Bolš za hod doŭžycca rasśledavańnie hučnaha zabojstva biznesoŭca Siarhieja Miacielskaha ŭ Bierazinie. Ale ŭ spravie, što znachodzicca pad asablivym kantrolem prezidenta, pakul niama istotnych zruchaŭ, pryznaŭsia žurnalistam staršynia Śledčaha kamiteta Ivan Naskievič, piša Tut.by.
«Kali ja vam skažu, što i spać kładusia, i pračynajusia z hetaj spravaj, to nie pahrašu suprać iściny, — skazaŭ Naskievič. — Sprava byccam by elemientarnaja — i vidavočcy byli, i śviedki. Pavinny byli raskryć voś-voś. Ale nie pajšło, i ŭsio. Byvaje takoje. Dapytanyja sotni ludziej. Adpracavany vielizarny masiŭ infarmacyi — abjom spravy ŭžo chutka budzie dasiahać dziasiatkaŭ tamoŭ. Ale raskryć pakul nie atrymlivajecca».
Jon zapeŭniŭ, što i SK, i MUS, i padkdlučanyja inšyja pravaachoŭnyja orhany praciahvajuć pracavać i raźličvajuć raskryć spravu. «Jana z banalnaha zabojstva pierarasła ŭžo ŭ znakavaje złačynstva. Heta niejkaja kropka adliku, pa jakoj možna budzie mierkavać pra prafiesijanalizm našych pravaachoŭnych orhanaŭ. Nam by chaciełasia, kab nas ličyli prafiesijanałami ź vialikaj litary. My dla hetaha zrobim usio mahčymaje», — adznačyŭ kiraŭnik SK.
***
«Heta pytańnie honaru. Ja papiaredžvaŭ i kiraŭnika MUS: jon paabiacaŭ raskryć hetuju kryminalnuju spravu. Vy pavinny źviartać uvahu na padobnyja spravy», — kazaŭ u studzieni Łukašenka.
***
26 vieraśnia 2016 hoda, prykładna ŭ 7.00, na vyjeździe ź Bierazina Minskaj vobłaści znajšli pałajučy aŭtamabil. Na kiroŭčym kreśle było znojdziena cieła zahinułaha mužčyny.
«Miascovy biznesmen vyjechaŭ z doma, u jaho dom na ŭskrainie kala lesu. Jaho tam niepadalok tarmaznuli, zastrelili, mašynu padpalili. Mima jechaŭ miascovy pažarny na pracu, bačyć - staić mašyna, ź jaje dym idzie, adčyniŭ dźviery, ubačyŭ cieła, pasprabavaŭ jaho dastać, pa im ź lesu stralać pačali, kab adahnać ad mašyny. Nu jon - u mašynu, pa hazach i ŭ milicyju», — paviedamiŭ tady miascovy žychar Viktar. Pa słovach jašče adnaho miascovaha žychara, kala mašyny ŭsio toj ža vyratavalnik ubačyŭ «čałavieka z padpalenaj anučaj, jaki kinuŭ jaje na kapot i ŭciok u les».
Zrešty, byli heta streły abo prosta vopleski ad hareńnia ŭ sałonie mašyny - pakul nieviadoma. Jość dadzienyja, što ŭ toj momant kiroŭca aŭto ŭžo zahinuŭ ad ahniastrelnych ranieńniaŭ. U Bierazinie niekatoryja prytrymlivalisia viersii ab zakaznym zabojstvie.
Pa słovach rodnych, 41-hadovy biznesoviec Siarhiej Miacielski apošni čas pracavaŭ u Minsku «antykryzisnym kiraŭnikam». Da taho, jak stać pradprymalnikam, mužčyna paśpieŭ prapracavać u finansavaj milicyi ŭ Barysavie.
Kamientary