Alaksandr Łukašenka, prymajučy siońnia z dakładam staršyniu Kamiteta dziaržaŭnaha kantrolu Leanida Anfimava nakont prajekta ŭkaza «Ab mierach pa ŭdaskanaleńni kantrolnaj (nahladnaj) dziejnaści», zapatrabavaŭ adyści ad praktyki nieabhruntavanych pravierak biznesmienaŭ.
«My abmiarkoŭvali i damaŭlalisia, što piarojdziem ad karnaha ŭchiłu našaj kantrolnaj dziejnaści na prafiłaktyčnuju pracu. My zrobim asnoŭny akcent na prafiłaktycy pravaparušeńniaŭ, adydziem ad płanavych pravierak (choć jany ŭ vas zastanucca — płan jość płan), zrušyć akcent na vybaračnyja pravierki. Ja zaŭsiody heta patrabavaŭ: praviarajcie kaho chočacie, ale ŭ vas pavinny być padstavy, kankretnyja pryčyny taho, što vy pryjšli na pradpryjemstva, da biznesmena, fizičnaj abo jurydyčnaj asobie. I kali takija padstavy jość - kali łaska, idzicie», — skazaŭ Alaksandr Łukašenka.
Adnak kali pradstaŭniki kantrolnych orhanaŭ praviarajuć biespadstaŭna abo padstavy nie paćviardžajucca, jany pavinny za heta adkazvać. «A to tak možna prydumać roznaha rodu padstavy, pryjści - fakty nie paćvierdzilisia, i nichto za heta nie adkaža. Pa-mojmu, u hetym narmatyŭnym pravavym akcie akcentaŭ na hetym niama. Źviarnicie na heta ŭvahu. Nijakich ščylin być nie pavinna», - padkreśliŭ kiraŭnik krainy.
Na jaho dumku, taksama nieabchodna skaracić kolkaść padstaŭ dla pryznačeńnia pazapłanavych pravierak. «Nie treba tam kučy hetych padstaŭ: zachaciełasia — pajšoŭ praviarać. Pavinny być vyrazna paznačanyja padstavy i abstaviny hetych pravierak», - źviarnuŭ uvahu kiraŭnik dziaržavy.
Ciapier čytajuć
U archivach SBU znajšlisia dakumienty, jak savieckija śpiecsłužby zavierbavali emisara AUN, ale ŭkrainskaje padpolle heta vykryła i zabiła zdradnika33
Kamientary