«Hetyja pieśni patrebnyja, kab vy tančyli». Top-10 samych zaŭvažnych albomaŭ sakavika ź Biełarusi i z-za miažy
Sakavik vydaŭsia dosyć uradlivym na muzyčnaj hlebie: jak u Biełarusi, tak i pa-za miežami. My sabrali 10 najbolš prykmietnych muzyčnych navinak miesiaca. Čytajem recenzii, słuchajem i kamientujem.
Moby — «Everything Was Beautiful and Nothing Hurt»
U jubilejnaj, piatnaccataj płaścincy vieteran elektronnaj sceny, zdajecca, viartajecca da vytokaŭ. Nahulaŭšysia ŭ elektrarok z postpankam, Mobi pierachodzić da miełancholii i sumu, za jakija my jaho niekali i palubili.
Praca, nazvu jakoj dała cytata Kurta Voniehuta, uzdymaje sacyjalnyja prablemy i ŭnutranyja kanflikty čałavieka. Ale za drapiežnaj ciemraj i apošnim raźvitańniem muzyčny mastak pakidaje nam nadzieju na śviatło.
Editors — «Violence»
Za 16 hadoŭ isnavańnia hurt paśpieŭ paekśpierymientavać z roznymi muzyčnymi žanrami, ale brytancaŭ ciažka nazvać avanturystami: «Violence» — usiaho šosty ich studyjny albom. I z kožnym novym Editors nibyta pieraradžajucca muzyčna.
Ideja alboma — raskazać, jak važna być pobač z tymi, kaho my kachajem. I jak hetaje pačućcio dapamahaje zmahacca z usimi žyćciovymi pieraškodami.
Fratellis — «In Your Own Sweet Time»
The Fratellis imkliva vybuchnuli ŭ 2006 hodzie z debiutnym albomam. Ale paśla hetaha źnikli z muzyčnych radaraŭ.
Možna było b padumać, što najlepšyja časy hurta zastalisia ŭ «nulavych», i The Fratellis nie vyjduć za miežy kalektyvu adnoj pieśni «Chelsea Dagger». Ale chłopcy praciahvajuć zmahacca.
Onuka — «Mozaïka»
Zdavałasia b, tut usio prosta. Ale za dziasiatkam «roznakalarovych» kampazicyj, jakija skłalisia ŭ «mazaiku», chavajecca stolki ž składanych mesedžaŭ.
«Mozaïka» — heta temy vyznačeńnia miesca čałavieka ŭ suśviecie, adzinoty, straty siabroŭ i pošuku siabie. Ale va ŭsioj raznastajnaści i składanaści zakranutych prablem Onuka zastajecca vydatnym prykładam zachavańnia narodnych ukrainskich matyvaŭ u sučasnaj muzycy.
Dielfin — «442»
Hety albom nazyvajuć samym złym i palityzavanym u tvorčaści muzyki. Ale sam aŭtar kaža, što złości ŭ im niama, jość razdražnieńnie.
«442» — heta nadzionny kamientar da padziej, jakija ŭźnikajuć apošnim časam u Rasii. Vytačanyja muzyčna, liryčna i vobrazna, siem trekaŭ ź ličbavymi nazvami bjuć napavał.
Emir Kusturica & The No Smoking Orchestra — «Corps Diplomatique»
Hurt, dzie hraje na hitary znakamity režysior, doŭha nie vydavaŭ ničoha novaha. Ale naprykancy sakavika vyrašyŭ paradavać svaich prychilnikaŭ i amataraŭ bałkanskaj muzyki novym albomam.
Prasłuchoŭvańnie moža dadać krychu paŭdniovaha sonca ŭ biełaruskuju chałodnuju viasnu.
Jack White — «Boarding House Reach»
Padčas asensavańnia i zapisu alboma muzyka stvaryŭ vakoł siabie asiarodździe, jakoje jaho atačała ŭ 15 hadoŭ: stužkavy mahnitafon, bazavyja instrumienty i samy elemientarny mikšar dla zapisu. Heta sproba znoŭ pieražyć peŭnyja momanty i abnavić muzyčnaje ŭsprymańnie.
Jak nam kaža pres-reliz alboma: «Džek Uajt pašyraje svajo muzyčnaje nieba». I pry pieršym prasłuchoŭvańni reliza chočacca dałučycca da hetaha pracesu.
Samoje Bolšoje Prostoje Čisło — «My nie spali, my śniliś»
Sens novaj płytki rasijskaha hurta možna apisać, krychu źmianiŭšy cytatu adnoj ź piesień: «Hety pieśni patrebnyja, kab vy tančyli». Lidar hurta Kirył Ivanoŭ dadaje, što albom pra tuju stupień viasiołaha adčaju, kali nie zastałosia anijakaj nadziei. Tamu zastajecca tolki skakać i rahatać.
Biełaruskija relizy
MUTNAJEVOKA — «Mietro»
Jak śćviardžajuć muzyki, «Mietro» — heta mietafaryčnaje asensavańnie čałaviečaj dušy. Sa svajoj składanaj sistemaj ruchu, śvietłymi prypynkami i čornymi tunelami. Pieśni alboma — heta asabistyja pieražyvańni aŭtara, ale padobnyja pačućci blizkija kožnamu słuchaču.
Bolšaja častka hrošaj na stvareńnie alboma była sabranaja praz kraŭdfandynh, i ŭrešcie možna prasłuchać vynik.
Bakiej — «Nagchampa»
Letaś Bakiej vypuściŭ albom «Nanoniť» i staŭ adkryćciom rep-sceny. U 2018-m Uład praciahvaje adtočvać svoj paznavalny styl i vypuskaje novy albom.
Nagchampa — heta pałački duchmianych rečyvaŭ. Kahości jany zavodziać, a kahości rassłablajuć. Hetak ža i z trekami minčuka.
A što słuchali ŭ sakaviku vy?
Kamientary