Litva razhladaje mahčymaść vystavić Biełarusi sudovy isk z-za ekanamičnych aśpiektaŭ i pytańniaŭ biaśpieki budaŭnictva Biełaruskaj AES pad Astraŭcom (Hrodzienskaja vobłaść), zajaviŭ 26 žniŭnia na radyjo LRT ministr enierhietyki Litvy Rokas Masiulis.
«Biełaruś buduje z najmienšymi vydatkami, Łukašenka skazaŭ, što heta budzie samaja tannaja AES u śviecie, — cytuje litoŭskaha čynoŭnika partał navin Delfi. — Jany nie budujuć sarkafah, my miarkujem, što na joj buduć rasijskija sistemy achovy, nie zachodnija, što budzie značna tańniejšym. Heta aznačaje, što isnuje niesumlennaja ekanomija vydatkaŭ za košt biaśpieki. My pačynajem ŭvažliva raźbiracca z hetym pytańniem, ja ŭžo paprasiŭ jurystaŭ dać acenku, ci niama tut padstavy dla spravy suprać Biełarusi — čysta kamiercyjnaj spravy, spravy ab dempinhu, ab tym, što budaŭnictva atamnaj stancyi viadziecca va ŭmovach niesumlennaj i vialikaj ekanomii vydatkaŭ».
Litoŭskamu infarmahienctvu BNS Masiulis zajaviŭ, što padparadkavanaje jamu ministerstva choča vyśvietlić, ci nie parušaje Biełaruś mižnarodnyja normy pry budaŭnictvie AES. «My chočam vyvučyć pravavyja akty i pahladzieć, ci nie parušaje Biełaruś mižnarodnyja normy ŭ płanie vydatkaŭ, kankurencyi, i, mahčyma, jość inšyja elemienty, jakija my jašče nie razumiejem. My chočam pahladzieć na budaŭnictva ŭ Astraŭcy praz pravavuju pryzmu, da hetaha času heta nie rabiłasia», — rastłumačyŭ ministr.
«Našu ŭvahu pryciahnuli pastajannyja zajavy pra tannaść hetaj AES, my chočam pahladzieć, ci niama elemientaŭ dempinhu. Kali Biełaruś pabuduje svaju atamnuju stancyju, jany mohuć niesumlenna kankuravać ź inšymi AES», — dadaŭ čynoŭnik.
U červieni hetaha hoda, paviedamlaje Delfi, litoŭski ŭrad zaćvierdziŭ płan embarha na elektraenierhiju, vypracavanuju na BiełAES i šerahu abjektaŭ inšych krain. Zhodna z hetym dakumientam litoŭskaja zona elektraenierhietyčnaj biržy Nord Pool pačnie abmiažoŭvać impart vyrablenaj na AES pad Astraŭcom elektraenierhii ŭ Litvu i inšyja krainy Jeŭrasajuza ŭ 2018 hodzie, kali, jak płanujecca, budzie zapuščany pieršy reaktar Biełaruskaj atamnaj elektrastancyi.
U lipieni hetaha hoda na budplacoŭcy AES zdaryŭsia incydent, pra jaki stała viadoma tolki praz dva tydni z paviedamleńniaŭ u sacsietkach i ŚMI. 10 lipienia padčas vyprabavalnaj ustanoŭki korpusa reaktara 330-tonny ahrehat sarvaŭsia i ŭpaŭ z vyšyni ad dvuch da čatyroch mietraŭ. Rasijski bok spačatku paśpiašaŭsia abvierhnuć hetuju infarmacyju, ale Minenierha Biełarusi pryznała, što na stancyi była «niaštatnaja situacyja». Nieŭzabavie i pradstaŭniki dziaržkarparacyi «Rasatam» paviedamili, što pry pieramiaščeńni korpusa reaktara jon «praśliznuŭ pa stropach i pavis dyjahanalna, dakranuŭšysia da ziamli».
Paśla hetaha incydentu Litva, jakaja na praciahu apošnich hadoŭ krytykuje budaŭnictva AES la svaich miežaŭ, nakiravała Biełarusi čarhovuju notu i zapytała vyniki rasśledavańnia padziej. Litoŭskija ŭłady prapanavali Minsku stvaryć mižnarodnuju kamisiju ekśpiertaŭ dla analizu vynikaŭ hetaha rasśledavańnia i davańnia rekamiendacyj, paprasili aktyŭnaha ŭmiašańnia ES u vyrašeńnie pytańnia jadziernaj biaśpieki, važnaha dla ŭsiaho rehijona, a taksama źviarnulisia da kiraŭnictva MAHATE z prośbaj udzielničać u rasśledavańni hetaha i inšych incydentaŭ, što zdarylisia na budoŭli stancyi.
Zhodna z rašeńniem biełaruskaha boku korpus reaktara budzie zamienieny.
Kamientary