U efiry STB u siužecie pra biełaruski patryjatyzm zamazali «Pahoniu», bieł-čyrvona-bieły i ŭkrainski ściahi
Pieršy dośvied zdymkaŭ na dziaržaŭnym kanale dla kiraŭnika kultplacoŭki «Art Siadziba» i kramy «symbal.by» Paŭła Biełavusa staŭ, na žal, admoŭnym. Na tok-šou Jahora Chrustalova «Što adbyvajecca?», jakoje pryśviacili modzie na patryjatyzm, jaho zaprasili ŭ jakaści paŭnavartasnaha ŭdzielnika, adnak u vyniku ŭsie «niedobranadziejnyja» kadry pry mantažy byli vyrazany ci zamazany. Što ž adbyłosia?
Zdymki pieradačy Staličnaha telebačańnia adbylisia 29 červienia, a ŭ efir jana vyjšła 2 lipienia, akurat na «Dzień vyšyvanki».
«Ja pajšoŭ na heta šou pierš za ŭsio tamu, što zvyčajna tam praduhledžvajecca farmat debataŭ. Mnie chaciełasia raskazać pra našy prajekty, skarystacca mahčymaściu i davieści hledačam, što nielha dzialić žurnalistaŭ i piśmieńnikaŭ na svaich i čužych, stvarać dni vyšyvanki pravilnyja i niapravilnyja. Treba pracavać razam. Toje ž samaje možna skazać pra simvały: ludzi padzialilisia na bieł-čyrvona-biełych i čyrvona-zialonych, i heta niapravilna. Bieł-čyrvona-bieły ściah i «Pahonia» — heta našy pieršyja simvały, pad jakimi Biełaruś atrymała niezaležnaść, pad jakimi Alaksandr Łukašenka prymaŭ prysiahu — nie treba pra heta zabyvacca», — Pavieł Biełavus nie chavaje, što rasčaravany vynikam svajho debiutu na dziaržtelebačańni.
Pavieł chacieŭ raskazać u efiry jašče šmat čaho inšaha, ale mikrafon trapiŭ jamu ŭ ruki tolki adzin raz. I navat toje, što atrymałasia vymavić, parezali. Jak i šmat inšych «niapravilnych» vykazvańniaŭ ad haściej-adnadumcaŭ Biełavusa. U kadry ž pra kramu Biełavusa, akramia bieł-čyrvona-biełych ściahoŭ, zamazali ukrainski aficyjny.
Spadar Biełavus kaža, što paśla hetaha vypadku naŭrad ci prymie zaprašeńnie pryjści na padobnaje dziaržaŭnaje šou ŭ budučyni: «Siužet ža atrymaŭsia cikavy, tema była aktualnaja, ale ŭ vyniku sami redaktary STV usio sapsavali».
Darečy, heta ŭžo nie pieršy vypadak zamazvańnia pradukcyi symbal.by u ŚMI. Hod tamu cenzura «Anłajniera» ŭ artykule pra aŭtamabilnuju avaryju nie prapuściła na sajt fotazdymak ź bieł-čyrvona-biełym ściaham, jakija visieŭ na mašynie ŭ ramkach akcyi «BČB-mabil».
U dyrekcyi infarmacyjnaha viaščańnia STB patłumačyć situacyju pakul nie zdoleli. Spadziajemsia atrymać kamientar paźniej.
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary