Dzianis Alejnikaŭ: Ukrainskija deputaty pierakłali biełaruski Dekret №8 «Ab raźvićci ličbavaj ekanomiki», zachavaŭšy navat nazvu
Adzin z udzielnikaŭ ekśpiertnaj hrupy pa raspracoŭcy Dekreta №8 «Ab raźvićci ličbavaj ekanomiki» Dzianis Alejnikaŭ paviedamiŭ, što ŭkrainskija zakonatvorcy vykarystoŭvali vopyt biełarusaŭ pry padrychtoŭcy prajekta Zakona «Pra roźvitok cifrovoji jekonomiki».
Pa słovach Alejnikava, Dekret №8 «zadaŭ mahutny ŭsplosk ruchu na ličbavizacyju» ŭ mnohich krainach rehijona. I źjaŭleńnie jaho «kopii» na razhladzie ŭ Viarchoŭnaj Radzie Ukrainy paćviardžaje hety fakt.
Praŭda, z aŭtarami zychodnaha tekstu nichto z ukrainskich zakonatvorcaŭ nia źviazvaŭsia.
— Teksty zakonaŭ nie źjaŭlajucca abjektami aŭtarskaha prava, i tamu tut u mianie niama pytańniaŭ, što zapazyčajuć napisany nami tekst, — patłumačyŭ dev.by Dzianis Alejnikaŭ, staršy partnior jurydyčnaj kampanii «Alejnikaŭ i partniory». — Jość honar za našu krainu. My zadajom trend u technałahičnym pravie, našy kancepcyi cikavyja zamiežnym zakanadaŭcam.
Adnak kapijavańnie biez adaptacyi i biez kansultacyj sa śpiecyjalistami, jakija rychtavali tekst Dekreta, heta nie zusim pravilna, ličyć juryst. Pravilna, kali pry hetym zakonaprajekt adaptujecca da realij kankretnaj krainy, jak, naprykład, zakonaprajekt, uniesieny ŭ rasijskuju Dziarždumu.
— Ukraincy praktyčna całkam kapijujuć bolšaść pałažeńniaŭ Dekreta №8 biez uliku suviazi tekstu z pravavoj sistemaj svajoj krainy. Naprykład, ukrainskija deputaty zapazyčyli ŭ nas navat terminy, jakija majuć u Biełarusi vielmi śpiecyfičnaje značeńnie, takija jak «technałahičny ŭkład». Jany taksama nie ŭličyli što, u nas, naprykład, dziejnaść apierataraŭ kryptapłatform i inšych apierataraŭ, jakija pracujuć z kryptavalutami, ažyćciaŭlajecca ŭ Parku vysokich technałohij. Kali ŭ nas napisana «rezidenty PVT», to tam prosta «rezidenty Ukrainy». Pry hetym nichto nie źviarnuŭ uvahu, što biez uliku inšych śpiecyjalnych pałažeńniaŭ zakanadaŭstva, najaŭnych u nas, zapazyčany ŭ nas tekst niežyćciazdolny. U nas Dekret dapaŭniaŭsia šmatstaronkavym Pałažeńniem ab Parku vysokich technałohij, jaki praduhledžvaje śpiecyjalnyja padychody da paradku ažyćciaŭleńnia takoj dziejnaści. Ukrainskija deputaty nie ŭličyli hetaha, na žal, - padkreślivaje Alejnikaŭ.
Kamientary