U niekatorych haradach składana źniać kvateru nadoŭha praz napłyŭ rasijskich turystaŭ

Pakolki ŭ abłasnych haradach «Kufar» jak placoŭka dla arendy papularniejšy za «Reałt», pryčym pa niekatorych pazicyjach u 3—4 razy (dla Minska adroźnieńnie nie takoje istotnaje), dla analizu budziem abapiracca mienavita na «Kufar».

Minsk

Ciapier na 1866 kvater, jakija zdajuć u Minsku na doŭhi termin, isnuje 1465 pasutačnych prapanoŭ.

Atrymlivajecca, što ŭ stalicy choć i ź nievialikim adryvam, ale daminuje doŭhaterminovaja arenda. U pieraliku na kolkaść nasielnictva vychodzić adna prapanova na 1070 žycharoŭ.

Što da kvater, jakija zdajuć pasutačna, to tut atrymlivajecca adna kvatera na 1365 žycharoŭ.

Brest

U Breście na praciahły termin ciapier zdajuć 296 kvater, ci adnu kvateru na 1170 žycharoŭ. Heta robić Brest antylidaram pa kolkaści kvater, jakija zdajuć u doŭhaterminovuju arendu z ulikam nasielnictva horada.

Kolkaść kvater, jakija zdajuć pasutačna ŭ Breście, značna pieravyšaje doŭhaterminovyja — 551 prapanova. Ci pa adnoj kvatery na 679 žycharoŭ.

Viciebsk

U Viciebsku na doŭhi termin zdajuć 351 kvateru, što składaje pa adnoj kvatery na 1020 žycharoŭ. Na karotki termin u Viciebsku zdajecca 288 kvater, ci pa adnoj kvatery na 1242 žychara.

Pavialičyć

Homiel 

U druhim pa kolkaści nasielnictva horadzie Biełarusi ŭ doŭhaterminovuju arendu zdajuć 472 kvatery, ci pa adnoj prapanovie na 1059 žycharoŭ. Što da karotkaterminovych, to ich jašče mienš, čym u Viciebsku — usiaho 268 prapanoŭ, ci pa adnoj kvatery na 1865 žycharoŭ.

Hrodna

U Hrodnie na praciahły termin ciapier zdajecca 319 kvater, ci pa adnoj kvatery na 1143 žycharoŭ. Što tyčycca pasutačnaj arendy, to takich prapanoŭ našmat bolš — 660, abo pa adnoj kvatery na kožnyja 552 žychary. Heta robić Hrodna lidaram pa kolkaści pasutačnych kvater na dušu nasielnictva. 

Mahiloŭ 

U Mahilovie ciapier zdajuć 297 kvater na doŭhi termin i 257 pasutačna. Heta pa adnoj kvatery na 1188 i 1373 žycharoŭ adpaviedna.

Pra što śviedčać takija ličby?

U turystyčnych Hrodnie i Breście rynak pasutačnaj arendy žytła kudy bolš raźvity, čym u troch inšych haradach na ŭschodzie krainy, bo i adpačyvać siudy pryjazdžaje bolš narodu.

Ale dla tych, chto žyvie ŭ hetych haradach i choča arandavać kvateru na doŭhi čas, heta ŭskładniaje pošuki. Bo stanovicca mienš dastupnaha arendnaha žytła, u tym liku praz bolš vysokija staŭki. Asabliva kali razmova idzie pra centralnuju častku horada, dzie tradycyjna lubiać spyniacca turysty.

Naprykład, kali paraŭnoŭvać arendnyja staŭki na dvuchpakajoŭki, jakija zdajuć na praciahły termin u Breście i Mahilovie, to zaŭvažna roźnica ŭ prykładna 80 dalaraŭ.

Pavialičyć

Raźvity rynak pasutačnaj arendy ŭ zachodnich abłasnych centrach mocna adbivajecca na kolkaści prapanoŭ pa zdačy adnapakajovak.

Naprykład, kali ŭ Viciebsku ciapier zdajuć 174 adnapakajovyja kvatery, to ŭ Hrodnie — usiaho 101. Roźnica ŭ cenach — kala 70 dalaraŭ.

Pavialičyć

A kali razhladać mienavita centralnuju častku Hrodna, to adnapakajovak na doŭhi termin tam vielmi mała, a toje, što jość, aceńvajuć u 425—460 dalaraŭ za miesiac.

Praz heta ŭ tym ža Tredsie niaredka možna sustreć dopisy, dzie ludzi skardziacca na vysokija ceny i nizki vybar žytła ŭ doŭhaterminovuju arendu ŭ Breście i Hrodnie.

• 0
• 0
• 0
• 0
• 0
• 0
• 0
• 0