ZŠA rychtujuć novyja sankcyi suprać rasijskaj nafty, kali Rasija adchilić mirnaje pahadnieńnie
ZŠA rychtujuć novy pakiet sankcyj u dačynieńni da enierhietyčnaha siektara Rasii, kab uzmacnić cisk, kali Maskva adchilić mirnaje pahadnieńnie z Ukrainaj, piša Bloomberg sa spasyłkaj na krynicy.
Razhladajucca miery suprać sudnaŭ «cieniavoha fłotu» Rasii i suprać trejdaraŭ, jakija spryjajuć ździajśnieńniu ździełak. Hetyja płany ministr finansaŭ ZŠA Skot Biesent abmiarkoŭvaŭ padčas sustrečy z hrupaj jeŭrapiejskich pasłoŭ na pačatku tydnia.
Pradstavić novyja sankcyi ZŠA mohuć užo na hetym tydni — adnak kančatkovaje rašeńnie zastajecca za Donaldam Trampam, adznačajuć krynicy.
Adnačasova pasoł Ukrainy ŭ ZŠA Volha Ściefanišyna paviedamiła, što čaćviora amierykanskich sienataraŭ (dvoje respublikancaŭ i dvoje demakrataŭ) unieśli ŭ Sienat dvuchpartyjny zakonaprajekt pad nazvaj «Decreasing Russian Oil Profits Act of 2025», jaki praduhledžvaje sankcyi za kuplu abo sadziejničańnie impartu rasijskaj nafty i naftapraduktaŭ. Pavodle jaje słoŭ, u vypadku pryniaćcia zakonaprajekta jon abaviaža prezidenta ZŠA na praciahu 90 dzion užyć sankcyi ŭ dačynieńni da tych, chto spryjaje impartu rasijskaj nafty. Śpis budzie farmavać ministr finansaŭ paśla kansultacyj ź dziaržaŭnym sakratarom.
Pres-sakratar Kramla Dźmitryj Piaskoŭ zajaviŭ, što Maskvie viadoma pra płany raspracoŭki novych sankcyj. «Toje, što ŭ šerahu kabinietaŭ u Vašynhtonie takija płany isnujuć, — pra heta dobra viadoma. Lubyja sankcyi škodziać spravie naładžvańnia adnosin. Heta vidavočna», — skazaŭ Piaskoŭ.
Kamientary