Top-20 zajzdrosnych žanichoŭ krainy — dziaŭčaty, trymajciesia! FOTY
U niekatorych mužčyn našaj hanarovaj dvaccatki sercy nie zusim svabodnyja, ale ž my hladzieli vyklučna na piarścionak. Musim adrazu patłumačyć, što top atrymaŭsia vielmi raznastajny. My vyrašyli nie kancentravacca tolki na pamiery kašalka, a hladzieć krychu šyrej. Top-20 — heta, kaniečnie, vielmi mała, ale abiacajem, što buduć i inšyja.
Vital Hurkoŭ, tajbaksior i vakalist Brutto
Vital stolki razoŭ stanaviŭsia čempijonam śvietu pa tajskim boksie, što ŭžo ciažka nazvać dakładnuju ličbu [jana daŭno pieravaliła za 10 i ŭvieś čas pavialičvajecca]. Mała chto moža pachvalicca takoj kolkaściu pieramoh, jakuju jon zdabyŭ u bajach.
Vital taksama dapamahaje zahartoŭvać budučych čempijonaŭ u minskaj trenažornaj zale Moby Dick. Sioleta tam, darečy, ładziŭ całkam biaspłatnuju treniroŭku dla słuchačoŭ kursaŭ «Mova Nanova».
Uvohule, Hurkoŭ uvieś čas adhukajecca na samyja roznyja inicyjatyvy, dzie patrebna jaho spryjańnie. Naprykład, jon vystaviŭ na aŭkcyjon svoj pieramožny šalik, kab daźbirać nieabchodnuju sumu na pieršy pomnik Kaściušku ŭ Biełarusi.
Honar krainy i bol žančyn — Vital Hurkoŭ. Na žal, taki ŭ nas adziny.
Maksim Kamiankoŭ, biznesoviec, IT
Častka biełaruskaj talenavitaj IT-elity. Razam ź Jaŭhienam Nieŭhieniem jany stvaryli paśpiachovy biełaruski startap SplitMetrics — servis A/V-testavańnia ikonak i skrynšotaŭ u App Store i Google Play dla pavieličeńnia kanviersii mabilnych dadatkaŭ. Sioleta SplitMetrics traplaŭ na hałoŭnuju staronku ŭpłyvovaha siarod inviestaraŭ sajta Product Hunt.
U raniejšych intervju Maksim adznačaŭ, što nie dazvalaje sabie rassłablacca i ŭvieś čas vychodzić z zony kamfortu, kab dumać inakš, pa-novamu, i ruchacca napierad.
Cimafiej Mielnikaŭ, biznesoviec
Cimafiej zmoh zbudavać paśpiachovy i prybytkovy biznes sa zvyčajnaj kulinarnaj supołki «Ukantakcie». Siońnia jaho kamanda raźvivaje bujnuju miedyjakampaniju novaha farmatu Tigermilk, kolkaść padpisantaŭ jakoj pieravaliła za 50 miljonaŭ. Tigermilk jość va ŭsich sacyjalnych sietkach u roznych abliččach: Bon Appetit, «Šedeŭry rekłamy», «Špilki», «120/80», «Idei dla žyćcia», «Intelektualny humar» i mnohaje inšaje. Kali kazać prosta, to heta vielizarnaje ŚMI, u jakoha niama ni papiarovaj viersii, ni sajta ŭ zvyčajnym razumieńni.
Hierman Palaščuk, biznesoviec
Hierman — paplečnik Cimafieja Mielnikava, ź jakim jany razam pačynali biznes i jaki praciahvajuć pašyrać siońnia [vyšej my ŭžo pisali, što ź siabie ŭjaŭlaje Tigermilk]. I Hierman taksama jašče nie paśpieŭ ažanicca.
Sami bačycie, što chłopcy prahresiŭnyja, aktyŭnyja, pradprymalnyja, maładyja i pryhožyja. Zajzdrosnyja žanichi!
