Kroŭ na parašutach: u Afrycy drony buduć dastaŭlać zamovy na stancyi pieralivańnia

U Ruandzie zapuścili nacyjanalnuju sistemu dastaŭki kryvi pry dapamozie dronaŭ. Bieśpiłotniki, sprajektavanyja kalifarnijskim startapam Zipline, pačnuć pierasyłać kroŭ da 21 stancyi pieralivańnia ŭ Zachodniaj Ruandzie, dzie darohi i miedycynskaja infrastruktura žadajuć lepšaha. Urad Ruandy budzie płacić amierykanskaj kampanii za kožnuju dastaŭku. Tamu možna ličyć, što heta pieršaja ŭ śviecie rehularnaja bieśpiłotnaja kamiercyjnaja słužba dastaŭki, paviedamlaje BBC.

Zipline i ruandyjski ŭrad anansavali pačatak supracoŭnictva jašče na pačatku hoda. Niekalki miesiacaŭ jany patracili na testavańnie sistemy ŭ rehijonie Muhanha.

Pavialičyć

Słužba dastaŭki składajecca z 15 dronaŭ Zips, jakija mohuć latać na adlehłaść da 150 kiłamietraŭ u dva baki i pieranosić da 1,5 kiłahrama kryvi. Špitali mohuć zamaŭlać kroŭ praz tekstavyja paviedamleńni, i ŭžo praz 15 chvilin jana spuścicca z drona na parašucie.

Pavialičyć

Technałohii dastaŭki dronami aktyŭna raźvivajucca ŭ ZŠA, ale ich ukaranieńnie tarmozicca tym, što ŭłady nie paśpieli raspracavać zakanadaŭstva, jakoje rehulavała b hetuju novuju śfieru. Ruanda vyrašyła skarystacca situacyjaj, adaptavała zakony i zaprasiła da siabie amierykanskija startapy, jakija zajmajucca vytvorčaściu dronaŭ. Da 2020 hoda Ruanda płanuje pabudavać śpiecyjalny aeraport dla dronaŭ.

Zipline śćviardžaje, što sabiekošt kožnaj pierasyłki kryvi dronam prykładna adpaviadaje koštu aŭtamabilnaj pierasyłki, ale dron dazvalaje značna aščadzić čas, što krytyčna važna pry dastaŭcy kryvi.

Na siońnia dastaŭka kryvi moža ažyćciaŭlacca na terytoryi płoščaj 18 tysiač kvadratnych kiłamietraŭ, na jakoj žyvie kala 7 miljonaŭ ruandyjcaŭ. Naleta Zipline płanuje ažyćciaŭlać dastaŭku kryvi i va Uschodniuju Ruandu. Taksama amierykanski startap supracoŭničaje z fondami Biła Hiejtsa, kab u budučym sistema dronaŭ mahła, akramia kryvi, dastaŭlać vakcyny i inšyja miedykamienty.

«Nie dumajcie, što my źbirajemsia z dapamohaj dronaŭ dastaŭlać tolki kroŭ. Heta było b hetak ža absurdna, jak budavać u Ruandzie aŭtamahistrali, na jakich mahli b jeździć tolki ružovyja aŭtamabili. Kaniečnie, hetuju infrastrukturu ŭ budučyni možna budzie vykarystoŭvać dla roznych rečaŭ, niekatoryja ź jakich my možam pradkazać, a niekatoryja — nie», — adznačyŭ kiraŭnik Zipline Kieler Rynaŭda (Keller Rinaudo).

U 2017 hodzie amierykanski startap pačnie dasyłać kroŭ i miedykamienty ŭ addalenyja i viaskovyja rajony štataŭ Merylend, Niavada i Vašynhton. Amierykanskija kampanii Matternet i Flirtey taksama płanujuć zapuścić padobnuju słužbu dastaŭki kryvi i miedykamientaŭ dronami.

• 0
• 0
• 0
• 0
• 0
• 0
• 0
• 0