Arciom Masiajčuk asudžany na 6 hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj i štrafam 2500 bazavych vieličyń (61 250 rubloŭ) za niezakonnuju pradprymalnickuju dziejnaść i machlarstva.
U svoj čas Masiajčuk byŭ adnym z prykmietnych aktyvistaŭ BRSM. U 2015-2016 hadach jon źjaŭlaŭsia adnym z udzielnikaŭ (pa viersii siłavikoŭ — kiraŭnikom) biełaruskaj haliny kampanii Kairos Technologies, jakaja zajmałasia pryciahnieńniem hrašovych srodkaŭ nasielnictva. Staličnyja śledčyja ŭstanavili abstaviny funkcyjanavańnia «finansavaj piramidy» na terytoryi Biełarusi.
Pa vysnoŭ śledstva, 25-hadovy mužčyna sa studzienia 2015 pa vierasień 2016 hoda kiravaŭ biełaruskaj jačejkaj Kairos Technologies i pryciahvaŭ novych «układčykaŭ». Ludzi addavali častku chard-dysku ŭ arendu i apłačvali ŭstupny ŭznos — ad 125 da 2777 dalaraŭ. Paśla hetaha ŭkładčyki atrymlivali štomiesiac dachod nibyta za zachoŭvańnie zašyfravanaj infarmacyi bujnych karparatyŭnych klijentaŭ. Pry hetym vypłaty ažyćciaŭlalisia za košt novych «inviestaraŭ» kampanii.
Apłačvanaja arenda častki chard-dyska źjaŭlałasia asnovaj lehiendy, pavodle jakoj dziejnaść kampanii ažyćciaŭlałasia vyklučna ŭ IT-śfiery. Pry hetym pa nadziejnaści, chutkaści dostupu i canie prapanavanaja pasłuha nie mahła kankuryravać z anałahičnymi praduktami bujnych kampanij.
Vietka struktury Arcioma Masiejčuka naličvała 108 ŭkładčykaŭ, sumarny dachod skłaŭ zvyš 326 tysiač rubloŭ.
Masiajčuk byŭ zatrymany 30 vieraśnia 2016 hoda. Jaho dziejańni byli kvalifikavanyja pa č. 3 art. 233 (Niezakonnaja pradprymalnickaja dziejnaść, spałučanaja z pryciahnieńniem hrašovych srodkaŭ, z atrymańniem dachodu ŭ asabliva bujnym pamiery, učynienaja arhanizavanaj hrupaj) i č. 3 art. 209 (Machlarstva) Kryminalnaha kodeksa Biełarusi.
Arciom Masiajčuk nie pryznavaŭ svaju vinu ŭ poŭnym abjomie.
Kamientary