Maks Starcaŭ, dyrektar bara «4-4-2»
Minčuka Maksa Starcava viedaje chiba kožny chipstar na rajonie. Jašče zusim zialonym jon pačaŭ ładzić kancerty ŭ kłubie «Reaktar». Paśla čarady paśpiachovych vystupaŭ hurtoŭ nakštałt «Bumboksa» i «Nojz MS» Maksim razam z baćkam stali kancertnym i finansavym dyrektarami hetaha lehiendarnaha raniej miesca. Paśla Maksim peŭny pieryjad kiravaŭ «Repablikam», ale, vidać, najbolš jaho zapomnili za kancept bara «Chulihan». Maks sam siabie nie ličyć paśpiachovym biznesoŭcam, bo pracuje, chutčej, dziela emocyj.
Praz toje, što jon zajmajecca ŭładkavańniem načnoha žyćcia horada i zaŭsiody ŭ tusoŭkach, u maładoha čałavieka skłaŭsia imidž kuciły [tamu i z pastajannaj partniorkaj pakul składana]. Siońnia chłopiec kiruje spartyŭna-rok-n-rolnaj «čaračnaj» «4-4-2», kudy dziaŭčatam uvachod nie zabaronieny, ale zvyčajna ich tam nie šmat. Mała chto viedaje, što Maks lubić i raźbirajecca ŭ kino, tamu ŭ bary možna nie tolki pahladzieć matčy dy pahulać u PS, ale i atrymać asałodu ad roznych kinastužak.
Maksim Jermałovič, namieśnik ministra finansaŭ
Maksim pachodzić ź Lepiela, što ŭ Viciebskaj vobłaści. Karjera ŭ jaho składvałasia davoli tradycyjna dla čynoŭnika: skončyŭ Akademiju kiravańnia pry prezidencie Biełarusi, a paśla zajmaŭ roznyja pasady ŭ Ministerstvie finansaŭ. Ad 2014 hoda pracuje pieršym namieśnikam ministra finansaŭ.
Maksima nazyvali adnym z samych pierśpiektyŭnych čynoŭnikaŭ, niekatoryja ekśpierty navat ličać, što jon maje ŭsie šancy stać ministram. Mienavita Jermałovič letaś zajaviŭ, što «ŭ Biełarusi dla naroščvańnia sacyjalnych abaviazalnictvaŭ reziervy praktyčna vyčarpanyja», tamu pavyšeńnia zarobkaŭ, piensij, dapamoh i stypiendyj asabliva čakać nie varta.
Viadoma, što Maksim maje ŭłasnaje aŭto «Aŭdzi A6» i lubić vandravać.
Andruś Bezdar, zasnavalnik i art-dyrektar architekturnaj studyi «ZROBYM architects»
Kaniečnie ž, nijaki Andruś nie biezdar — heta pravakacyjny chulihanisty psieŭdanim adnaho z najiarčejšych biełaruskich dyzajnieraŭ i architektaraŭ. Toje, što robić jaho studyja, ździŭlaje i zachaplaje svajoj prastatoj, daskanałaściu formaŭ i mocnaj suviaźziu ź Biełaruśsiu. Darečy, kaliści my składali z Andrusiom Top-7 admietnaściaŭ nacyjanalnaha dyzajnu.
I choć pracy ŭ Andrusia chapaje, za apošnija dva lety jon paśpieŭ sprajektavać i zbudavać dačny domik dla mamy, taki samy, pra jaki jana kaliści maryła.
Andruś — ekśpierymientatar i navatar, u jakoha dobra atrymlivajucca samyja roznyja rečy, za jakija jon biarecca. Zirnicie chacia b na jaho kalekcyju adzieńnia UND wear, što idealna ŭliłasia ŭ siońniašniuju minskuju haradskuju prastoru.
Eduard Babaryka, dyrektar pa raźvićci ulej.by
Proźvišča Babaryka viadoma mnohim biełarusam. Baćka Eduarda — Viktar Babaryka — staršynia praŭleńnia Biełhazprambanka. Jon — viadomy biełaruski miecenat. Dziakujučy jaho namahańniam, naprykład, u Minsku prachodzić mižnarodny forum teatralnaha mastactva «Teart». Biełhazprambank taksama kalekcyjanuje karciny viadomych biełaruskich mastakoŭ, siarod jakich Šahał, Sucin i inšyja. Niadaŭna bank vykupiŭ try budynki na Kastryčnickaj, kab stvaryć pastajannuju placoŭku dla art-prajektaŭ.
Eduard u płanie inicyjatyŭnaści ni ŭ čym nie sastupaje baćku. Akramia taho, što jon kiruje adnoj ź pieršych kraŭdfandynhavych placovak «Ulej», źjaŭlajecca aŭtaram i stvaralnikam šerahu startapaŭ, u tym liku servisu płanavańnia i arhanizacyi kalektyŭnych vandrovak elHobo, servisu kalektyŭnaha płanavańnia padziej Rowday i servisu zapisu i prajhravańnia ličbavych uspaminaŭ Tuffle.com.
Franak Viačorka, žurnalist i aktyvist
Franak pachodzić ź intelihientnaj biełaruskaj siamji. Jon — adzin ź viadomych zmaharoŭ u dobrym sensie hetaha słova. Bolšaści viadoma, što Franak vučyŭsia ŭ padpolnym licei imia Jakuba Kołasa, paśla — na žurfaku, ź jakoha jaho adličyli za palityčnuju dziejnaść. Aktyŭna ŭdzielničaŭ u vuličnych akcyjach i fłešmobach u abaronu biełaruskaj movy i suprać kantrolu nad internetam.
Siońnia Franak vučycca ŭ ZŠA, źjaŭlajecca redaktaram novych miedyja «Radyjo Svaboda» i śćviardžaje, što budučynia za sacsietkami. U 2014-m hodzie «Naša Niva» pryznała Viačorku čałaviekam hoda.
Kali zhadvać nie samyja viadomyja fakty, to Franak jašče i akcior (hraŭ pana ŭ kinaśpiektakli «Tutejšyja»), scenaryst (pracavaŭ nad bijahrafičnym scenaryjam da filma pra biełaruskaje vojska «Žyvie Biełaruś») i da ŭsiaho krychu piśmieńnik. Za eratyčnaje apaviadańnie «Liza» jon atrymaŭ litaraturnuju premiju «Załaty apostraf».
Usie, chto znajomy z Franakam, adznačajuć, što jon vielmi hałantny. Ale pakul, vidavočna, prajekty, navučańnie i praca byli ŭ jaho na pieršym miescy.
Ivan Šyła, pradprymalnik
Niemahčyma ŭjavić naš top bieź Ivana Šyły, za pośpiechami jakoha my praciahvajem sačyć i jakim ščyra ciešymsia.
Užo bolš za hod minuŭ z taho času, jak braty Šyły, Ivan i Illa, raspaviali nam, što źbirajucca budavać biznes pa prybirańni kvater. Tady ŭ mnohich byŭ skiepsis: što z hetaha atrymajecca? Prajšoŭ čas, i my bačym, što «Čysty kit» nie tolki isnuje, ale i abrastaje klijentami.
Dadadzim, što hety biznes — nie adzinaja sprava Ivana, jon taksama zajmajecca SMM.
Małady, aktyŭny, dziorzki, śmieły — čym nie zajzdrosny žanich?
Ivan Majeŭski, futbalist
Pa viersii «Presboła», Majeŭski staŭ adnym z troch najlepšych futbalistaŭ hoda ŭ Biełarusi. Cikava, što ŭ sport jon pryjšoŭ paraŭnalna pozna. Hulaŭ u škole, ale biez asablivych praryvaŭ, tamu i vyrašyŭ pastupać na lasnuju haspadarku: zavaliŭ ekzamieny ŭ Minsku, prajšoŭ u Homieli. Paralelna z navučańniem pracavaŭ hruzčykam, paśla — na zavodzie. I niahledziačy na pierśpiektyvy pavyšeńnia, usio ž vyrašyŭ kinuć usio, jak tolki znajomyja prapanavali hulać za futbolny kłub u Kalinkavičach. A dalej — zakruciłasia.
Majeŭski — uładalnik Kubka Biełarusi. U 2015-m jaho zaprasili ŭ Nacyjanalnuju zbornuju. Praŭda, na siońnia asnoŭny kantrakt u futbalista-paŭabaroncy padpisany z kazachstanskim kłubam «Astana» i, jak jon sam pryznaŭsia «Ninie», jaho ŭsio zadavalniaje.
Vania vielmi lubić svaju siamju, tamu, niahledziačy na zaniataść, paśpiavaje vandravać razam z maci i bratam i nie zabyvaje naviedvać rodnuju Rečycu, dzie vyras.
Pavieł Arakielan, muzyka i trenier
Pavieł — armianin, da troch hod žyŭ u Baku, a paśla siamja pierajechała ŭ Biełaruś. I, treba skazać, naša kraina šmat ad hetaha vyjhrała. Paŭła nazyvajuć najlepšym saksafanistam Biełarusi, a jaho spartyŭnaja forma vyklikaje biełuju i čornuju zajzdraść. Praŭda, siońnia Arakielan-saksafanist [i jašče kłavišnik, flejtyst i kampazitar] syšoŭ na druhi płan, sastupiŭšy Arakielanu-instruktaru pa fitniesu i bodzibiłdynhu. Mahčyma, kali biełarusy masava praniknucca džazam, muzyka znoŭ voźmie ŭ žyćci Paŭła pieršynstva. Dadadzim, što hety vołat jašče i vydatna hatuje. Nu mara ž prosta, a nie žanich!
Aleh Saŭčanka, stvaralnik hurtu ŁSP
Mała chto schodu moža ŭzhadać proźvišča muzyki, bo zvyčajna jon pradstaŭlajecca prosta — Aleh ŁSP [skaročana ad anhlijskaj Lil' Stupid Pig]. Hurt vielmi papularny ŭ SND, ź im supracoŭničaŭ «Oxxxymiron», a Ivan Urhant nie tak daŭno zaprasiŭ muzykaŭ na svajo šou.
Aleh naradziŭsia ŭ Viciebsku ŭ siamji žurnalistaŭ, jakija ŭsialak padtrymlivali jaho žadańnie zajmacca muzykaj. Toje, što jaho prajekt staŭ takim papularnym, muzyka tłumačyć prosta: «treba šmat pachać». Letam 2017-a pamior paplečnik pa ŁSP i pradziusar Roma Anhličanin, tady ŭ Aleha była dumka prypynić dziejnaść hurta zusim, ale ŭsio ž pieradumaŭ.
Za žorstkija vykazvańni na adras žančyn u svaich tekstach («ciołki», «ty ŭsim dała» i hetak dalej) i za złoŭžyvańnie aholenymi ciełami ŭ klipach Aleh prasłyŭ seksistam. Ale ŭ apošnich intervju jon asprečvaŭ heta i kazaŭ, što, moža, i byŭ seksistam, ale heta ŭ minułym. Chacia jaho fanatkam usio adno: Aleh vielmi charyzmatyčny i abajalny chłopiec, taki «bed boj», i kožnaja, chto choča być ź im razam, pavinna razumieć, što heta nie toj čałaviek, jaki budzie siadzieć na adnym miescy. Pa mienšaj miery, ciapier.
Źmicier Papko Vinsent, muzyka
Chłopiec ź Ivacevičaŭ, pozirk jakoha nahadvaje ci to Edvarda Kalena z «Pryciemkaŭ», ci to vir vačej vaŭka. U adroźnieńni ad Maksa Karža ci taho ž Aleha ŁSP, Źmicier nastojvaje na tym, što biełaruskaja muzyka moža być vyklučna biełaruskamoŭnaj. Inakš jana čužaja.
Źmicier skončyŭ žurfak BDU, ale žurnalistam tak i nie staŭ. Jašče ŭ studenctvie razam z Franakam Viačorkam jon arhanizavaŭ hurt i praciahnuŭ muzyčnuju liniju ŭ svaim žyćci. Akramia hetaha, jon viadomy jak akcior: Andrej Kurejčyk paklikaŭ jaho ŭ kinastužku pra ŚNID «Vyšej za nieba», a ŭ filmie «Žyvie Biełaruś» Źmicier vykanaŭ hałoŭnuju rolu.
Adznačym, što ŭ dadatak da ŭsiaho Vinsent dobry haspadar: dla jaho niama prablemy praśvidravać dzirku ci pafarbavać ścieny.
Siaržuk Doŭhušaŭ, muzyka, arhanizatar «Śpieŭnych schodaŭ»
Hety muzyka-multyinstrumientalist — prosta niaspynny patok enierhii. Siaržuk zaradžaje joj usich, chto znachodzicca pobač.
Mienavita Siaržuk Doŭhušaŭ zdoleŭ vyjści za miežy zvyčajnaj kancertnaj dziejnaści. Jon nie staŭ abmiažoŭvacca tvorčaściu ŭłasnaha hurta Vuraj i stvaryŭ mocnuju biełaruskuju supolnaść vakoł papularnych «Śpieŭnych schodaŭ».
Na žal, dniami stała viadoma, što Biełaruś časova hublaje svaju zorku. Siaržuk vyjhraŭ stypiendyju Ministerstva kultury Polščy «Gaude Polonia» i da kanca leta budzie žyć i pracavać tam. Jon hetak ža praciahnie papularyzavać biełaruskuju muzyku i tradycyi, tolki ciapier mnohija imprezy buduć ładzicca sumiesna z palakami.
Što budzie nastupnaj vosieńniu, Siaržuk pakul dakładna nie viedaje. Moža być, los zakinie kudyści jašče dalej ad rodnych krajoŭ. Pakul što biełarusy zmohuć bačyć muzyku na radzimie dzieści raz na miesiac na roznych imprezach. Varšava — heta usio ž nie kraj śvietu.
Andruś Takindanh, muzyka i mastak
Kožny, chto choć raz bačyŭ Andrusia [na kancercie, vystavie ci viečarynie — nie važna], toj dakładna padpadaŭ pad jaho niejmaviernaje abajańnie. Heta biez sumnievaŭ samy soniečny biełaruski muzyka. Pryčym talentaŭ u jaho niamierana. Andruś nie tolki hastraluje sa svaim hurtom «Recha», ale i fantastyčna maluje, zdymaje i zdymajecca sam u klipach i pieradačach.
Andruś naradziŭsia ŭ Minsku ŭ siamji biełaruski i ŭradženca Čada. Jaho ekzatyčnaja źniešnaść u spałučeńni ź niejmavierna pryhožaj biełaruskaj movaj i zaŭsiodnaj pryjaznaj uśmieškaj na tvary skarać luboha.
Andruś Horvat, piśmieńnik
Andruś moh by da hetaha času pracavać dvornikam u Kupałaŭskim teatry, dapamahać u žanočym manastyry, i my b z vami ničoha pra jaho nie viedali. Ale jamu nadakučyła staličnaje žyćcio, jon, kažučy prosta, psichanuŭ i źjechaŭ na radzimu prodkaŭ u viosku Prudok. Tam pačaŭ vieści zachaplalny dziońnik pra viaskovyja budni i publikavać zamaloŭki ŭ fejsbuku. Mienavita jany lahli ŭ asnovu jaho pieršaj knihi «Radziva Prudok», jakaja stała sapraŭdnym praryvam u biełaruskaj litaratury.
