Piśmieńnica Śviatłana Aleksijevič, laŭreatka litaraturnaha Nobela, usio ž taki naviedaje Homiel. I maje adbycca heta 7 lipienia. Pra heta siońnia skazaŭ hramadzki aktyvist Uładzimier Kacora, pahutaryŭšy ź piśmieńnicaj, paviedamlaje Svaboda.
«Śviatłana Alaksandraŭna pahadziłasia pryjechać u Homiel i sustrecca ź ziemlakami ŭ hramadzka-palityčnym centry na vulicy Paleskaj, 52. Pryncypovaja damova była j raniej, a siońnia my kančatkova abhavaryli farmat sustrečy. Na žal, sustreča moža adbycca tolki ŭ abmiežavanym režymie, pa zaprašeńniach. Z pryčyny zdaroŭja piśmieńnica nia moža vystupić u našym amfiteatry na vulicy, dzie źmiaščajecca kala trochsot čałaviek. A pamiaškańnie kanferenc-zali nievialikaje, moža źmiaścić sama bolš šeść dziasiatkaŭ čytačoŭ. My, kaniečnie, pahadžajemsia na lubyja ŭmovy, zručnyja najpierš dla samoj piśmieńnicy. I vielmi ŭdziačnyja joj za zhodu», — kaža Kacora.
U telefonnaj razmovie Aleksijevič paćvierdziła svoj vizyt u Homiel, skazaŭšy, što maje pravieści tut tolki adnu sustreču. I mienavita na Paleskaj, 52.
Raniej mierkavałasia, što ŭ Homli Śviatłana Aleksijevič sustreniecca ź ziemlakami jašče i ŭ abłasnoj biblijatecy. Pra takuju sustreču damoviŭsia staršynia Homielskaha adździaleńnia Sajuzu biełaruskich piśmieńnikaŭ Anatol Baroŭski. Była navat abviestka. Ale dyrektarka biblijateki Maryna Rafiejeva, na vialikaje ździŭleńnie taho ž Baroŭskaha dy mnohich žycharoŭ abłasnoha centru, stała admaŭlacca, tłumačyć žurnalistam, što z adździaleńniem Sajuzu biełaruskich piśmieńnikaŭ była damova tolki pra «mahčymaść takoj sustrečy, a nie pra samuju sustreču».
Ziemlaki ź miastečka Kapatkievičy Pietrykaŭskaha rajonu, dzie Śviatłana Aleksijevič skončyła siaredniuju škołu, taksama žadajuć bačyć svaju vybitnuju adnaklaśnicu ŭ ścienach rodnaj škoły. Na pačatku lipienia tut źbirajucca na supolnuju sustreču vypuskniki 1965 hodu.
«Heta była b fantastyka, kali b Śviatłana pryjechała ŭ Kapatkievičy», — nie chavaje radaści školnaja siabroŭka Aleksijevič Nadzieja Koržyk.
Dyrektarka škoły Natalla Kamnackaja i zavuč Natalla Kalićka paćvierdzili rehijanalnamu kiraŭniku Biełaruskaj asacyjacyi žurnalistaŭ Anatolu Hatoŭčycu, jaki apiakujecca sustrečaj, što zaŭsiody rady pryniać vybitnuju vypusknicu škoły jak samuju darahuju hościu. Była b tolki na toje zhoda samoj Śviatłany Aleksijevič.
Ciapier čytajuć
Unučki Łukašenki paśpiachova zamacavalisia ŭ Rasii6
Kamientary