Kab pakrucić ponažy ŭ abciakalnych kokanach, padviešanych da «niabiesnaj darožki», u Novuju Zelandyju prylatajuć tysiačy ludziej. Jany, zrešty, dumajuć, što zabaŭlajucca. A voś stvaralnik niezvyčajnaj systemy pierakanany — jany vypraboŭvajuć pratatyp transpartu budučyni.
Nad prapracoŭkaj detalaŭ hetaha prajektu vynachodnik Džefry Barnet pracavaŭ šeść hadoŭ. Žorstkija koły j stalovy šlach — spałučeńnie, jakoje minimizuje supraciŭleńnie kačeńniu. Pa idei, na takoj darozie možna raźvivać vialikuju chutkaść bieź viailikich vysiłkaŭ.
Sami kapsuły majuć nievialikuju płošču papiaročnaha siačeńnia, tamu vydatki siedaka na pieraadoleńnie aeradynamičnaha supraciŭleńnia nievialikija.
Asablivych abmiežavańniaŭ na «kiravańnie» Shweeb'am niama. Hałoŭnaje, kab vaš rost byŭ bolšym za 1,4 metra.
Siońnia Shweeb ujaŭlaje ź siabie dva 200‑metrovyja padviasnyja šlachi. Zakalcavanyja, jany biahuć poruč na vyšyniach ad dvuch da čatyroch metraŭ i časam pieraplatajucca.
Pad hetymi darohami raźmiaščajucca dźvie prazrystyja kapsuły na adnaho pasažyra, jon ža — kiroŭca, i jon ža — ruchavik.
Kali krucić ponažy z usiaje mocy, možna razahnacca da 45 km/h.
I tut, miarkuje Barnet, usie mohuć pierakanacca ŭ perspektyvach prajektu. Svoj turystyčny atrakcyjon jon ličyć palihonam dla transpartnaj systemy budučyni.
Heta maje być razhalinavanaja sietka monarejek, haliny ad jakoj praviedzieny prosta ŭ damy. Paśniedaŭšy, jaki‑niebudź biznesoviec spuskajecca na druhi pavierch, dzie jaho čakaje svabodny kokan Shweeb'a. Čałaviek siadaje ŭ prazrystuju kabinku j pa strełcy ŭlivajecca ŭ hałoŭnuju arteryju, jakaja viadzie, naprykład, u centar horadu.
Tut cełyja čarody kapsułaŭ iduć ustyč adna da adnoj (dla źmiakčeńnia ŭdaraŭ pry stykoŭcy kapsuły abstalavanyja amartyzatarami), ekanomiačy enerhiju na supraciŭleńnie pavietra.
Pry nabližeńni da patrebnaj stancyi biznesoviec prytarmažvaje j pa strełcy sychodzić z asnoŭnaj darohi ŭ svoj ofisny budynak.
Aŭtar hetaj systemy transpartu nia kaža, jak arhanizavać ruch kapsuł pa strełkach, pieraadolvać istotnyja pierapady vyšyniaŭ u hornych haradach, płacić za kokany; prystasavać ich da mocnaj śpioki ci marozu. Ale ideja zasłuhoŭvaje ŭvahi, ci nia tak?
Nijakich vychłapaŭ, šumu, płaty za parkoŭku, skryžavańniaŭ. Plus — spadarožny fitnes, a da taho ž vysiłkaŭ i nervaŭ — kudy mieniej, čym kali jechać na zvyčajnym rovary pa haradzkich vulicach.
Bartnet adznačaje, što takija viełakapsuły mohuć być hramadzkimi, a nie asabistymi. Lubuju ź ich, kali jana nie patrebnaja, možna pakinuć na specyjalnaj parkoŭcy.
Sama monarejka, kaža jaje vynachodnik, robicca nieskładana, kaštuje niadoraha j zajmaje minimum miesca ŭ «pavietranaj prastory» horadu.
«Śviet čakaje hetaha transpartu», — ličyć Bartnet.
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja12
Kamientary