Žycharka Hancavič (Bresckaja vobłaść) asudžana na piać hadoŭ za naŭmysnaje zaražeńnie partnioraŭ VIČ-infiekcyjaj, paviedamili BiełTA ŭ prakuratury Hancavickaha rajona.
Sudovaje pasiadžeńnie nad miascovaj žycharkaj prachodziła ŭ zakrytym režymie. Jana abvinavačvałasia ŭ ździajśnieńni złačynstva pa č.3 st.157 KK Biełarusi (zaražeńnie VIČ). Žančyna asudžana na piać hadoŭ pazbaŭleńnia voli z adbyvańniem pakarańnia ŭ kałonii ahulnaha režymu. Pry vyniasieńni prysudu sud Hancavickaha rajona ŭličyŭ, što ŭ jaje na ŭtrymańni znachodziacca dvoje niepaŭnaletnich dziaciej. Prysud nie ŭstupiŭ u zakonnuju siłu i moža być abskardžany ŭ vyznačanym zakonam paradku.
Jak paviedamlałasia, žycharka Hancavič viedała pra najaŭnaść VIČ-infiekcyi z 2011 hoda. Tady ž jaje papiaredzili pra zabarony, źviazanyja z prafiłaktykaj raspaŭsiudžvańnia zachvorvańnia, a taksama pra kryminalnuju adkaznaść za ich parušeńnie. Tym nie mienš žančyna na praciahu peŭnaha času ŭstupała ŭ pałavuju suviaź, nie papiaredziŭšy partnioraŭ ab svaim dyjahnazie. U vyniku dvoje mužčyn byli infikavanyja.
Adzin z paciarpiełych daviedaŭsia pra zachvorvańnie vypadkova. Jaho žonka padčas pastanoŭki na ŭlik pa ciažarnaści zdała analiz na VIČ, jaki akazaŭsia stanoŭčym. Daśledavańnie kryvi muža pakazała toj ža vynik. Hetaja historyja pasłužyła pačatkam śledstva. Vyśvietliłasia, što mužčyna mieŭ suviaź ź fihurantkaj zadoŭha da žanićby. Nieŭzabavie śpiecyjalisty znajšli i druhoha paciarpiełaha.
Kamientary