bronzavym pryzioram, a ŭ 2015 hodzie — srebranym.
Byli miedali i ŭ sinchronnych skačkach, i ŭ kamandnym zaliku. Škada tolki, što ŭ skačkach na batucie niama spabornictvaŭ u mikście (heta kali ŭ pary vystupajuć mužčyna i žančyna). Bo tady b u Hančarova dakładna atrymałasia čempijonstva, tamu što…
Dziaŭčyna — kaleha pa zbornaj
…Voś užo piać hadoŭ kachańnie Uładzisłava — Hanna Harčonak. Ich ramantyčnuju historyju možna ličyć słužbovym ramanam, bo dziaŭčyna taksama zajmajecca skačkami na batucie. Prapanova sustrakacca pryjšła Hańnie pa elektronnaj pošcie.
U Rya-2016 24-hadovaja spartsmienka taksama prabiłasia ŭ finał, zaniaŭšy šostaje miesca ŭ kvalifikacyi! Ale ŭ vyrašalny momant padčas pryziamleńnia vylecieła na mat i zastałasia biez uznaharodaŭ.
Uznaharodzie lubimaha čałavieka jana paradujecca ledź nie macniej, čym svajoj. «Mužčyna pavinien być napieradzie ŭ lubym razie. Rana ci pozna daviadziecca syści ŭ cień, usio ž žančyna — heta pieradusim siamja», — kaža dziaŭčyna.
Niaŭdały himnast
«U šeść hadoŭ baćki addali mianie ŭ spartyŭnuju himnastyku, dzie litaralna praz try miesiacy mnie vynieśli prysud — bieśpierśpiektyŭny. Nakštałt nie chapała hnutkaści i raściažki. Ale ja šparkim byŭ, i mianie vyrašyli pasprabavać u skačkach na batucie. Tak ja trapiŭ da treniera-pačatkoŭca Viciebskaj SDIUŠAR №2 Volhi Ułasavaj. A jakomu dziciaci nie spadabajecca skakać na batucie? Heta adrenalin, pačućcio palotu — kłasna! Nie vielmi padabałasia, praŭda, patrabavalnaść treniera, jakaja prymušała vykonvać kankretnyja zadańni. Pryznajusia, časam chaciełasia kinuć sport. Tamu što paśla ciažkich trenirovak prychodziŭ damoŭ ledź žyvy i ničoha bolš rabić nie chacieŭ. U takija chviliny nie raz łaviŭ siabie na dumcy: i navošta mnie heta treba? Ale adpačnieš — i nazaŭtra znoŭ śpiašaješsia ŭ zału», — raskazvaŭ u intervju Uładzisłaŭ.
Prahmatyčny ramantyk
«Uład — čałaviek bolš prahmatyčny, tym bolš my praktyčna ŭvieś čas razam — doma, na treniroŭkach, na zborach. Atrymlivajecca, u nas usio žyćcio — sucelnaje spatkańnie. Ale jon viedaje, čym mianie paradavać. Kinder-siurpryzy — maja daŭniaja słabaść. O, heta pačućcio niečakanaści! I voś Uład pieryjadyčna prezientuje mnie ich u vielizarnych kolkaściach. U mianie takaja vialikaja kalekcyja!» — raskazvaje Hanna Harčonak.
Maryć stać kasmanaŭtam
Dziakujučy spartyŭnaj karjery, Uładzisłaŭ šmat padarožničaje. U Italii jaho ŭraziła architektura, u Šviejcaryi — pryroda, a ŭ Kitai — absłuhoŭvańnie i kultura.
Adkazvajučy ŭ intervju na pytańnie pra svaju maru, chłopiec raskazaŭ adrazu niekalki idej. Uładzisłavu chočacca samastojna kiravać samalotam i skoknuć z parašutam. Ale bolš za ŭsio — stać kasmanaŭtam.
U finale Alimpijady Hančaroŭ zaniaŭ pieršaje miesca, atrymaŭšy 61,745 bała. Jon abyšoŭ kankurentaŭ z Kitaja, Japonii i Rasii.
Na cyrymonii ŭznaharodžvańnia Hančaroŭ, takoje ŭražańnie, chvalavaŭsia macniej, čym padčas vystupu.
I jon pračuła śpiavaŭ biełaruski himn, stojačy na pjedestale.
A paśla pakaštavaŭ miedal na zub. Jakoje jano — zołata ).
Kamientary