Pieršamu kiraŭniku adnoŭlenaj Litvy Vitaŭtasu Łandśbierhisu ŭ sieradu spoŭniłasia 85 hadoŭ.
Jon naradziŭsia ŭ 1932 h. u siamji architektara Vitaŭtasa Łandśbierhisa-Žamkialnisa i doktara-akulista Ony Jabłanskicie-Łandśbierhienie, jakoj za ratavańnie jaŭrejaŭ muziejem Jad-Vašem było prysvojena zvańnie Praviednika śvietu.
U 1969 h. Vitaŭtas Łandśbierhis abaraniŭ kandydackuju dysiertacyju pa mastactvaznaŭstvie pa muzyčnaj tvorčaści Čurlonisa, z 1978 h. — prafiesar Vilenskaj kansiervatoryi, byŭ zasłužanym dziejačam mastactvaŭ Litoŭskaj SSR, napisaŭ 150 knihaŭ, niekalki pra Čurlonisa, niekalki zbornikaŭ vieršaŭ. Hanarovy staršynia litoŭskaj Šachmatnaj fiederacyi.
Z 1988 h. Vitaŭtas Łandśbierhis uznačaliŭ «Sajudzis» (Demakratyčny ruch za pierabudovu ŭ Litvie), byŭ abrany deputatam Viarchoŭnaha Savieta SSSR. 11 sakavika 1990 h. pad jaho kiraŭnictvam Viarchoŭny Saviet Litoŭskaj SSR pryniaŭ Dekłaracyju ab adnaŭleńni niezaležnaści, a sam Łandśbierhis byŭ abrany staršynioj VS. U pieryjad jaho kiravańnia Litva zdoleła adbicca ad ekanamičnaj błakady SSSR. Taksama ŭznačalvaŭ Siejm Litvy ŭ 1996—2000 hh., byŭ deputatam Jeŭraparłamienta.
Što praŭda, siońniašni Siejm Litvy admoviŭsia aficyjna nadać Łandśbierhisu status pieršaha kiraŭnika dziaržavy (prezidenta).
«Prafiesar źjaŭlajecca histaryčnaj asobaj, simvałam našaj niezaležnaści i epochi voli. Jon čałaviek, jakoha viedaje śviet, i jaho imia viadoma ŭ śviecie. Jon zaŭsiody byŭ i budzie pieršym kiraŭnikom dziaržavy. Nichto — ni statusy, ni zakony, ni usialakija machinacyi - nikoli nie źmienić histaryčnaha značeńnia hetaha čałavieka dla Litvy, i toje, što jon byŭ pieršym kiraŭnikom dziaržavy», - skazała siońnia Dala Hrybaŭskajcie, vinšujučy z 85-hodździem.
Syn Łandśbierhisa taksama Vitaŭtas — piśmieńnik, dziejač kultury, a ŭnuk Habryelus źjaŭlajecca staršynioj partyi «Sajuz Ajčyny».
Sam Vitaŭtas Łandśbierhis-starejšy ŭ intervju Delfi zajaviŭ, što ciapier vielmi lubić bavić čas z praŭnukami, hulaje ź imi ŭ šachmaty, piša dziońniki ŭ vieršach, a taksam rychtuje da druku knihu pra maci — doktara Onu Jabłanskicie-Łandśbierhienie.
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary