Paśla narady ŭ Łukašenki ekanomika raście druhi miesiac zapar

Pavodle pieršaj acenki, vałavy ŭnutrany pradukt Biełarusi ŭ studzieni-krasaviku 2017 hoda ŭ biahučych cenach skłaŭ 30,6 młrd rubloŭ i vyras u paraŭnańni z anałahičnym pieryjadam 2016 hoda na 0,5%. Pra heta havorycca ŭ paviedamleńni Nacyjanalnaha statystyčnaha kamiteta (Biełstat).

Indeks-deflatar VUP za čatyry miesiacy 2017 hoda ŭ adnosinach da anałahičnaha pieryjadu papiaredniaha hoda skłaŭ 106,9%.

Pavodle źviestak Biełstata, abjom pramysłovaj vytvorčaści za studzień-krasavik vyras na 5,4% da 28,2 młrd rubloŭ. Abjom sielhasvytvorčaści pavialičyŭsia na 2,1% da 3,1 młrd.

Urad Biełarusi zhodna z prahnozam sacyjalna-ekanamičnaha raźvićcia krainy raźličvaje na rost VUP na 0,2% pa vynikach pieršaha paŭhodździa 2017 hoda i na 1,7% pa vynikach 2017 hoda ŭ cełym.

***

14 sakavika na naradzie ŭ Alaksandra Łukašenki abmiarkoŭvali padrychtoŭku da pašyranaj spravazdačy ŭrada. Jaje płanavałasia pravieści paśla atrymańnia dadzienych za I kvartał, kab mieć mahčymaść abjektyŭna analizavać pracesy, jakija adbyvajucca, a nie tolki zychodziačy z vynikaŭ 2016 hoda. «My možam sprahnazavać i pahladzieć, jak u nas raźvivajucca padziei. Ja adkryta pra heta kažu, kab nie zdaryłasia tak, što my dzieści pakrytykujem dobra ŭrad, prymiem niejkija zachady pa ŭradu, a na samaj spravie dynamika stanoŭčaja», — adznačyŭ Łukašenka, źviartajučysia da staršyni Biełstata Iny Miadźviedzievaj.

3 krasavika ministr ekanomiki Uładzimir Zinoŭski pryznaŭsia žurnalistam, što skaračeńnie pastavak rasijskaj nafty ŭ Biełaruś nie dazvalaje našaj krainie vykanać prahnozny pakazčyk VUP za pieršy kvartał. «My sabie prahnazavali na pieršy kvartał 99,6% VUP (u adnosinach da anałahičnaha pieryjadu minułaha hoda). Ale jość źniešnija i ŭnutranyja faktary. U pryvatnaści, my nie zrabili dastatkova naftapraduktaŭ i kab nie zahruzili svaje zavody. I tamu stracim dźvie-try dziasiatyja», - skazaŭ ministr. Praz dva tydni Biełstat paviedamiŭ, što VUP u pieršym kvartale pavialičyŭsia na 0,3%. Pa vynikach pieršych dvuch miesiacaŭ biełaruskaja ekanomika asieła na 1%. Naroščvańnie abjomaŭ pastavak rasijskaj nafty ŭ Biełaruś pačałosia z 14 krasavika.

Na dumku analitykaŭ mižnarodnych finansavych instytutaŭ, recesija ŭ biełaruskaj ekanomicy budzie naziracca i ŭ 2017 hodzie.

U MVF ličać, što VUP Biełarusi ŭ hetym hodzie źnizicca na 0,8%. Suśvietny bank prahnazuje źnižeńnie realnaha vałavoha ŭnutranaha praduktu Biełarusi na 0,4%. JEABR i JEBRR prahnazujuć padzieńnie na 0,5%.

• 0
• 0
• 0
• 0
• 0
• 0