U Polščy treba raźmiaścić vojski NATA na pastajannaj asnovie. Pra heta zajaviŭ były ministr zamiežnych spravaŭ krainy Radasłaŭ Sikorski ŭ intervju DW.
Pa jaho słovach, u toj čas jak u Polščy raźmieščany nataŭski bataljon, «pa inšy bok miažy Rasija pravodzić vučeńni z udziełam dziesiatkaŭ tysiač sałdat i adpracoŭvaje pieršaje prymianieńnie jadziernaj zbroi».
Sikorski abvierh mierkavańnie, što raźmiaščeńnie vojskaŭ ZŠA ŭ Polščy parušaje miždziaržaŭnyja damoŭlenaści. Jon padkreśliŭ, što vajennyja bazy i vojski pavinny znachodzicca tam, dzie jość pahroza, a jaje Sikorski bačyć u tym, što Rasija «niezakonna anieksavała častku terytoryi inšaj krainy, jana pa-raniejšamu viadzie hibrydnuju vajnu va Ukrainie». «Jany pavodziać siabie pa vielmi ahresiŭnym scenary. U nas jość padstavy być ustryvožanymi», — zajaviŭ eks-kiraŭnik polskaha MZS.
Miž tym samaj hałoŭnaj niebiaśpiekaj dla NATA z boku Maskvy Sikorski nazvaŭ nie hibrydnuju vajnu, a raspad jeŭrapiejskaj «architektury biaśpieki» i płany RF pa vykarystańni jadziernaj zbroi. Jon ličyć hetuju pahrozu realnaj, abapirajučysia na ŭłasny dośvied. «Kali ja byŭ ministram abarony, ja rassakreciŭ našy navučalnyja karty Varšaŭskaj damovy, pa jakich vidać, što Saviecki Sajuz taksama płanavaŭ vykarystoŭvać jadziernuju zbroju ź pieršaha dnia kanfliktu. Tak što hetaja pahroza realna isnuje».
Kažučy ab pasiadžeńni Rady NATA—Rasija, jakoje pačniecca 26 kastryčnika ŭ Brusieli, Radasłaŭ Sikorski nahadaŭ, što heta — pieršyja pieramovy z času «anšlusu Kryma, z tych časoŭ, jak Rasija ŭpieršyniu paśla Druhoj suśvietnaj vajny z užyvańniem siły źmianiła miežy pad vyhladam akazańnia dapamohi nacyjanalnaj mienšaści». «My ŭžo bačyli hetaje kino, ja kažu heta tut, u Bierlinie, i my viedajem, čym heta skančajecca. Heta vielmi niebiaśpiečnaja hulnia, i treba vielmi ćviorda skazać Rasii, što heta niedapuščalna», — zajaviŭ były ministr zamiežnych spraŭ Polščy.
Ciapier čytajuć
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary