«Pamiarkoŭnyja» biełarusy dahetul zbolšaha pryzvyčailisia prymianšać svaje zasłuhi. Nie napoŭnilisia vulicy Minska ščaślivymi tvarami sa ściahami ani, prykładam, paśla treciaj pieramohi Darji Domračavaj na Alimpijadzie ŭ Sočy, ani paśla pieramohi BATE nad hroznaj «Bavaryjaj». Vidać, u sercach i hałovach hramadzian maładoj biełaruskaj dziaržavy ŭsio jašče daśpiavaje paŭnavartasnaje pačućcie samapavahi.
My ž uvažliva prasačyli za pośpiechami biełarusaŭ u pieršym miesiacy 2017-ha ŭ samych roznych śfierach. Padstavaŭ hrymnuć na ŭvieś śviet nie było, ale kab dzieści dadać «ja taksama ź Biełarusi» — udostal.
Biełaruskaja aplikacyja dla sełfi Fabby atrymała inviestycyj na sumu $2 młn
Letaś tolki lanotnik nie pisaŭ pra pośpiech biełaruskich raspracoŭščykaŭ dadatku MSQRD, jaki ŭrešcie vykupiŭ Facebook Marka Cukierbierha. Hety ž hod pačynajecca z naviny pra inviestycyi ŭ 2 młn dalaraŭ u novy prajekt suzasnavalnika Maps.me Juryja Mielnička — mabilny dadatak Fabby, jaki dazvalaje mianiać fon sełfi.
Biełaruski prajekt trapiŭ u top-10 novych hadžetaŭ ad USA Today
Pa vynikach vystavy Consumer Electronics Show, što prachodziła ŭ Łas-Viehasie, aŭtarytetnaje vydańnie USA Today apublikavała ŭłasny top-10 novych hadžetaŭ. U prestyžny śpis trapiŭ i biełaruski prajekt Kino-mo Hypervsn pa raspracoŭcy hałahrafičnych ekranaŭ.
Upieršyniu ŭ historyi «Dakara» biełarusy stali šostymi ŭ samaj ciažkaj honcy
Biełaruskija honščyki pakazali na rali-rejdzie «Dakar-2017» najlepšy vynik za ŭsiu historyju svaich vystupaŭ. «Na siońnia MAZ — adzin z najlepšych aŭtamabilaŭ u śviecie. Kankurencyju nam składajuć tolki KamAZ i Iveco. Možna skazać, što my prabilisia ŭ elitu suśvietnaha aŭtasportu», — padsumavaŭ vyniki honki piłot i kiraŭnik kamandy «MAZ-SPORTaŭta» Siarhiej Viazovič.
Fotaprajekt minčanki trapiŭ na staronki italjanskaha Vogue
Suśvietnaviadomy časopis pra modu dla žančyn z bolš čym sa stahadovaj historyjaj źmiaściŭ na svaich staronkach u siecivie śviežy fotaprajekt biełaruski Taćciany Kieža Static Rush. I heta nie pieršaje źjaŭleńnie niestandartnych zdymkaŭ minčanki ŭ papularnym hlancy.
Biełaruś upieršyniu ŭ historyi pieramahła Vienhryju i vyjšła ŭ płej-of čempijanatu śvietu pa handbole
I nieistotna, što adbyłosia paśla. U toj viečar spartyŭnyja forumy strakacieli ščaślivymi kamientarami-vinšavańniami: zhaładaŭsia biełaruski zaŭziatar na pieramohi ŭ hulniavych vidach sportu na najvyšejšym uzroŭni. Dla maładoj kamandy Juryja Šaŭcova 1/8 finała pakul akazałasia stollu.
Biełaruskija astranomy trapili ŭ kiembrydžski padručnik
Biełaruskija astranomy publikujuć fotazdymki Miesiaca ŭ salidnaj knizie Shoot The Moon brytanskaha ŭniviersiteta.
Žanočaja zbornaja Biełarusi (U-21) pa indarchakiei stała srebranym pryzioram ČIE
Indarchakiej — častka niealimpijskaj prahramy, kštałtu chakieju na travie, tolki ŭ zakrytych pamiaškańniach. Biełaruskija junijorki na čempijanacie Jeŭropy pa hetym vidzie sportu ŭ Vienie sastupili češskim adnahodkam tolki ŭ finale, i tolki ŭ sieryi štrafnych kidkoŭ.
Anton Kušnir pieramoh na etapie Kubka śvietu pa łyžnaj akrabatycy ŭ ZŠA
Cudoŭny kambek vydaŭ alimpijski čempijon Sočy Anton Kušnir. Paśla trochhadovaj paŭzy ŭ spabornictvach frystajlist iznoŭ uziaŭsia štampavać pieramohi. Miesiac tamu Kušniru nie było roŭnych u kitajskim Bejda-Łejk, a ciapier 32-hadovy spartoviec fajna vystupiŭ u amierykanskim Łejk-Płesidzie.
«Naša Niva» — bastyjon biełaruščyny
PADTRYMAĆCiapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary