FSB: Terarystyčnaja supołka anarchistaŭ rychtavała ŭ Rasii ŭzbrojeny miaciež, u arhanizacyi jość jačejki ŭ Biełarusi
Rasijskija śpiecsłužby raskručvajuć spravu ab anarchisckaj arhanizacyi, jakaja nibyta płanavała revalucyju.
Padrabiaznaści spravy paviedamlaje rasijskaje vydańnie «Repablik».
U kancy studzienia 2018 hoda supracoŭniki FSB zatrymali ŭ Sankt-Pieciarburhu niekalkich antyfašystaŭ. Ich abvinavacili ŭ tym, što jany ŭdzielničali ŭ dziejnaści terarystyčnaj arhanizacyi. U sudzie, dzie vyrašałasia pytańnie ab ich aryšcie, pradstaŭniki śpiecsłužby kazali pra toje, što aktyvisty ŭvachodzili ŭ niejkuju arhanizacyju «Sietka», pra jakuju da hetaha času ničoha nie było viadoma.
Žurnalisty «Repablika» aznajomilisia sa spravaj. Z dakumientaŭ vynikaje, što «Sietka» abjadnoŭvała supołki ŭ Maskvie, Sankt-Pieciarburhu i Pienzie. Akramia taho, adździaleńnie hrupy nibyta jość u Biełarusi.
Členy «Sietki», jak śćviardžajuć u FSB, faktyčna płanavali revalucyju: jany źbiralisia «razhajdać narodnyja masy», zładzić vybuchi padčas prezidenckich vybaraŭ i čempijanatu śvietu pa futbole, a taksama padniać ŭzbrojeny miaciež. Nieviadoma, nakolki hetaj viersii možna daviarać: bolšaść fihurantaŭ zajavili, što dali pakazańni pad katavańniami.
Biełaruskija śpiecsłužby paviedamili, što pakul nie mohuć prakamientavać hetyja zajavy.
«My nie možam ani paćvierdzić, ani abvierhnuć infarmacyju», - paviedamiŭ pres-sakratar KDB Dźmitry Pabiaržyn.
«Naša Niva» pacikaviłasia mierkavańniem pradstaŭnikoŭ biełaruskaha anarchičnaha ruchu.
«U Biełarusi vielmi razhalinavany anarchiscki ruch. Nie dziŭna, što da svaich vydumak pra padpolle śpiecsłužby dadali i biełaruskich anarchistaŭ i «jačejku «Sietki», — adkazali «Našaj Nivie». - U cełym usia hetaja «Sietka» — heta vydumka FSB. Padobna na spravu z 1933 hoda — padpolnaja terarystyčnaja kontrrevalucyjnaja arhanizacyja i jakraz pierad vybarami»
Kamientary