Dziasiatki ekśpiedycyj na Paleśsie i vyvučeńnie falkłoru nie prajšli daremna — Siaržuk Doŭhušaŭ z hurtom Vuraj rychtujuć da zapisu novy albom pad nazvaj «Lito».
«Lito» — heta bieražliva sabranyja, vyvučanyja, pieraasensavanyja i litaralna nanoŭ stvoranyja abradavyja pieśni biełaruskaha Paleśsia, jakija muzyki sami na praciahu 4 hadoŭ šukali ŭ ekśpiedycyjach, znachodzili i nadavali kožnaj svajo admietnaje «vurajskaje» hučańnie.
U novym albomie budzie padkreślivacca ŭnikalnaść kožnaha rehijona Paleśsia — aŭtentyčnyja miełodyi i muzyčny stroj, admietnaści mikramoŭ i dyjalektaŭ.
«Ludzi sychodziać, pieśni źnikajuć, a nam chočacca dzialicca hetymi sapraŭdnymi skarbami z usim śvietam, danosić da sučasnaha čałavieka paleskuju movu, miełodyi, jakim sotni hod. Na albomie «Lito» my pradstavim pieśni, jakija, chutčej za ŭsio, šmat ludziej pačujuć upieršyniu. Heta pieraasensavanyja narodnyja pieśni, jany i ciapier nie hublajuć sensu i sakralnaści. Taksama my papularyzujem aŭtentyčnaje hučańnie hetych piesień, znajomim usich z aŭtentyčnymi vykanaŭcami, rasšyfroŭvajem i prezientujem teksty piesień», — kaža falkłaryst, lidar hurta Vuraj Siaržuk Doŭhušaŭ.
Zapis, źviadzieńnie i masterynh buduć zrobleny na studyi TRStudio u Varšavie. Heta vydatnaja studyja ź pieršakłasnymi prafiesijanałami (naminacyja na Grammy) z dośviedam pracy z fołk-muzykaj.
Zapis adbudziecca ŭžo hetym letam, kali muzyki naźbirajuć patrebnuju sumu z dapamohaj kraŭdfandynhu.
Pieradzamović dysk z unikalnymi pieśniami možna naŭprost zaraz, padtrymaŭšy prajekt na kraŭdfandynhavaj płatformie Ulej.by.
A dla tych, chto asabliva paspryjaje zapisu i vydańniu dyska, muzyki padrychtavali krutyja padarunki: majstar-kłas pa narodnych śpievach, karparatyŭny kancert, napisańnie muzyki i ŭdzieł u sapraŭdnaj etnahrafičnaj ekśpiedycyi!
Niekatoryja pieśni z novaha alboma prahučać na kancercie 17 krasavika, dzie Vuraj zajhraje razam z polskim etna-džazavym hurtom T/Aboret.
Padtrymajcie prajekt na Ulej.by: my razam zachavajem hałasy prodkaŭ i damo staražytnym śpievam novaje žyćcio!
Kamientary