Google raspaviała, što šukali biełarusy ŭ 2016 hodzie. Vyniki ŭražvajuć
Tradycyjna ŭ kancy hoda Google prezientavała vynikovy rejtynh samych papularnych pošukavych zapytaŭ biełarusaŭ.
Top-zapyty hetaha hoda kažuć pra cikavaść biełarusaŭ da sieryjałaŭ, TB-šou i sportu.
Samym papularnym zapytam hoda ŭ Biełarusi staŭ novy siezon sieryjała «Fizruk», nastupnym radkom idzie druhi siezon sieryjała «Mažor».
Biełaruskija karystalniki Google aktyŭna šukali infarmacyju pra mižnarodny konkurs pieśni «Jeŭrabačańnie-2016», a taksama spartyŭnyja padziei: Jeŭra-2016, čempijanat śvietu pa chakiei i Alimpijskija hulni - 2016.
U katehoryi «Piersona hoda» pieršuju pazicyju zaniaŭ pieramožca prezidenckich vybaraŭ u ZŠA — Donald Tramp. Biełarusy šukali infarmacyju pra pamierłych znakamitaściaŭ — brytanskaha akciora Ałana Rykmana i jaho suajčyńnika rok-śpievaka Devida Boŭi, a taksama cikavilisia junaj zorkaj YouTube Mis Keci i ŭdzielnikami Jeŭrabačańnia-2016 — pieramožcaj Džamałaj i pradstaŭnikom Rasii Siarhiejem Łazaravym, a taksama zabitym Paŭłam Šaramietam.
Z filmaŭ biełarusaŭ bolš za ŭsio zacikaviła ekranizacyja komiksu «Atrad samahubcaŭ». Taksama ŭ pieršuju dziasiatku ŭvajšli błokbastar «Dedpuł» i kamiedyja «Samy lepšy dzień», multfilmy «Tajnaje žyćcio chatnich žyvioł» i «Źvierapolis», a taksama kinastužka «Vyžyły», rola ŭ jakoj pryniesła Leanarda Dzi Kaprya pieršy Oskar.
Z zapytaŭ u katehoryi «Sieryjał hoda» napieradzie - treci siezon kamiedyi «Fizruk» i druhi epizod kryminalnaha detektyva «Mažor». Taksama siarod samych papularnych u biełarusaŭ — novyja siezony «Maładziožki», «Hulni Tronaŭ» i «Internaŭ».
«Pakupkaj hoda» ŭ 2016 hodzie, zhodna z zapytam biełarusaŭ, stała kvatera ŭ Minsku. Taksama siarod samych papularnych zapytaŭ u dadzienaj katehoryi: telefon, kalaska b/u, šyny i rovar.
Kamientary