Ekołah: Zajava Minenierha pra try śmierci na budaŭnictvie AES — cyničnaja

Namieśnik ministra enierhietyki pryznaŭsia, što za čas budaŭnictva atamnaj elektrastancyi ŭ Astraŭcy adbyłosia 10 nadzvyčajnych zdareńniaŭ. Zahinuła 3 čałavieki, daviałosia nakiravać na zamienu korpus samoha reaktara. Da taho ž nie ścichajuć sprečki nakont samoha budaŭnictva AES. Situacyju prakamientavała ekołah Taćciana Novikava.

— Taćciana, vy jak ekśpiert viedajecie, jakija nastupstvy dla navakolnaha asiarodździa niasie budaŭnictva AES. Dastatkova ŭzhadać, što vy byli ŭ składzie ŭradavaj kamisii, jakaja pryniała rašeńnie prypynić na 10 hadoŭ raspracoŭki ŭ halinie atamnaj enierhietyki ŭ Biełarusi. Tym nie mienš, budaŭnictva idzie poŭnaj chadoj i supravadžajecca skandałami. I sprava navat nie ŭ korpusie reaktara, jaki zvaliŭsia na ziamlu, a ŭ samim miescy, dzie viadziecca budaŭnictva.

— Śpiecyjalisty pryznali hetuju placoŭku nieprydatnaj jašče ŭ 1994 hodzie. Adnym z hetych śpiecyjalistaŭ byŭ akademik Michalevič, jaki pastaviŭ svoj podpis pad dakumientam. To bok placoŭka była niespryjalnaja, jana była słaba daśledavanaja. Budaŭnictva infrastruktury dla AES było raspačataje ŭ 2009 hodzie. I ŭ 2010-m była hatovaja acenka ŭździejańnia na navakolnaje asiarodździe, u jakoj havaryłasia, što jašče nie skončanyja hieałahičnyja daśledavańni placoŭki.

To bok daśledavańni placoŭki byli skončanyja paźniej, čym było raspačataje samo budaŭnictva.

Drenna i toje, što placoŭka znachodzicca ŭ niepasrednaj blizaści ad Vilni. Vilnia — bujny horad, stalica susiedniaj dziaržavy. I 40 kiłamietraŭ ad pryharadaŭ Vilni da stancyi — vielmi małaja adlehłaść. Pa ŭsich paramietrach placoŭka nieprydatnaja i niebiaśpiečnaja.

— Žurnalistam nie raz raspaviadali pra niejkija parušeńni technałahičnych normaŭ, pra šmatlikija niaščasnyja vypadki, nadzvyčajnyja situacyi. Zajaŭlajuć pra troch zahinułych, ale ludzi kažuć, što ich bolš. Što tam nasamreč adbyvajecca?

— Budaŭnictva reaktarnaha budynku pieršaha enierhabłoku pačali 31 maja 2012 hoda, kali jašče nie było architekturnaha prajektu.

Dniami namieśnik ministra enierhietyki Michaił Michadziuk na sumiesnaj pres-kanfierencyi ź litoŭskim bokam skazaŭ, što ahułam było 10 niaščasnych vypadkaŭ i tolki 3 śmierci. Heta vielmi, na moj pohlad, cyničnaja zajava, bo nam viadoma pra bolšuju kolkaść zahinułych.

Naprykład, ja viedaju, što sioleta zahinuła ŭlikoŭščyca, jakaja pracavała na placoŭcy. Jana zahinuła pad kołami samazvału. Heta akramia tych troch vypadkaŭ, jakija pieraličyŭ Michadziuk. Pavodle našych źviestak, zahinuła bolš ludziej. Toje, što Minenierha nie vałodaje infarmacyjaj pra hetyja vypadki, kaža ab tym, što rasśledavańni pa hetych vypadkach nie viaducca. Jość šmatlikija i surjoznyja parušeńni.

• 0
• 0
• 0
• 0
• 0
• 0
• 0
• 0