Słavienija zapłacić biełarusu amal 100 tysiač jeŭra za toje, što na jaho naviali pistalet pry zatrymańni, a paśla pratrymali hod za kratami
Mužčyna byŭ u śpisie Interpała pa zapycie Minska, tamu doŭha nie mahli vyznačycca, što ź im rabić.
Biełarus, jaki doŭha žyvie ŭ Hiermanii, atrymaje ad Słavienii €47 030 kampiensacyi za 396 dzion, jakija toj pravioŭ pad vartaj, i za strach pierad ekstradycyjaj u Biełaruś. Suma vyrasła paśla taho, jak nižejšaja instancyja jaje pamienšyła, vykinuŭšy z raźliku samyja ciažkija dla mužčyny akaličnaści.
Biełarusa zatrymali jašče 23 lipienia 2011 hoda na pierachodzie Jelšanie na charvacka-słavienskaj miažy. Padstavaj stała čyrvonaja kartka Interpała, vydadzienaja pa zapycie Minska. U toj samy dzień Akruhovy sud horada Kopier pryznačyŭ jamu aryšt.
Pačaŭsia praces vydačy. Dvojčy słavienskija sudy dazvalali ekstradycyju mužčyny ŭ Biełaruś, ale Kanstytucyjny sud Słavienii skasoŭvaŭ hetyja rašeńni i viartaŭ spravu na novy razhlad. Tolki ŭ žniŭni 2012 hoda było kančatkova vyrašana: admović u vydačy i vyzvalić mužčynu. U vyniku jon pravioŭ pad vartaj 396 dzion, choć nie byŭ asudžany nidzie — ni ŭ Słavienii, ni ŭ Biełarusi.
Da aryštu biełarus kala 21 hoda žyŭ i pracavaŭ u Hiermanii, dzie ŭ jaho byŭ pracoŭny kantrakt. Praź źniavoleńnie jon straciŭ pracu. Padčas zatrymańnia na pamiežnym pierachodzie palicejski biez bačnaj padstavy navioŭ jamu na hałavu pistalet — na vačach u žonki i dziaciej. U niavoli mužčyna byŭ razłučany z žonkaj i dvuma niepaŭnaletnimi dziećmi troch i dzieviaci hadoŭ, pryčym adno ź dziaciej ciažka chvareła. Mužčyna schudnieŭ, u jaho raźviŭsia razład adaptacyi, nastupstvy jakoha jon, pavodle vysnoŭ suda, adčuvaŭ i praź dziesiać hadoŭ.
Sprečka dajšła da Viarchoŭnaha suda Słavienii praz pamier kampiensacyi. Biełarus pieršapačatkova prasiŭ €166 000. Akruhovy sud Lublany pryznačyŭ €35 800 — €25 000 za maralnuju škodu i €10 800 za stračany zarobak. Apielacyjnaja instancyja źmienšyła maralnuju častku da €19 800, paličyŭšy, što dziaržava nie adkazvaje ni za akaličnaści samoha zatrymańnia, ni za strach pierad vydačaj u Biełaruś, bo heta, maŭlaŭ, lažyć u śfiery adkaznaści krainy, jakaja patrabavała ekstradycyi.
Viarchoŭny sud z hetym nie pahadziŭsia. U svaim kančatkovym rašeńni ad 5 červienia 2024 hoda jon ukazaŭ, što dziaržava nie moža paźbiehnuć adkaznaści, spasyłajučysia na toje, što ordar vydała Biełaruś, bo mienavita słavienskija orhany zatrymlivali čałavieka i prymali rašeńni pra jaho vydaču. Sud pryznaŭ, što nastaŭleny na hałavu pistalet na vačach u siamji parušyŭ hodnaść mužčyny, a strach pierad ekstradycyjaj u Biełaruś, «dzie dahetul dziejničaje śmiarotnaje pakarańnie i nizki ŭzrovień pavahi da pravoŭ čałavieka», byŭ całkam abhruntavany. Hety strach, padkreśliŭ sud, uzmacniaŭsia jašče i tym, što słavienski sud pieršaj instancyi navat paśla ŭmiašańnia Kanstytucyjnaha suda znoŭ pryznačyŭ vydaču. Ceły hod čałavieka, pavodle farmuloŭki suda, nie pakidaŭ intensiŭny strach pierad biaspraŭjem i aŭtarytarnym režymam.
Z ulikam hetaha Viarchoŭny sud pavialičyŭ kampiensacyju za maralnuju škodu da €36 230, što adpaviadaje 25 siarednim miesiačnym zarpłatam u Słavienii. Razam sa €10 800 za stračany zarobak ahulnaja suma skłała €47 030.
Ale naminalnyja €47 030 — heta tolki asnoŭnaja suma doŭhu. Z ulikam zakonnaj pieni, jakaja nabiahaje amal dziesiać hadoŭ, realnaja suma značna bolšaja. Pavodle prybliznych padlikaŭ, adny tolki pienia-pracenty sa žniŭnia 2015 hoda składajuć kala €46 tysiač — amal stolki ž, kolki i sama prysudžanaja kampiensacyja. Takim čynam, razam z sudovymi vydatkami ahulnaja suma, jakuju dziaržava musić vypłacić biełarusu, nabližajecca da €95 tysiač.
Kamientary