Chto zahinuŭ u internacie ŭ Łuhanskaj vobłaści, kudy prylacieła ŭkrainskaja rakieta? Užo nazvanyja imiony 18 achviar

U noč na 22 maja Uzbrojenyja siły Ukrainy nanieśli ŭdar pa šerahu abjektaŭ na terytoryi akupavanaj Łuhanskaj vobłaści.

Pavodle zajavy Hienieralnaha štaba USU, u vyniku ataki byŭ paškodžany «adzin sa štaboŭ padraździaleńnia «Rubikon» u rajonie horada Starabielsk».

«Rubikon» — heta zasakrečanaje padraździaleńnie Ministerstva abarony Rasii, jakoje śpiecyjalizujecca na bieśpiłotnikach i rehularna nanosić udary pa mirnym nasielnictvie i hramadzianskich abjektach va Ukrainie.

Adnak rasijski bok śćviardžaje, što nasamreč udar pryjšoŭsia pa budynkach Łuhanskaha šmatprofilnaha piedahahičnaha kaledža i internata pry im. U ŚMI publikujuć kadry nastupstvaŭ ataki.

Kaledž źjaŭlajecca filijałam Łuhanskaha dziaržaŭnaha piedahahičnaha ŭniviersiteta. Tut rychtujuć pa 15 śpiecyjalnaściach — ad kuchara i śpiecyjalista industryi pryhažości da nastaŭnika pačatkovych kłasaŭ i śpiecyjalista pa kampjutarnych sistemach.

Na bolšaść śpiecyjalnaściaŭ prymajuć paśla 9 kłasa. U rasijskaj sistemie adukacyi heta nazyvajecca «asnoŭnaja ahulnaja adukacyja». Navučańnie ŭ takim vypadku zajmaje ad 2 hadoŭ 10 miesiacaŭ da 3 hadoŭ 10 miesiacaŭ. Heta značyć, što kali abituryjent pastupaje ŭ 15 hadoŭ, to zakančvaje kaledž prykładna ŭ 18—19 hadoŭ.

Dla tych, chto pastupaje paśla 11 kłasa («siaredniaja ahulnaja adukacyja»), navučańnie doŭžycca kala 10 miesiacaŭ. U takim vypadku vypusknikam zvyčajna spaŭniajecca 18 hadoŭ.

Hetyja padliki važnyja ŭ kantekście zajaŭ, jakija prahučali paśla ataki.

Kiraŭnik tak zvanaj «ŁNR» Leanid Pasiečnik paviedamiŭ, što na momant udaru ŭ internacie nibyta znachodzilisia bolš za 80 čałaviek va ŭzroście ad 14 da 18 hadoŭ. Jon taksama apublikavaŭ śpisy zahinułych, paranienych i tych, čyjo miescaznachodžańnie nibyta zastajecca nieviadomym. 

Pavialičyć

U śpisie zahinułych — 17 čałaviek. Siarod ich troje chłopcaŭ va ŭzroście 20—21 hoda, astatnija — dziaŭčaty, małodšaj ź jakich było 19 hadoŭ.

Kali pašukać u sacsietkach ich staronki, to možna znajści bolšaść z maładzionaŭ. Šmat chto ź ich «Ukantakcie» ŭvachodziŭ u supołku taho samaha łuhanskaha kaledža. Mnohija junaki apošni raz byli anłajn u noč na 22 maja — čas vybuchu.

Ukrainski Hienštab admaŭlaje, što cellu ŭdaru byŭ kaledž abo internat. Adnak źviestki z adkrytych krynic, u tym liku spadarožnikavyja zdymki, śviedčać, što ŭ vyniku ataki byli razburanyja budynki navučalnaj ustanovy i adnaho ź internataŭ.

Zasnavalnik rasśledavalnickaj hrupy Conflict Intelligence Team Rusłan Levijeŭ pryvodzić dźvie najbolš vierahodnyja viersii taho, što adbyłosia.

Pieršaja — u budynkach kaledža sapraŭdy moh raźmiaščacca niejki abjekt, źviazany z padraździaleńniem «Rubikon». Pavodle Levijeva, sam fakt taho, što havorka idzie pra navučalnuju ŭstanovu, jašče nie vyklučaje vykarystańnia jaje budynkaŭ u vajennych metach.

Druhaja viersija — pamyłka pry vyznačeńni celi. Heta mahło aznačać, što ŭkrainski bok sapraŭdy celiŭsia ŭ vajskovy abjekt, ale raźviedka niedakładna vyznačyła jaho miescaznachodžańnie.

Pry hetym Levijeŭ ličyć małavierahodnaj viersiju pra śviadomy naŭmysny ŭdar Ukrainy pa vyklučna hramadzianskim abjekcie z padletkami.

• 7
• 1
• 0
• 4
• 2
• 30
• 2
• 1