Razborki ŭ Minskaj vobłaści: biznesmiena zastrelili kala doma i spalili ŭ jahonym aŭtamabili
Na vyjeździe ź Bierazina Minskaj vobłaści ranicaj znajšli spaleny aŭtamabil z trupam na miescy kiroŭcy. Na miescy trahiedyi, jakaja adbyłasia ŭ 7.00, da hetaha času pracujuć ekśpierty, śledčyja, milicyja i MNS.
«Miascovy biznesmen vyjechaŭ z doma, u jaho jość dom na ŭskrainie la lesu. Jaho tam niepadalok tarmaznuli, zastrelili, mašynu padpalili. Mima jechaŭ miascovy pažarny na pracu, bačyć, staić mašyna, ź jaje dym idzie, adčyniŭ dźviery, pabačyŭ cieła, pasprabavaŭ jaho dastać, pa im ź lesu stralać pačali, kab adahnać ad mašyny. Jon u mašynu, pa hazach i ŭ milicyju», — paviedamiŭ TUT.BY miascovy žychar Vadzim.
Pa słovach jašče adnaho miascovaha, pryjaciela Vadzima, uvahu vyratavalnika, jaki prajazdžaŭ mima, pryciahnuŭ dym z-pad kapota Audi Q5. Kala aŭtamabila mužčyna ŭbačyŭ «čałavieka z padpalenaj anučaj, jaki kinuŭ jaje na kapot i ŭciok u les».
Padobna na toje, jaho napałochaŭ vyratavalnik — u jakoha sapraŭdy stali stralać ź lesu, kažuć krynicy. Ale jon, pa słovach miascovych, mužčynu ŭ aŭtamabili ŭžo ničym by nie dapamoh, navat kali b paśpieŭ dastać — u sałonie aŭto byŭ trup z ahniastrelnymi ranieńniami.
Miascovyja kažuć, što zahinułaha viedaje ŭvieś horad: mužčyna byŭ vielmi zamožnym pradprymalnikam. U Bierazinie ŭsie trymajucca viersii zakaznoha zabojstva.
Aficyjnych kamientaroŭ pakul niašmat.
— U 7.09 nam paviedamili, što na vyjeździe ź Bierazina na trasie Barysaŭ — Bierazino — Babrujsk haryć adkrytym połymiem aŭtamabil. Supracoŭniki RAUS razam z kalehami ź inšych viedamstvaŭ znajšli ŭ sałonie trup mužčyny. Jaho asoba pakul nie ŭstanoŭlena, — paviedamiŭ pres-sakratar UUS Minabłvykankama Jaŭhien Sačak.
Vyratavalnikam pra zdareńnie paviedamili na chvilinu raniej: «Padraździaleńni MNS vyjechali na miesca i apieratyŭna patušyli aŭtamabil, jaki hareŭ adkrytym połymiem. U sałonie byŭ znojdzieny trup mužčyny», - paviedamiŭ pres-sakratar MNS Vital Navicki.
— Na miescy zdareńnia pracuje śledča-apieratyŭnaja hrupa. Ustaloŭvajucca abstaviny śmierci mužčyny, trup jakoha byŭ znojdzieny ŭ sałonie zharełaha aŭtamabila, - paviedamiła aficyjny pradstaŭnik USK pa rehijonie Taćciana Biełanoh.
Ciapier čytajuć
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja16
Kamientary