U čempijonaŭ kvadratnyja jajki

Napiaredadni pieršaha paŭfinała da mianie pryjechali hości — hišpaniec i niemka. Patelefanavaŭ siabar i skazaŭ, što pastaviŭ 50 dalaraŭ na toje, što zbornaja Rasii stanie pieramožcam pieršynstva Staroha Śvietu. Usie navokał tolki i kazali, što pra revanš zbornaj Chidynka nad Hišpanijaj dy pra finał Turcyja — Rasija. JEŬRA było ŭ zienicie.

Hety Čempijanat Jeŭropy staŭ sapraŭdy futbolnym. Futboł — heta kali pierad pačatkam hulni ty ničoha nie možaš skazać nakont kančatkovaha vyniku. Futboł — heta kali situacyja na poli dyjamietralna mianiajecca za paru chvilin. Futboł — heta kruhły miač, bolš za dva dziesiatki ambitnych mužykoŭ dy niepradkazalnyja niejrony ŭ hałavie arbitra. Futboł — heta ŭspaciełyja dałoni pamočnikaŭ sudździ, što ściskajuć ściažok, jaki ledź ci nie kožny zaŭziatar maryć ubačyć u adnym miescy, sami zdahadajciesia — čyim. Futboł — heta ślizkaje pole i nievialikija kupinki na im, jakija mohuć vyrašać vialikija futbolnyja losy, prosta krychu źmianiŭšy palot futbolnaha snarada. Futboł — heta kali ty hulaješ da apošniaj siekundy i jašče trochi bolej.

Turki byli hodnyja finała. I jany b tudy trapili, kali b ich bramnik Riušciu, jak kažuć u dvaravych batalijaj, «kryŭ bližni». Chočaš być jeŭrapiejskim čempijonam — łavi miač. Usio prosta. Nadta ž chaciełasia, kab turki praleźli ŭ finał — nastolki fantastyčna‑nierealnymi byli ich «kambeki» ŭ razborkach sa słavianskimi zbornymi — spačatku z čechami, a paśla ŭ čverćfinale z charvatami. Što ž, fart skančvajecca — i heta taksama futboł. I zbornaja Niamieččyny ŭ finale — taksama futboł.

A Rasija čakała, čakała, čakała… Hišpancam prahnazavali taki žorstki revanš, što možna było navat nie vychodzić na pole. Paśla čverćfinalnaha tryjumfu zbornaj Rasii nad Niderłandami ruskim JEŬRA było pa kalena. Ale čakaŭ zbornuju Chidynka chałodny duš — i navat hety supier‑trenier ničoha nie zdoleŭ zrabić z zapłanavanym pireniejskimi bykami adklučeńniem haračaj vady. Hulni hišpancaŭ z našymi ŭschodnimi susiedziami skłali pałovu bujnych pieramohaŭ, zafiksavanych na Čempijanacie Jeŭropy. I ŭsio adno ruskija — małajcy. Chacia ŭ finał im jašče było ranavata.

I voś — jano. Pieršyja asoby dźviuch dziaržavaŭ — Mierkiel i Sapatera — žyŭcom hladziać hulniu. Niemcy nastupajuć — plaskaje ŭ ładki Anhieła, hišpancy łupiać mima — šlopaje siabie pa kalency Chose Łuis. Viesieła! Pieršy tajm — adno dychańnie. Futboł, jakim jon pavinien być. I simpaciaha Torres zabivaje. «Nu, zaraz pačniecca» — pranosicca sałodkaja dumka ŭ hałavie. 1:1, 2:1, 2:2, a tam…. A tam toj samy futbolny ekstaz — kali milimietry vyrašajuć, kolki ludziej atrymajuć infarkty ŭ Madrydzie, Sarahosie dy jakoj‑niebudź malupasieńkaj Vilja‑Romaredzie i kolki «Jehiermajsteru» paljecca rakoj ad Kila da Miunchiena. Albo naadvarot, tolki z roźnicaj u nazvach napojaŭ.

Dy tolki nie atrymałasia intryhi. Zanadta mocna «Čyrvonaja furyja» chacieła vyjhrać Čempijanat Jeŭropy — apošni raz jana rabiła heta ažno 44 hady tamu. «Futbolnyja impatenty» — tak nazyvali złaśliŭcy zbornuju Hišpanii, jakaja ŭžo kolki hadoŭ na top‑turnirach biassłaŭna vylatała zadoŭha da finalnych matčaŭ. A kali vas časta nazyvajuć impatentam, to, zhadziciesia, chočacca pryludna prademanstravać advarotnaje. Tak, doŭha nie dumajučy, i zrabili hadavancy amal siamidziesiacihadovaha Łuisa Arahanesa. Hoł Torresa staŭ adzinym u hulni, chacia jašče paračku mahli biednamu Lemanu i zasunuć. A niemcam ŭsio ž jašče treba patreniravacca hulać u tatalny futboł — zanadta doŭha jany praktykavali svoj admysłovy suchi niamiecki.

Kali hišpancam niešta ŭdajecca, jany kažuć: «U nas jość jajki». «Kvadratnyja!» — uściešana udakładniaje niechta daścipny. I sapraŭdy, kab atrymać šeść pieramohaŭ u šaści matčach na JEŬRA prostych budzie nie dastatkova. Treba kvadratnyja.

Paśla finalnaha śvistka strašna zachaciełasia kudy‑niebudź na madrydzkija vulicy — mahčyma tamu, što ja zaŭsiody adčuvaŭ niejkija ahulnyja rysy pamiž našaj i ichniaj mientalnaściami. Hišpancy daviali prynamsi ŭsioj Jeŭropie, što jany niešta mohuć. Mahčyma, i našaja družyna kamu‑niebudź chutka što‑niebudź daviadzie?.. Naprykład, na Čempijanacie śvietu ŭ Paŭdniovaj Afrycy praz dva hady. Chacia dla nas pieršaja płanačka pakul — prosta trapić na jaki‑kolviek top‑turnir…

…Ja sadziŭ svaich haściej — hišpanca i niemku — na bierlinski ciahnik u dzień finała. Da pačatku hulni zastavałasia kala siami hadzin. Jany paprasili pasłać im sms‑paviedamleńnie pra vynik finalnaha akkorda JEŬRA — dvuboju Niamieččyny i Hišpanii. Praź dzieviać hadzinaŭ ja dasłaŭ im: «Hišpanija vyjhrała 1‑0». I pastaviŭ smajlik.

Bahdan Arłoŭ, Biełaruskija naviny

• 0
• 0
• 0
• 0
• 0
• 0
• 0
• 0