Biełarus Siarhiej Tkačoŭ uvajšoŭ u skład naziralnaj rady PAT «Bryncałaŭ-A». Pra heta havorycca ŭ paviedamleńni rasijskaj kampanii dla inviestaraŭ, piša tut.by.
«Jon pracuje ŭ Bryncałava ŭžo niekalki miesiacaŭ. Prapanavali dobryja ŭmovy. Kuryruje vytvorčaść u Biełarusi», — raspavioŭ znajomy Tkačova.
Šmathadovy pamočnik Alaksandra Łukašenki pa ekanamičnych pytańniach apošnija 4 hady pracavaŭ u sistemie mašynabudaŭničaha chołdynhu «Amkador». Jon byŭ namieśnikam hiendyrektara i hiendyrektaram. Ale ŭ bolšaj stupieni znachodziŭsia ŭ cieni. Pieryjadyčna publikavaŭsia ŭ dziaržSMI c žorstkaj krytykaj libierałaŭ. Vystupaŭ za viartańnie stalinskich mietadaŭ rehulavańnia ekanomiki.
Ekscentryčny rasijski biznesmen Uładzimier Bryncałaŭ užo daŭno ź pieramiennym pośpiecham viadzie biźnies u Biełarusi. U svoj čas jaho kampanija «MSP-ojł» była davoli prykmietnym hulcom u pastaŭkach rasijskaj nafty na biełaruskija NPZ i jaje nastupnaj pierapracoŭki na davalnickich umovach. Zatym naftavyja dachody inviestavała ŭ stvareńnie vytvorčaści miedpreparataŭ. Pavodle ŭkazu Łukašenki rasijski biznesmen atrymaŭ dziaržpradpryjemstva «Dyjalek» jak majomasny kompleks dla jaho raźvićcia. Ale dalej za słovy sprava nie pajšła. Ciapier bryncałaŭskaja kampanija «Fierejn» naładziła na mahutnaściach «Dyjaleka» vytvorčaść lekaŭ.
Kamientary