Horvat, kaniečnie, toj jašče chipstar, ale jon umieje daić koz, pasadziŭ nie adno dreva, viedaje, što rabić z aharodam, i lubić kocikaŭ.
Kaliści Andruś užo byŭ žanaty i maje dačku Varvaru.
Uładzimir Hałak, akcior, pracuje ŭ Nacyjanalnym Centry sučasnych mastactvaŭ
Uładzimir skončyŭ fiłfak, ale zachapili jaho nie movy, a mastactva. Jon hraŭ u frankafonnym teatry, paśla byŭ adnym sa stvaralnikaŭ fiestyvalu amatarskich teatraŭ «Dźviery» i adnajmiennaha teatralnaha almanacha. Potym jaho fokus pieraklučyŭsia na vuličnyja teatry: hetamu mastactvu jon vučyŭsia sam, a siońnia, dziakujučy Vovie i jaho ŭmieńniu znachodzić dyjałoh z čynoŭnikami, Minsk štohod maje mižnarodny forum vuličnych teatraŭ. Niekatoryja na poŭnym surjozie kažuć, što jon moh by być vydatnym ministram kultury.
Akramia teatralnaj dziejnaści i pracy ŭ Centry sučasnych mastactvaŭ, Vova maje jašče adnu aktyŭnuju śfieru dziejnaści — zdymajecca ŭ rekłamie. Ciapier vy budziecie znajomyja z tvaram rolikaŭ «Kindara», «Biełarusbanka», «Jeŭraopta» i inšych kampanij.
Michaił Hardziejčyk, ślesar
Ślesar sa Słucka niečakana dla siabie samoha adnojčy pračnuŭsia znakamitym. Usio zdaryłasia ŭ toj momant, kali jaho instahram adšukali žurnalisty. A profil u jaho sapraŭdy kłasny: tam i viaskovyja krajavidy, i pracoŭnyja momanty, i, samaje hałoŭnaje, šmat fudbłohierstva, ale nie sušy i pasta, a bulba, sała dy pamidory. Usiu ježu Michaił hatuje sabie sam, jak zvyčajny chałaściak, i paznačaje ŭsie recepty aŭtarskim chešteham #ukusna.
Dziŭna, što takoha haspadarlivaha chłopca dahetul nie prybrali da ruk. Niadaŭna Michaił, zusim straciŭšy nadzieju, praź instahram zaprašaŭ dziaŭčat u kino. I kudy jany hladziać?
Anton Matolka, błohier i fatohraf
Aktyŭny papularny błohier, jakomu nie ŭsio adno. Biez udziełu Antona Matolki nie abychodzicca nivodnaja značnaja hramadskaja inicyjatyva. Jak tolki Anton zaŭvažaje dzieści nieparadak, tut ža sihnalizuje pra heta i varušyć vinavatyja słužby i orhany. Jaho dośvied supracy z haradskimi słužbami nastolki vialiki, što jon navat zapuściŭ admysłovy sajt motolkopomohi.bieł, kab dapamahać inšym vyrašać nabalełyja pytańni. Matolka biarecca i za łakalnyja haradskija prablemy, i hłabalnyja, maštabu krainy.
Karaciej, z Antonam nie strašna ni ŭ ahoń, nikudy — hodny žanich!
A kaho vy ličycie samym zajzdrosnym žanichom Biełarusi? Pišycie ŭ kamientarach!
***
Na telehram-kanał «Našaj Nivy» možna padpisacca tut.
Ciapier čytajuć
U Varšavu pryjechała sotnia biełaruskich palitviaźniaŭ8
Kamientary